ރ.އިންނަމާދޫގެ ގޭބިސީތަކަށް ކަރަންޓު ފޯރުކޮށްދޭން ހުރި ހަމައެކަނި ޖަނަރޭޓަރު ހަލާކުވެގެން މުޅި ރަށް އޮތީ ކަނު އަނދިރީގައި ކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.

ހޮނިހިރު ދުވަހުގެ ހަވީރު 5.15 ހާއިރުން ފެށިގެން ރަށުން ކަރަންޓު ކެނޑިފައިވާ އިރު، ރަށަށް ދިމާވެގެން އުޅޭ ކަރަންޓު މައްސަލައަށް ހައްލެއް ލިބޭނެ އިރެއް ވެސް ނޭނގެއެވެ. ރާއްޖެއެމްވީއަށް މައުލޫމާތު ދެއްވަމުން އިންނަމާދޫ ކައުންސިލްގެ ނައިބު ރައީސް ހުސައިން އަރީފް ވިދާޅުވީ މިހާރު ދޭތެރެ ދޭތެރެއިން ކަރަންޓު ކެނޑޭތާ ދުވަސްތަކެއް ވެފައިވާ އިރު، މިދިޔަ މަހެއްހާ ދުވަހުގެ ތެރޭގައި ކަރަންޓު އިރުއިރުކޮޅާ ކަނޑައިގެން ދިޔުމުގެ މައްސަލަ ދިމާވެފައިވާ ކަމަށެވެ. 

އަރީފް ވިދާޅުވީ އެ ރަށުގައި ފެނަކައިން ހިންގާ އިންޖީނުގޭގައިި ހުރި ތިން ޖަނަރޭޓަރުގެ ތެރެއިން ދޭތި ހަލާކުވެފައި ހުންނަތާ ހަތަރު މަސް ދުވަހަށް ވުރެ ގިނަ ދުވަސްވެފައިވާ އިރު، އޭރުންސުރެން ކަރަންޓުގެ މައްސަލައަށް ހައްލެއް ނައިސް ދޭތެރެ ދޭތެރެއިން ކަރަންޓު ކެނޑެމުން އައިސްފައިވާ ކަމަށެވެ. އަދި ކަރަންޓު ކެނޑެން މެދުވެރިވީ މިހާރު ސަލާމަތުން ހުރި ހަމައެކަނި ޖަނަރޭޓަރަށް ލޯޑު ބޮޑުވެގެން ދިޔުމާއި ގުޅިގެން ކަމަށް ފެނަކައިން މައުލޫމާތު ދީފައިވާ ކަމަށް އޭނާ ވިދާޅުވިއެވެ.

ކަރަންޓުގެ މައްސަލަ ހައްލުކުރަން ފެނަކައިގެ ޓެކްނިކަލް ޓީމެއް މިހާރު އެރަށުގައި ހަރަކާތްތެރިވަމުންދާ އިރު، އެރަށަށް މިރޭ ކަރަންޓު ފޯރުކޮށްދެވޭ ވަރަށް ވުރެ ޖަނަރޭޓަރު މިހާރު ހަލާކުވެފައިވާ މިންވަރު ބޮޑު ކަމަށް ފެނަކައިން ބުނެފައިވާ ކަމަށް ވެސް އަރީފް ވިދާޅުވިއެވެ. އަދި މިހާރު އެ ސަރަހައްދުގެ ފެނަކައިގެ ރީޖަނަލް ހެޑަށް ގުޅައިގެން އެރަށަށް 400 ކިލޯވޮޓްގެ ޖަނަރޭޓަރެއް ގެންދިޔުމުގެ މަސައްކަތް ކުރަމުންދާ ކަމަށް އެރަށު ފެނަކައިގެ އެސިސްޓަންޓް މެނޭޖަރު ހަސަން ވަސީމް ވިދާޅުވެފައިވާ ކަމަށް އޭނާ މައުލޫމާތު ދީފައިވެއެވެ. 

މިކަމާ ބެހޭގޮތުން މައުލާމާތު ހޯދާލަން ހަސަން ވަސީމްއަށް ގުޅާލުމުން އެފަރާތުން ބުނެފައިވަނީ ކަރަންޓު ފޯރުކޮށްދެވޭނެ އިރެއް ޔަގީންކޮށް ދަންނަވަން އަދި ނޭނގޭ ކަމަށާއި، މިހާރު ވެސް ކަރަންޓުގެ މައްސަލަ ހައްލުކޮށްދިނުމުގެ މަސައްކަތުގައި ފެނަކައިގެ ޓެކްނިކަލް ޓީމެއް ހަރަކާތްތެރިވަމުންދާ ކަމަށެވެ. އަދި ކުރިން މައްސަލަ ދިމާވެފައިވާ ދެ ޖަނަރޭޓަރު މަރާމާތު ނުކުރެވިފައި ވަނީ ސްޕެއަރ ލިބުމުގައި ހުރި ދަތިތަކެއްގެ ސަބަބުން ކަމަށް ވެސް ވިދާޅުވިއެވެ.

އާބާދީގައި 869 މީހުން ހިމެނޭ އިންނަމާދޫއިން ކަރަންޓު ކެނޑިގެން އުޅޭއިރު، ފެނަކައިން އެރަށުގައި ހިންގާ އިންޖީނުގެ ރަސްމީކޮށް ހުޅުއްވައިދެއްވީ 2015 ވަނަ އަހަރުގެ ސެޕްޓެމްބަރު 1 ވަނަ ދުވަހުގައި، ކުރީގެ ރައީސް އަބްދުﷲ ޔާމީން އަބްދުލް ގައްޔޫމްއެވެ.