އެންމެ ރަށެއް ފިޔަވައި ހުރިހާ ރަށެއްގައި ވޯޓުލުން ފެށިފައިވާ ކަމަށް އިލެކްޝަން ކޮމިޝަނުން ބުނެފިއެވެ.

އިލެކްޝަންސް ކޮމިޝަންގެ މެމްބަރު އަހުމަދު އަކްރަމް ވިދާޅުވީ މަޖިލިސް އިންތިޚާބަށް ވޯޓުލުން ތިލަފުށި ފިޔަވައި ހުރިހާ ރަށެއްގައި ވޯޓުލުން ފެށިފައިވާ ކަމަށެވެ.

އަކްރަމް ވިދާޅުވީ ތިލަފުށީގައި ވޯޓުލުން ނުފެށި ލަސްވެގެން ދަނީ ވޯޓުލާ ތަކެތި ވެއްދުމުގައި ދިމާވި ދަތިތަކެއްގެ ސަބަބުން ކަމަށާއި، އެކަން ހައްލުކޮށް ވީހާ ވެސް އަވަހަށް ވޯޓުލުން ފެށުމަށް މަސައްކަތް ކުރަމުންދާ ކަމަށެވެ.

މީގެ އިތުރުން އަކްރަމް ވިދާޅުވީ ވޯޓުލުމުގެ ހުރިހާ ކަމެއް ވެސް ކުރިއަށް ގެންދަނީ ވަރަށް އޮމާންއަމާންކަމާ އެކު ކަމަށާއި، މިހާތަނަށް މާބޮޑު މައްސަލައެއް ކުރިމަތިނުވާ ކަމަށެވެ.

މި އިންތިހާބުގައި މާލެ ސަރަހައްދުގައި ޖުމްލަ 144 ވޯޓު ފޮއްޓެއް ބެހެއްޓުމަށް ވަނީ ހަމަޖެހިފައެވެ. މުޅި ޖުމްލަކޮށް މި ފަހަރުގެ އިންތިހާބުގައި 501 ވޯޓު ފޮށި  ވަނީ ބަހައްޓާފައި ވެއެވެ. 

މި ފަހަރުގެ އިންތިޚާބުގައި ކެންޑިޑޭޓުންގެ 1663 މަންދޫބުން ހަރަކާތްތެރިވާއިރު، ރާއްޖޭގެ 3624 ފަރާތަކުން ވެސް އޮބްޒާވްކުރާނެ އެވެ. އަދި މީޑިއާތަކުން 2220 މޮނިޓަރުން ހަރަކާތްތެރިވާނެ އެވެ. އިންތިޚާބުގައި އިލެކްޝަންސް ކޮމިޝަންގެ 4،000 އަށް ވުރެ ގިނަ އޮފިޝަލުން ހަރަކާތްތެރިވާނެ އެވެ