ދާއިމީ އެއްބަސްވުމެއްގެ ދަށުން ކޮވަސިޗް ޗެލްސީގައި ބަހައްޓަން ބޭނުން: ސާރީ

ދާއިމީ އެއްބަސްވުމެއްގެ ދަށުން ޗެލްސީއަށް ކުޅެމުން އަންނަ މަޓިއޯ ކޮވަސިޗް އެ ކްލަބުގައި ބަހައްޓަން ބޭނުންވާ ކަމަށް ކޯޗު މައުރީޒިއޯ ސާރީ ބުނެފިއެވެ.

ގޯލްޑޮޓްކޮމްއަށް ދިން އިންޓަވިއުއެއްގައި ސާރީ ބުނީ، ރެއާލް މެޑްރިޑުން ލޯން އެއްބަސްވުމެއްގެ ދަށުން މި ސީޒަނުގެ ނިޔަލަށް ޗެލްސީއަށް ދޫކޮށްފައިވާ ކޮވަސިޗްގެ އެއްބަސްވުން ދާއިމީކޮށް, ކްލަބުގައި ބަހައްޓަން ބޭނުންވާ ކަމަށާއި، އެއީ ކްލަބަށް ބޭނުން ކުޅުންތެރިޔެއް ކަމަށެވެ.

ސާރީ ބުނީ، ކޮވަސިޗް ކުޅޭ މަގާމަކީ ޗެލްސީއަށް މައްސަލަތައް ކުރިމަތިވާ މަގާމެއް ކަމަށާއި، އެ މަގާމުގައި ބަހައްޓަން އެންމެ ބޭނުންވަނީ ކޮވަސިޗް ކަމަށެވެ. އަދި އެކަމަށް މަސައްކަތް ކުރާނެ ކަމަށް ވެސް ސާރީ ވަނީ ބުނެފައެވެ.

ޑައިނަމޯ ޒަގްރެބް އިން 2010 ވަނަ އަހަރު ކެރިޔަރު ފެށި ކޮވަސިޗް ވަނީ އެ ކްލަބުގައި ތިން ސީޒަން ހޭދަކޮށް، ކުޅުނު 73 މެޗުގައި ނުވަ ލަނޑު ކާމިޔާބުކޮށްފައެވެ. އެ ކްލަބް ދޫކޮށް އޭނާ އިންޓަ މިލާނަށް ބަދަލުވީ 2012 ވަނަ އަހަރެވެ. އެ ކްލަބުގައި އޭނާ ވަނީ ތިން ސީޒަން ހޭދަކޮށް ކުޅުނު 97 މެޗުގައި 8 ލަނޑު ކާމިޔާބުކޮށްފަ އެވެ.

އިންޓަ މިލާން ދޫކޮށް ކޮވަސިޗް ރެއާލް އަށް ބަދަލުވީ 2015 ވަނަ އަހަރެވެ. އޭނާ ވަނީ އެ ކްލަބަށް ކުޅުނު ތިން ސީޒަނުގައި 109 މެޗު ކުޅެ ތިން ލަނޑު ކާމިޔާބުކޮށްފަ އެވެ.

ކޮވަސިޗް ވަނީ ރެއާލްއާ އެކު ލަލީގާ، ސްޕެނިޝް ސުޕާ ކަޕް، ޔުއެފާ ޗެމްޕިއަންސް ލީގު ތިންފަހަރު، ޔުއެފާ ސުޕާ ކަޕް ދެފަހަރު އަދި ފީފާ ކްލަބް ވޯލްޑް ކަޕް ދެފަހަރު ކާމިޔާބުކޮށްފަ އެވެ.

ކޮވަސިޗް ވަނީ މިހާތަނަށް ޗެލްސީއަށް 42 މެޗު ކުޅެފައެވެ. އޭނާ އަންނަނީ އެ ކްލަބުގައި މޮޅު ކުޅުމެއް ދައްކާ، ފުރަތަމަ 11 އިންވެސް ޖާގަ ހޯދަމުންނެވެ.

ނިމިގެންދިޔަ ވޯލްޑް ކަޕްގައި ކްރޮއޭޝިއާގެ ގައުމީ ޓީމާއެކު މުބާރާތުގެ ދެވަނަ ހޯދި ކޮވަސިޗް ވަނީ ގައުމީ ޓީމަށް ކުޅުނު 50 މެޗުގައި އެއް ލަނޑު ކާމިޔާބުކޮށްފަ އެވެ.