ބޮލީވުޑްގެ އަރަމުން އަންނަ ތަރި ވިކީ ކައުޝަލް ހުރީ ސިންގަލްކޮށް ކަމަށް އޭނާ ބުނެފިއެވެ.
އެޗްޓީ އިންޑިއާސް މޯސްޓް ސަޓައިލިޝް އެވޯޑް ހަފްލާގައި އޭނާގެ ލޯބީގެ ހަޔާތާ ގުޅޭ ގޮތުން ކުރި ސުވާލުގެ ޖަވާބުގައި އޭނާ ހުރީ ސިންގަލް ކޮށް ކަމަށް ތަކުރާރުކޮށް ވަނީ ބުނެފައެވެ.
ވިކީ އާއި އެކްޓަރ އަދި ޑާންސަރ ހެރްލީން ސެތީ ރައްޓެހިވެގެން އުޅޭކަމުގެ އަޑު ކުރިން ވަނީ ފެތުރިގެން ގޮސްފައެވެ. އަދި ފިލްމް ފެއަރ އަށް ދިން އިންޓަވިއުއެއްގައި ވިކީ ވަނީ ހެރަލީން އާއި ރައްޓެހިވެގެން އުޅޭ ކަމަށް އެއްބަސް ވެސް ވެފައެވެ. މީގެ އިތުރުން "ކޮފީ ވިތު ކަރަން ޝޯގައި" ވެސް ވިކީ ވަނީ އޭނާ ހުރީ ހުސްކޮށް ނޫން ކަމަށް ބުނެފައެވެ.
މި އަހަރުގެ ޖެނުއަރީ މަހުގެ ތެރޭގައި ހެރްލީން ވެސް ވަނީ ވިކީ ކައުޝަލް ކުޅެފައިވާ ކާމިޔާބު ފިލްމް "އުރީ" ގެ ކާމިޔާބު ފާހަގަ ކުރުމަށް ބޭއްވި ޕާޓީގައި ދެ މީހުން އެކުގައި ނަގާފައިވާ ފޮޓޯއެއް ހިއްސާ ކޮށްފައެވެ. ފޮޓޯގައި ދެ މީހުން ކަޅުކުލައިގެ ޓީޝާޓު ލައިގެން ތިބި އިރު ޓީޝާޓްގައި ލިޔެފައި ވަނީ "އުރީ" ގެ ޕޮޕިއުލާ ޑައިލޮގެއް ކަމަށްވާ "ހައު އިސް ދަ ޖޯޝް" އެވެ. އެ ފޮޓޯގެ ކެޕްޝަންގައި ލިޔެފައި ވަނީ "ހައި ސަރ" އެވެ.
ނަމަވެސް ފަހުން ހެރްލީން ވަނީ އޭނާގެ އިންސްޓަގްރާމް އިން ވިކީ އަންފޮލޯ ކޮށްފައެވެ.
