އިންތިޚާބީ ޝަކުވާތައް ރެޖިސްޓަރ ކުރުމަށް ހޮނިހިރު ދުވަހު ހައިކޯޓް ހުޅުވަން ނިންމައިފި
2 އެޕްރީލު 2019 | އަންގާރަ 06:08ނަތީޖާ ހާމަކުރާތާ 14 ދުވަހުގެ ތެރޭގައި މައްސަލަ ހުށަހަޅަން ޖެހޭ
ދިވެހިރާއްޖޭގެ ހައިކޯޓު
މި ހަފްތާގެ ހޮނިހިރު ދުވަހު ދިވެހިރާއްޖޭގައި ބާއްވާ ޤާނޫނޫ ހަދާ މަޖިލީހުގެ އިންތިޚާބާއި ގުޅޭ އިންތިޚާބީ ޝަކުވާގެ މައްސަލަތައް ހުށަހެޅުމަށް ފަސޭހަ ކުރުމުގެ ގޮތުން ހޮނިހިރު ދުވަހު ހައިކޯޓުގެ ރެޖިސްޓްރޭޝަން ހުޅުވަން ނިންމައިފިއެވެ.
ހައި ކޯޓުން ބުނީ، ހޮނިހިރު ދުވަހު އެކޯޓުގެ ރެޖިސްޓްރޭޝަން ހުޅުވާފައި ބެހެއްޓުމަށް ނިންމީ، އިންތިޚާބީ ޝަކުވާގެ މައްސަލަތައް ހުށަހެޅުމަށް ބޭނުންވާ ފަރާތްތަކަށް އެކަން ފަސޭހަ އިން ކުރެވޭނެ އިންތިޒާމު ހަމަޖެއްސުމަށްޓަކައި ކަމަށެވެ. އެގޮތުން އޭޕްރީލް 6 ވަނަ ދުވަހުގެ ހެނދުނު 8:00 އިން އެރޭ ރޭގަނޑު 10:00 އަށް ހައި ކޯޓުގެ ރެޖިސްޓްރޭޝަން ހުޅުވިފައި ހުންނާނެކަން އެ ކޯޓުން ވަނީ ހާމަކޮށްފައެވެ.
ހައި ކޯޓުން ބުނީ، އިންތިޚާބީ ޝަކުވާގެ މައްސަލަތައް ބެލުމުގެ އިޚްތިޞާޞް ލިބިދީފައި ވަނީ ދިވެހިރާއްޖޭގެ ހައިކޯޓަށް ކަމަށާއި، އިންތިޚާބުގައި ވޯޓުލުމުގެ ހައްޤު ލިބިގެންވާ ރައްޔިތުންނާއި، އިންތިޚާބުގައި ވާދަކުރާ ކެންޑިޑޭޓުންނާއި، ސިޔާސީ ޕާޓީތަކާއި، އޮބްޒަރވަރުންނާއި އަދި މޮނީޓަރުންގެ އިތުރުން އިންތިޚާބާ ބެހޭ ކަންކަން ހިންގައި ބަލަހައްޓާ އޮފިޝަލުންނަށް ވެސް އިންތިޚާބީ ޝަކުވާގެ މައްސަލަތައް ހައިކޯޓަށް ހުށަހެޅޭނެ ކަމަށެވެ.
ހައިކޯޓުން ބުނީ، އިންތީޚާބީ މައްސަލަތައް ހުށަހަޅާނީ އިންތިޚާބީ ޝަކުވާގެ މައްސަލަތަށް ހުށަހަޅާ ފޯމު މެދުވެރިކޮށް ކަމަށެވެ. އަދި ދިވެހިރާއްޖޭގެ ހައިކޯޓު ހުޅުވާފައި ހުންނަ ގަޑިތައް ފިޔަވައި އެހެން ގަޑިއެއްގައި މި ފަދަ މައްސަލައެއް ހުށަހަޅާ ނަމަ، ހައިކޯޓުގެ ރެޖިސްޓްރޭޝަނާއި ގުޅައިގެން އެކަން ކުރިއަށް ގެންދެވޭނެ ކަމަށް ވެސް ހައިކޯޓުން މައުލޫމާތުދެއެވެ.
މީގެ އިތުރުން އިންތިޚާބީ މައްސަލަތަކާއި ގުޅިގެން ހައިކޯޓާއި މުޢާމަލާތު ކުރުމަށް elections@highcourt.gov.mv އަށް އީމެއިލް ކުރުމުން ހައިކޯޓުން އީމެއިލް ކުރި ފަރާތާއި ގުޅައި، އެކަން އޮތްގޮތެއް ސާފުކޮށްދޭނެ ކަމަށް ވެސް ހައިކޯޓުން ވަނީ ބުނެފައެވެ.
އިންތިޚާބީ މައްސަލަތައް ހުށަހަޅާ ފަރާތްތަކުން މައްސަލަ ހުށަހެޅުމަށް ބޭނުންވާ ހުރިހާ މައުލޫމާތެއް ފުރިހަމަކޮށް، މައްސަލައިގެ ލިޔުންތަކާ އެކު މައްސަލަ ހުށަހެޅުމަށް ސަމާލުކަން ދިނުމަށް ހައިކޯޓުން ވަނީ އިލްތިމާސް ކޮށްފައެވެ. އެގޮތުން މައްސަލަ ހުށަހަޅާ ސަބަބާއި، އެކަމުގެ ތަފްސީލް އަދި މައްސަލައާ ގުޅޭ ހެކިތައް ހުށަހެޅުމަށް ސަމާލުކަން ދިނުމަށް ހައިކޯޓުން ވަނީ އިލްތިމާސްކޮށްފައެވެ.
ހައިކޯޓުން ބުނީ އިންތިޚާބީ ޝަކުވާގެ މައްސަލަތައް ހުށަހަޅާ ފޯމްތައް، ހައިކޯޓުގެ ވެބްސައިޓުން ޑައުންލޯޑް ކުރެވޭނެ ކަމަށެވެ.
އިންތިޚާބީ މައްސަލަތައް ހައިކޯޓަށް ހުށަހެޅުމަށް ޤާނޫނުގައި ކަނޑައަޅާފައިވާ މުއްދަތަކީ، އިންތިޚާބުގެ ރަސްމީ ނަތީޖާ އިޢުލާން ކުރާ ދުވަހުން ފެށިގެން 14 ދުވަހެވެ. އަދި ރަސްމީ ނަތީޖާ އިޢުލާން ކުރާ ދުވަހުން ފެށިގެން 30 ދުވަހުގެ ތެރޭގައި އިންތިޚާބީ ހުރިހާ މައްސަލައެއް ބަލާ ނިންމަން ޖެހެއެވެ.
