ހޯރަފުށީ ދާއިރާގެ ރައްޔިތުން ސަލީމަށް ވޯޓް ދެއްވުމަށް ޓްރާންސްޕޯޓް މިނިސްޓަރު އަނެއްކާ ވެސް ގޮވާލައްވައިފި
4 އެޕްރީލު 2019 | ބުރާސްފަތި 18:09ސަލީމަކީ ރައީސްގެ ތާއީދު ލިބިވަޑައިގެންފައިވާ ބޭފުޅެއް
ހޯރަފުށީ ދާއިރާގެ އެމްޑީޕީގެ ކެންޑިޑޭޓަށް ތާއިދު ހޯދުމަށް ބޭއްވި ހަރަކާތުގެ ތެރެއިން
އެމްޑީޕީގެ ޓިކެޓްގައި ރައްޔިތުންގެ މަޖިލީހަށް ވާދަކުރައްވާ ކެންޑިޑޭޓް އަހުމަދު ސަލީމް (ސައްލެ) އަށް ހޯރަފުށީ ދާއިރާގެ ރައްޔިތުން ވޯޓް ދެއްވުމަށް ޓްރާންސްޕޯޓް މިނިސްޓަރު އައިޝާތު ނަހުލާ އެދިވަޑައިގެންފިއެވެ.
ބުރާސްފަތި ދުވަހުގެ ރޭ މާފަންނު މަދަރުސާގައި އޮތް ސައްލެގެ ކެމްޕޭން އިވެންޓްގައި ވާހަކަ ދައްކަވަމުން ނަހުލާ ވިދާޅުވީ ސަލީމަކީ ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހްގެ ތާއީދު ލިބިވަޑައިގެންފައިވާ ބޭފުޅެއް ކަމަށާއި ހޯރަފުށީ ދާއިރާގެ ހުރިހާ ރައްޔިތުން އަތުކުރި އޮޅާލައިގެން ސައްލެއަށް ވޯޓް ދެއްވުމަށް އެދިވަޑައިގަންނަވާ ކަމަށެވެ.
ސަލީމަށް ވޯޓް ދިނުމަށް ނަހުލާ ބުރާސްފަތި ދުވަހުގެ ރޭ އެދިވަޑައިގެންފައިވާއިރު މީގެ ކުރިން ވެސް ސަލީމަށް ވޯޓް ދިނުމަށް އަކަމަނާ ވަނީ އެދިވަޑައިގެންފައެވެ. ހޯރަފުށީ އެއާޕޯޓުގެ އަމަލީ މަސައްކަތް ފެށުމުގެ އެއްބަސްވުމުގައި ސޮއިކުރުމުގެ ރަސްމިއްޔާތަށް ހޯރަފުއްޓަށް ވަޑައިގެން އެކަމަނާ ވިދާޅުވީ ހޯރަފުށީ ދާއިރާއަށް ވާދަކުރައްވާ ކެންޑިޑޭޓުންގެ ތެރެއިން ތާއިދު ކުރައްވަނީ ސަލީމަށް ކަމަށެވެ. އަދި ސައްލެއަކީ ހޯރަފުއްޓަށް ކުރިއެރުން ގެންނަވާނެ ގާބިލު ބޭފުޅެއް ކަމަށާއި އެކަމަނާގެ އެދުމަކީ ބޮޑު އަގުލަބިއްޔަތަކުން އެ ދާއިރާގެ މެމްބަރު ކަމަށް ސައްލެ އިންތިހާބު ކޮށްދިނުން ކަމަށް ވެސް އައިޝާ ވިދާޅުވިއެވެ.
ބުރާސްފަތި ދުވަހުގެ ރޭ ބޭއްވި ކެމްޕޭން އިވެންޓްގައި ސައްލެއަށް ތާއިދުކުރާ ގިނަ އަދަދެއްގެ ރައްޔިތުން ވަނީ ބައިވެރިވެފައެވެ.
