ކެންދޫ ދާއިރާގެ ވޯޓު ފޮއްޓެއް ބާތިލްކުރަން އެދިއްޖެ
9 އެޕްރީލު 2019 | އަންގާރަ 07:51ވަގުތީ ނަތީޖާ ދައްކާގޮތުން އެ ދާއިރާގެ ގޮނޑި ކާމިޔާބު ކުރެއްވީ އަލީ ހުސައިން
މަޖިލިސް އިންތިޚާބުގެ ތެރެއިން
ހޮނިހިރު ދުވަހު ބޭއްވި ރައްޔިތުންގެ މަޖިލިސް އިންތިހާބުގައި ބ. ކެންދޫ ދާއިރާގައި ބެހެއްޓި ވޯޓު ފޮއްޓެއް ބާތިލް ކުރުމަށް އެމްޑީޕީއިން ހުށައަޅައިފިއެވެ.
މައުލޫމާތު ލިބިފައިވާ ގޮތުގައި ކެންދޫ ދާއިރާގައި ބެހެއްޓި ވޯޓު ފޮށީގެ ތެރެއިން ކެންދޫ ސްކޫލުގައި ބެހެއްޓި އެ ފޮށި ބާތިލް ކުރަން އިލެކްޝަންސް ކަމިޝަނަށް އެމްޑީޕީއިން ހުށައެޅީ އެ ފޮއްޓަށް ވޯޓުލީ މީހުންގެ އަދަދުތައް ދިމާނުވާ ކަމަށް ބުނެއެވެ. އެ ވޯޓު ފޮށި ބާތިލުކޮށް އަލުން އެ ފޮއްޓަށް ވޯޓުލުން ކުރިއަށް ގެންގޮސްދިނުމަށް އެޕާޓީއިން އީސީގައި ވަނީ އެދިފައެވެ.
ކެންދޫ ދާއިރާގެ ވަގުތީ ނަތީޖާ ދައްކާގޮތުން ކުރީގައި އުޅުއްވަނީ މިހާރު ވެސް އެ ދާއިރާ ތަމްސީލު ކުރައްވަމުން ގެންދަވާ ޖުމްހޫރީ ޕާޓީގެ ކެންޑިޑޭޓް އަލީ ހުސައިންއެވެ. އަލީ ހުސައިންގެ އިތުރުން އެދާއިރާއަށް ކުރިމަތިލައްވާފައި ވަނީ އެމްޑީޕީގެ ޓިކެޓުގައި ވާދަކުރެއްވި އަހުމަދު ލަތީފާއި އަމިއްލަ ގޮތުން ވާދަކުރެއްވި އަހުމަދު ރިޒާއެވެ.
ކެންދޫ ސްކޫލުގައި ބެހެއްޓި އެ ފޮށީގެ ވަގުތީ ނަތީޖާއަށް ބަލާއިރު އަލީ ހުސެއިނަށް 286 ވޯޓު، އަހުމަދު ލަތީފަށް 66 ވޯޓު އަދި އަހުމަދު ރިޒާއަށް 141 ވޯޓު ލިބިފައިވެއެވެ.
ކެންދޫ ދާއިރާގެ ވަގުތީ ނަތީޖާ ދައްކާގޮތުން އެ ދާއިރާގެ ގޮނޑި ކާމިޔާބު ކުރެއްވީ އަލީ ހުސައިނެވެ.
