އެމްޑީޕީގެ ކެންޑިޑޭޓް ޖީހާނަށް ތާއީދު ހޯއްދެވުމަށް ޓްރާންސްޕޯޓް މިނިސްޓަރު ހިންނަވަރަށް!
ޖީހާން އަށް ތާއީދު ހޯއްދެވުމުގެ ހަރަކާތްތަކުގައި އައިޝާ ބައިވެރިވެ ވަޑައިގަންނަވާނެ
ޓްރާންސްޕޯޓް މިނިސްޓަރު އައިޝަތު ނަހުލާ ހިންނަވަރަށް ފުރާ ވަޑައިގަތުމުގެ ކުރިން
ޖުމްހޫރީ ޕާޓީގެ ސްލޮޓްގައި ޓްރާންސްޕޯޓް މިނިސްޓަރު ކަމަށް ވަޑައިގެންނެވި، އަދި އެ ޕާޓީގެ ލީޑަރު ގާސިމް އިބްރާހީމްގެ އަނބިކަނބަލުން އައިޝަތު ނަހުލާ އެމްޑީޕީގެ ކެމްޕޭނު ހަރަކާތެއްގައި ބައިވެރިވެ ވަޑައިގަތުމަށް ޅ. ހިންނަވަރަށް ފުރާ ވަޑައިގަންނަވައިފިއެވެ.
އެމްޑީޕީގެ ފަރާތުން ހިންނަވަރު ދާއިރާ އަށް ކުރިމަތިލައްވާފައިވާ ޖީހާން މަހްމޫދަށް ތާއީދު ހޯއްދެވުމަށް އައިޝާ ހިންނަވަރަށް ފުރާވަޑައިގެންފައި ވަނީ މިއަދު މެންދުރުއެވެ. ކެމްޕޭނު ދަތުރު ނިންމަވާލެއްމަށް ފަހު މިނިސްޓަރު މާލެ ވަޑައިގަންނަވާނީ ހަވީރުގެ ވަގުތެއްގައެވެ.
ޓްރާންސްޕޯޓް މިނިސްޓަރު ހިންނަވަރަށް ފުރާވަޑައިގަތުމުގެ ކުރިން
މިނިސްޓަރުގެ މި ދަތުރުފުޅުގައި ޖީހާނަށް ތާއީދު ހޯއްދެވުމަށް ހިންނަވަރުގައި މިއަދު ބާއްވާ ހަރަކާތްތަކުގައި ބައިވެރިވެ ވަޑައިގަންނަވާނެއެވެ.
ޖީހާންގެ ކެމްޕެއިންގައި މިނިސްޓަރު އައިޝާ ބައިވެރިވެ ވަޑައިގަންނަވާ އިރު ޖޭޕީން ރަސްމީކޮށް ތާއީދުކުރަނީ އެ ދާއިރާ އަށް ޕީއެންސީ ކޯލީޝަންގެ ފަރާތުން ވާދަކުރައްވާ ކުރީގެ ހެލްތު މިނިސްޓަރު އަބްދުﷲ ނާޒިމަށެވެ.
އެކަމަނާ ވަނީ މީގެ ކުރިން އެމްޑީޕީ ޓިކެޓްގައި ހޯރަފުށީ ދާއިރާ ވާދަކުރައްވާ އަހުމަދު ސަލީމް (ސައްލޭ)ގެ ކެމްޕޭން ޖަލްސާގައި ވެސް ބައިވެރިވެވަޑައިގެން ކެމްޕޭނު ކޮށްދެއްވާފައެވެ. މިނިސްޓަރު އައިޝާ ވިދާޅުވެފައި ވަނީ އެކަމަނާ ދުވަހަކު ވެސް ކުރީގެ ރައީސް އަބްދުﷲ ޔާމީނަށް މައާފްނުކުރައްވާނެ ކަމަށާއި އަދި ޔާމީންގެ ފަރާތުން ވާދަކުރާ ކެންޑިޑޭޓަކަށް ތާއީދު ވެސް ނުކުރައްވާނެ ކަމަށެވެ.
ޓްރާންސްޕޯޓް މިނިސްޓަރު އާއިޝަ އަށް އެމްޑީޕީގެ ހިންނަވަރު ކެންޑިޑޭޓް ޖީހާން މަރުހަބާ ދަންނަވަނީ
އެމްޑީޕީން ކޯލިޝަންގެ އެއްބަސްވުމާ ހިލާފުވި ކަމަށް ބުނެ، ކުރީގެ ރައީސް އަބްދުﷲ ޔާމީންއާ އެކު މަޖިލީސް އިންތިހާބަށް މަސައްކަތް ކުރުމަށް ޖޭޕީގެ ލީޑަރު ގާސިމް ނިންމެވުމުން އެ ޕާޓީގެ ތެރޭގައި ވަނީ ހިޔާލު ތަފާތުވުމާއި ނުތަނަވަސް ކަން އިތުރުވެފައެވެ. އެ ނިންމުމަކީ ޖޭޕީގެ ކައުންސިލްގެ މެދުގައި ވޯޓެއް ނަގައިގެން ނިންމި ނިންމުމެއް ނޫން ކަމަށް އެ ޕާޓީގެ ރައީސް އަދި ޓޫރިޒަމް މިނިސްޓަރު އަލީ ވަހީދު ވެސް ވަނީ ވިދާޅުވެފައެވެ.
މިނިސްޓަރު އަލީ ވަހީދުއާ އެންވަޔަރަމެންޓް މިނިސްޓަރު ޑރ. ހުސެއިން ރަޝީދު ހަސަން ވެސް ގެންދަވަނީ އެމްޑީޕީގެ ކެމްޕޭނުތަކުގައި ފާޅުކަން ބޮޑު ގޮތެއްގައި ބައިވެރިވެވަޑައިގަންނަވަމުންނެވެ. އަދި އެ ޕާޓީގެ ކުރީގެ ސެކްރެޓަރީ ޖެނެރަލް އަދި ރައީސް އޮފީހުގެ މިނިސްޓަރު އަހްމަދު ސަމީރު ވެސް ގެންދަވަނީ އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމަށް ދަތުރުތައް ކުރައްވަމުންނެވެ.
މީގެ އިތުރުން ނައިބު ރައީސް ފައިސަލް ނަސީމް ވެސް ވަނީ އެމްޑީޕީ ކެންޑިޑޭޓުންގެ ކެމްޕޭނުތަކުގައި ބައިވެރިވެ ވަޑައިގަންނަވަމުންނެވެ. ދާދި ފަހުން އެމްޑީޕީގެ ޓިކެޓްގައި ހުޅުމާލޭ ދާއިރާ އަށް ކުރިމަތިލައްވާފައިވާ އަލީ ނިޔާޒު ކެމްޕޭނު ޖަލްސާއެއްގައި ނައިބު ރައީސް ވަނީ ނުސީދާ ގޮތަކަށް ގާސިމަށް ވެސް ފާޑު ވިދާޅުވެ އެމްޑީޕީގެ ސިޔާސަތުތަކަށް ތާއިދުކުރައްވާފައެވެ.
