ރައްޔިތުންގެ މަޖިލީހުގެ އިންތިހާބު ސަރުކާރުން ބޮޑުތަނުން ކާމިޔާބު ކުރާނެ ކަމަށާއި "އެންމެންގެ ވޯޓު ތިލަފަތަށް" ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިލްތިމާސް ކުރައްވައިފިއެވެ.

"އެންމެންގެ ވޯޓު ތިލަފަތަށް" ދިނުމަށް ރައީސް ސޯލިހު އިލްތިމާސް ކުރެއްވީ މަޖިލިސް އިންތިހާބުގެ ކެމްޕެއިން ހަރަކާތް ނިންމާލުމުގެ ކުރިން ބުރާސްފަތި ދުވަހުގެ ރޭ އެމްޑީޕީން ބޭއްވި "އެންމެންގެ ވޯޓު ތިލަފަތަށް" ޖަލްސާގައެވެ.

ރައްޔިތުންގެ މަޖިލީހުގައި 25 އަހަރު ހޭދަ ކުރެއްވިކަން ފާހަގަ ކުރައްވައި ރައީސް ސޯލިހު ވިދާޅުވީ ހަލަބޮލިކަމާ އެކު މަޖިލީހުގައި ކަން ހިންގާ ގޮތް އެނގިވަޑައިގަންނަވާ ކަމަށެވެ. ކުރިއަށް ވަޑައިގަންނަވާނެ އެތައް މަގެއް އޮތް ނަމަވެސް، އެއްވެސް ކިލަނބުކަމެއް ނެތި، ބަރުލަމާނީ ހަޔާތް ނިންމަވާނެ މެމްބަރުން އިންތިހާބު ކުރުމަށް ރައީސް ސޯލިހު ވަނީ އިލްތިމާސް ކުރައްވާފައެވެ.

"މަދު ބައެއްގެ މަސްލަހަތު އިސްކޮށް ވެރިކަމުގެ ނިޒާމު ގަޑުބަޑު ކުރުމަށް ފުރުސަތު ނުދޭނެ މެމްބަރުން އިންތިހާބު ކުރަން އެބަޖެހޭ. ލޮބުވެރި އެންމެހާ ރައްޔިތުންގެ ކިބައި އަޅުގަނޑު އެދެނީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ސަރުކާރަށް ބޮޑުތަނުން މެޖޯރިޓީ ދިނުން. މި ވޭތުވެދިޔަ ދުވަސްތަކުގައި ކެމްޕެއިން ދަތުރުތަކުންނާއި ބައްދަލުވުންތަކުން އަޅުގަނޑަށް ޔަގީންވެ، ސާފުވެގެން ދިޔައީ ވަރަށް ގިނަ ރައްޔިތުން ތިބި ސަރުކާރަށް މި އިންތިހާބު ކާމިޔާބުކޮށްދިނުމަށް ކެތް މަދުވެފައި ކަން. އިރާދަ ކުރެއްވިއްޔާ މި އިންތިހާބު އަޅުގަނޑުމެން ބޮޑުތަކުން ކާމިޔާބު ކުރާނަން. އެންމެންގެ ވޯޓު ތިލަފަތަށް ދެއްވާ،" ރައީސް ސޯލިހު ވިދާޅުވިއެވެ.

ރައީސް ވިދާޅުވީ ފައިސާ އާއި ނުފޫޒަށް ނުގުޑާނެ މީހުން އިންތިހާބު ކުރަންޖެހޭ ކަމަށާއި ވެރިކަމުގެ ނިޒާމު ގަޑުބަޑު ކުރާނެ ބަޔަކު މަޖިލީހަށް އިންތިހާބު ކޮށްގެން ނުވާނެ ކަމަށެވެ.

ރިޔާސީ އިންތިހާބުގައި އެމަނިކުފާނަށް ރައްޔިތުން ވޯޓު ދިން ސަބަބު ހަނދާން ނައްތާ ނުލައްވާނެކަން ތަކުރާރު ކުރައްވަމުން ރައީސް ސޯލިހު ވިދާޅުވީ މި ސަރުކާރުގައި އެއްވެސް ރައްޔިތަކު ބާކީ ނުކުރާނެ ކަމަށެވެ.

