ބޮލީވުޑްގެ ތަރި އަޖޭ ދޭވްގަން ގެ 50 ވަނަ އުފަން ދުވަހު އޭނާގެ އަންނަން އޮތް ފިލްމް "ދޭ ދޭ ޕްޔާރު ދޭ" ގެ ޓްރެއިލާ ރިލީޒް ކޮށްފި އެވެ.

މި ފިލްމްގެ ލީޑް ރޯލުން އަޖޭ އާއި އެކު ފެނިގެންދަނީ ތައްބޫ އާއި ރަކުލް ޕްރީތް ސިންގް އެވެ.

މި ޓްރެއިލާގައި އަޖޭ ފެނިގެން ދަނީ( 50 އަހަރުގެ ) ދެކުދިންގެ ބައްޕަ އެއް ޒުވާން ކުއްޖަކާއި ރައްޓެހިގެން އުޅޭ މަންޒަރެވެ.

ރަކުލް 26 އަހަރު ފެނިގެން ދަނީ އަޖޭގެ ލޯބިވެރިޔާގެ ރޯލުންނެވެ. އަދި ތައްބޫ ފެނިގެން ދަނީ އަޖޭގެ ކުރީގެ އަނބިމީހާގެ  ރޯލުންނެވެ.

މި ފިލްމަކީ "ހައުސްފުލް 3" އަށް ފަހު އަޖޭ އާއި ތައްބޫ އެކުގައި ފެނިގެންދާ ފިލްމެވެ.

 މި ފިލްމްގެ ދެވަނަ ބަތަލާ ރަކުލް އަޖޭއާއި ގުޅޭގޮތުން ބުނެފައިވަނީ އޭނާ އިންޑަސްޓްރީއަށް ވަރަށް އާ ކަމަށާއި ނަމަވެސް މި ފިލްމްގައި މަސައްކަތް ކުރިއިރު އަޖޭ އެކަން އޭނާއަށް އިހުސާސް ނުކޮށްދޭ ކަމަށެވެ. އަދި މި ފިލްމަކީ ވަރަށް މަޖާ ފިލްމެއް ކަމަށާއި ޗޫޓިންތައް ދިޔައީ ވަރަށް ހިތްހަމަޖެހޭ ގޮތަށް ކަމަށެވެ.

ޓީ ސީރީސް އަދި ލަވް ފިލްމްސް ގުޅިގެން ޕްރޮޑިއުސް ކޮށްފައިވާ މި ފިލްމް ޑައިރެކްޓް ކޮށްފައިވަނީ އާކިވް އަލީ އެވެ. "ދޭދޭ ޕްޔާރުދޭ" ރިލީޒް ކުރުމަށް ހަމަޖެހިފައިވަނީ މިއަހަރުގެ މެއި މަހުގެ 17 ގައެވެ.