އިންފުލުއެންޒާ ރޯގާ އިތުރުވާނެތީ ވެކްސިން ޖަހަން އިލްތިމާސް ކޮށްފި: އެޗްޕީއޭ
4 އެޕްރީލު 2019 | ބުރާސްފަތި 13:15އިންފުލުއެންޒާ ވެކްސިނަކީ ކޮންމެ އަހަރަކު ވެސް ޖަހަން ޖެހޭ ވެކްސިނެއް
އިންފުލުއެންޒާ ވެކްސިން
ކުރިއަށް އޮތް ދުވަސްވަރު އިންފުލުއެންޒާ ރޯގާ އިތުރުވާނެ ކަމަށް ލަފާކުރެވޭތީ، ރައްކާތެރިވުމަށް ޖަހަންޖެހޭ ވެކްސިން ޖެހުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ އިން) އިލްތިމާސް ކޮށްފިއެވެ.
އެޗްޕީއޭއިން ބުރާސްފަތި ދުވަހު ނެރެފައިވާ ބަޔާނުގައި ބުނެފައި ވަނީ އިންފުލުއެންޒާ ވެކްސިނަކީ ކޮންމެ އަހަރަކު ވެސް ޖަހަން ޖެހޭ ވެކްސިނެއް ކަމަށާއި އިންފުލުއެންޒާ ވައިރަހަކީ ކޮންމެ އަހަރަކު ވެސް ބަދަލުތަކެއް އަންނަ ވައިރަހެއް ކަމަށެވެ. އަދި ވަކިން ހާއްސަކޮށް އިންފުލުއެންޒާ ޖެހިގެން ނުރައްކާވާ ފަރާތްތަކުން އެކަމަށް ހާއްސަ ސަމާލުކަމެއް ދިނުމަށް ވެސް އެޗްޕީއޭ އިން އިލްތިމާސް ކޮށްފައި ވެއެވެ.
އެކި ސަބަބުތަކާ ހުރެ ގުނަވަން ބަދަލުކޮށްފައިވާ ފަރާތްތަކާއި، ކެންސަރު ބައްޔަށް ފަރުވާ ކުރަމުންދާ ނުވަތަ ފަރުވާ ފުރިހަމަ ކޮށްފައިވާ ފަރާތްތަކުގެ އިތުރުން، ނޭވާލާ ނިޒާމުގެ ބައްޔަކަށް ފަރުވާ ކުރަމުންދާ ތިން އަހަރަށް ވުރެ މަތީ މީހުން، ޑަޔާލިސިސް ހަދަމުންދާ މީހުން، އުމުރުން 65 އަހަރަށް ވުރެ މަތީ މީހުންނާއި ހަ މަހާއި ހަ އަހަރާ ދެމެދު ކުދިން އަދި ދާއިމީ ބަލިތަކަށް ބޭސްކާ މީހުންނަކީ އިންފުލުއެންޒާ ޖެހިގެން ނުރައްކާވާ ފަރާތްތަކުގެ ތެރޭގައި ހިމެނޭ ފަރާތްތަކެވެ.
އެޗްޕީއޭ އިން ބުނެފައިވާ ގޮތުގައި އެސްޓީއޯ އާއި އޭޑީކޭ ފާމަސީން ވެސް ވެކްސިން ލިބެން ހުންނާނެއެވެ.