ވެރިކަމާ ހަވާލުވިއިރު، ދައުލަތުން އޮތީ "ގަޑުބަޑު"ކޮށްފައި ކަމަށާއި ގާނޫނުގެ ވެރިކަމަކީ ނެތް އެއްޗަކަށް ހަދާފައިވާ ކަމަށް ރައީސް ވިދާޅުވިއެވެ. ނަމަވެސް އާ ސަރުކާރުގެ ކުޑަ ދުވަސްކޮޅެއްގެ ތެރޭގައި ރައްޔިތުންގެ ދިރިއުޅުމަށް "ހެޔޮ ބަދަލެއް" ގެނެސްދެވިފައިވާ ކަމަށް ވިދާޅުވިއެވެ. އެގޮތުން ސަރުކާރުގެ މަސައްކަތުގެ 100 ދުވަހުގެ ތެރޭގައި ފުއްދިފައިވާ ވައުދުތައް ރައީސް ފާހަގަ ކުރެއްވިއެވެ.

ވެރިކަމާ ހަވާލުވެވަޑައިގަތުމަށް ފަހު ރައްޔިތުންގެ މަޖިލީހަށް 23 ބިލެއް ފޮނުއްވެވި ކަމަށާއި އޭގެ ތެރެއިން މިހާތަނަށް ފާސްކޮށްފައި ވަނީ އަށް ބިލު ކަމަށް ރައީސް ވިދާޅުވިއެވެ. އެއީ އުންމީދު ކުރި ގޮތެއް ނޫން ކަމަށް ވިދާޅުވިއެވެ.

ސަރުކާރުގެ މެޖޯރިޓީ މިހާރު ހިނގަމުންދާ މަޖިލީހުގައި އޮތީ "ނަމެއްގައި" ކަމަށާއި އަލަށް އިންތިހާބުކުރާ މަޖިލީހުގައި އެފަދަ ގޮތަކަށް މެޖޯރިޓީ ލިބިއްޖެ ނަމަ ވައުދުތައް ފުއްދުމަށް ދަތިތަކެއް ކުރިމަތިވެދާނެ ކަމަށް ރައީސް ވިދާޅުވިއެވެ. އަލަށް އިންތިހާބު ކުރާ މަޖިލީހަށް ހޮއްވަން ޖެހޭނީ ސަރުކާރުގެ ސިޔާސަތުތައް ދަންނަ، އެ ސިޔާސަތުތަކަށް ތާއިދު ކުރާ މެމްބަރުން ކަމަށް ރައީސް ސޯލިހު ވިދާޅުވިއެވެ. އަދި ވިދާޅުވީ މަޖިލީހުގެ އިންތިހާބަށް ވާދަކުރައްވާ އެމްޑީޕީގެ ކެންޑިޑޭޓުންނަކީ ސަރުކާރުގެ ސިޔާސަތުތައް ދަންނަ، އެ ސިޔާސަތުތަކަށް ފުރިހަމައަށް ތާއީދުކުރައްވާ މެމްބަރުން ކަމަށެވެ.

""މިކަމުން ދޭހަވަނީ މަޖިލީހުގައި މެޖޯރިޓީ ނަމެއްގައި އޮތް ނަމަވެސް، އަޅުގަނޑުމެންވީ ވައުދުތައް ފުއްދުމަށް ދަތިތަކާ ކުރިމަތިވެދާނެކަން. އެހެންކަމުން އަޅުގަނޑު ހަމަ ގައިމު ވެސް އަޅުގަނޑު ބޭނުންވަނީ ހުރިއަށް އޮތް މަޖިލީހުގައި  ތިބެންވާނީ މި ސިޔާސަތުތައް ދަންނަ ހިތުގެ އަޑިން އެ ސިޔާސަތުތައް ގަބޫލުކުރާ މެމްބަރުން," އެމްޑީޕީގެ ލީޑާޝިޕްގެ އިސް ބޭފުޅުން ބައިވެރިވެވަޑައިގެންނެވި ޖަލްސާގައި ރައީސް ވިދާޅުވިއެވެ.