ބޮޑު ތަފާތަކުން އޭއެފްސީ އިންތިހާބު މާޔަންއަށް ނާކާމިޔާބުވެއްޖެ

އޭޝިއަން ފުޓުބޯލް ކޮންފެޑަރޭޝަން (އޭއެފްސީ) ގެ އަންހެން މެމްބަރުގެ ގޮނޑި އަދި ފީފާ ކައުންސިލަށް އޭއެފްސީން ކަނޑައަޅާ އަންހެން މެމްބަރުގެ ގޮނޑި އަށް އެފްއޭއެމުން ނޮމިނޭޓްކުރި މަރިޔަމް މުހައްމަދު (މާޔަން) ބޮޑު ތަފާތަކުން ނާކާމިޔާބު ވެއްޖެއެވެ.

މެލޭޝިއާގެ ކުއަލަލަމްޕޫރުގައި ކުރިއަށްދިޔަ އޭއެފްސީ ކޮންގްރެސްގައި ނެގި ވޯޓުން މާޔަން ނާކާމިޔާބު ވެފައި ވަނީ ބަންގްލަދޭޝްގެ މަހްފޫޒާ ކިރޮންއާ ވާދަކޮށް 16 ވޯޓުގެ ތަފާތަކުންނެވެ. މި އިންތިހާބުގައި މަހްފޫޒާއަށް 31 ވޯޓު ލިބުން އިރު މާޔަން އަށް ލިބިފައި ވަނީ 15 ވޯޓެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެފައި ވަނީ 2023 ވަނަ އަހަަރާ ހަމަޔަށް އިންތިޙާބުކުރާ މި ގޮނޑި މާޔަން އަށް ކާމިޔާބުނުވުމަކީ މާޔޫސްކަމެއް ކަމަށާއި، އެކަމަކު ހާލަަތަށް ބަލާއިރު އެކަށީގެންވާ ތާއީދެއް ލިބުނު ކަމަށެވެ.

ގައުމީ އަންހެން ފުޓްބޯޅަ ޓީމަށް ކުޅެ އެސިސްޓަންޓް ކޯޗެއްގެ ގޮތުގައި ވެސް މަސައްކަތްކޮށްފައިވާ މާޔަން ވަނީ މީގެ ކުރިން އޭއެފްސީ ވިމެންސް ކޮމިޓީގައި ވެސް މަސައްކަތްކޮށްފައެވެ. އަދި 2003 ވަނަ އަހަރު ވިމެންސް ފުޓްބޯލް ޑިވެލޮޕްމަންޓް އޮފިސަރެއްގެ ގޮތުގައި އެފްއޭއެމްއާ އެކު މަސައްކަތް ފަށައި، ގިނަ އަހަރުތަކެއް ފަހުން އެފްއޭއެމްއާ ދުރަށް ދިޔަ ނަމަވެސް އަންހެން ފުޓްބޯޅަ ކުރިއެރުވުމަށް އެކި މަސައްކަތްތަކެއް ވަނީ ކޮށްފައެވެ.