ރައްޔިތުންގެ މަޖިލީހުގެ އިންތިޚާބުގެ ދާއިމީ ނަތީޖާ މިރޭ 9:30 ގައި އިއުލާން ކުރަން ފަށާނެ ކަމަށް އިލެކްޝަންސް ކަމިޝަން(އީސީ) އިން ބުނެފިއެވެ.

އިންތިޚާބާ ބެހޭ ގާނޫނު ބުނާ ގޮތުން އިންތިޚާބު ބާއްވާތާ ހަތް ދުވަހުގެ ތެރޭގައި ދާއިމީ ނަތީޖާ އީސީއިން އިއުލާން ކުރަން ޖެހޭނެއެވެ. އީސީއިން މި ފަހަރު އިއުލާން ކުރާނީ ދާއިރާތަކުގެ ނަތީޖާ އެކަންޏެވެ.  

މަޖިލިސް އިންތިޚާބުގައި މި ފަހަރު 87 ދާއިރާ އަކަށް ކެންޑިޑޭޓުން ހޮވާނެއެވެ. މިފަހަރުގެ އިންތިޚާބުގައި 2،64442 މީހަކު ވޯޓުލުމުގެ ހައްގު ލިބިފައިވާއިރު 212,079 (ދެ ލައްކަ ބާރަހާސް ހަތްދިހަ ނުވަ) މީހުން ވޯޓުލާފައި ވެއެވެ. އެއީ 80 ޕަސެންޓްގެ ޓާންއައުޓެކެވެ. މިއީ  މަޖިލިސް އިންތިޚާބެއްގައި މިހާ ގިނަ އަދަދެއްގެ މީހުން ވޯޓުލީ ފަހަރެވެ. 

ވަގުތީ ނަތީޖާ ދައްކާ ގޮތުން އެމްޑީޕީއަށް ވަނީ ސުޕަރ މެޖޯރިޓީ ލިބިފައެވެ. އެޕާޓީއަށް 65 ގޮނޑިވަނީ ލިބިފައެވެ. ޕީޕީއެމް/ކޮންގްރެސް ޕާޓީ އަށް ލިބުނީ އަށް ގޮނޑިއެވެ. ޖުމްހޫރީ ޕާޓީ އަށް ލިބުނީ ފަސް ގޮނޑިއެވެ.