އެމްޑީޕީގެ އަޣުލަބިއްޔަތު އޮންނަ ރައްޔިތުންގެ މަޖިލީހެއްގައި އެމެންބަރުން މަދުވެގެން 3 މަހުން އެއްފަހަރު ރައްޔިތުންނާ ބައްދަލުކުރާނެ ކަމަށް ހެންވޭރު ހުޅަނގުދާއިރާއަށް ވާދަކުރައްވާ އަދި އެމްޑީޕީގެ ޗެއާޕާސަން ހަސަން ލަތީފު ވިދާޅުވެއްޖެއެވެ.
އަންގާރަ ދުވަހުގެ ރޭ ބޭއްވި ކެންޕޭން ޖަލްސާގައި ވާހަކަ ދައްކަވަމުން ހަސަން ލަތީފު ވިދާޅުވީ ރައްޔިތުން އެންމެ ބޮޑަށް ކުރަމުން އަންނަ ޝަކުވާ އަކީ އެދާއިރާ ތަމްސީލު ކުރާ މެންބަރުންނާއި މަޖިލީހަށް އިންތިޚާބުވުމަށް ފަހު ދިމާ ނުވާކަމުގެ ޝަކުވާ ކަމަށެވެ. ނަމަވެސް 19 ވަނަ މަޖިލިސް އިންތިޚާބު އެމްޑީޕީއަށް ލިބިއްޖެނަމަ ރައްޔިތުންގެ މިޝަކުވާއަށް ނިމުން އަންނާނެ ކަމަށާއި، މަދުވެގެން ތިން މަހުން އެއްފަހަރު މެންބަރުން ތަމްސީލުކުރާ ރައްޔިތުންނާ ބައްދަލު ކުރާނެ ކަމުގެ ޔަގީންކަން އަރުވާ ކަމަށެވެ.
މެންބަރުންގެ ނަޒާހަތްތެރިކަމާ ބެހޭ ގޮތުން އަބަދު ވެސް ރައްޔިތުން ސުވާލުއުފައްދާކަން ފާހަގަ ކުރައްވައި ހަސަން ލަތީފު ވިދާޅުވީ އެމްޑީޕީގެ މެންބަރުން މާލީ ބަޔާން ހާމަކުރާނެ ކަމަށެވެ.
"އެމްޑީޕީން މާލީ ބަޔާން ހާމަކުރާނެ. އެކަން ކުރުމަކީ ގާނޫނުން ލާޒިމް ކުރާނެ ކަމެއްކަން. އަދި ހަމައެހެންމެ އެމާލީ ބަޔާން ހާމަނުކުރުން އެއީ ޖިނާއި ކުށެއް ގޮތުގައި އަޅުގަނޑުމެން ކަނޑައަޅާނަން.'' ހަސަން ލަތީފު ވިދާޅުވިއެވެ.
އެޖެންޑާ19 އަށް އަލިއަޅުއްވާލައްވާ ހަސަން ލަތީފު ވިދާޅުވީ ރައްޔިތުން އެންމެ ބޭނުންވެފައި ތިބި ބޯހިޔާވަހިކަމާއި، މަތީތައުލީމުގެ ފުރުސަތުތަކާއި، ލުއި ލޯނުތަކާއި، ވަޒީފާގެ ފުރުސަތުތައް ހަމަޖެހި ރައްޔިތުން އެދޭފަދަ ދިރިއުޅުމެއް ލިބޭނެ ކަމަށެވެ.
