ހއ. ދިއްދޫ އަތޮޅު ހޮސްޕިޓަލް ޓާރޝަރީ ފެންވަރަށް ތަރައްޤީ ކުރުމަށް ސަރުކާރުން ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ތިލަދުންމަތީގެ ދާއިރާތަކުން މަޖިލީހަށް ކުރިމަތިލާފައިވާ އެމްޑީޕީގެ ކެންޑިޑޭޓުންގެ ކެމްޕެއިން ޖަލްސާގައި އާދިއްތަ ދުވަހުގެރޭ ވާހަކަފުޅު ދައްކަވަމުން ރައީސް ވިދާޅުވީ، ހޮސްޕިޓަލްގެ ފެންވަރު ރަނގަޅުކުރަން ކުރިން ވައުދުވެވަޑައިގެންފައި ވާނެ ކަމަށާއި، އެ ވައުދާ އެއްގޮތަށް ދިއްދޫގެ ހޮސްޕިޓަލް ޓާޝަރީ ހޮސްޕިޓަލަކަށް ބަދަލުކުރެވިގެން ދާނެ ކަމަށެވެ.
" ހޮސްޕިޓަލް ތަރައްޤީކޮށް އަޅުގަނޑުމެން ވެފައިވާ ވައުދާ އެއްގޮޮތަށް މިރަށު ހޮސްޕިޓަލް ޓާރޝަރީ ހޮސްޕިޓަލަކަށް ބަދަލުކުރެވިގެން ވެސް ދާނެ،" ރައީސް ސޯލިހު ވިދާޅުވިއެވެ.
ރައީސް އިތުރަށް ވިދާޅުވީ، އަސާސީ ގިނަ ހައްޤުތަކުން ރައްޔިތުން މަހްރޫމް ކުރެވިފައިވާ ކަމަށާއި، ސާފު ބޯފެނާއި، ނަރުދަމާގެ ނިޒާމާއި، ރައްކާތެރި ގޮތުގައި ކުނި ނައްތާލެވޭނެ ނިޒާމެއްވެސް ނެތްކަމަށާއި އަދި އެއީ ކަންބޮޑުވާންޖެހޭ ކަމެއް ކަމަށެވެ. އޭގެ އިތުރުން، ދިއްދޫގައި ރަސްމީ ފާލަން އެޅުމަށް ބަޖެޓްގައި ހިމަނާ އެ ފާލަން ޑިޒައިން ކުރުމުގެ މަސައްކަތް ކުރިއަށްދާ ކަމަށާއި އެ ރަށުގައި ފުޓްބޯޅަ ދަނޑު އެޅުމުގެ މަސައްކަތް ފެށިގެންދާނެ ކަމަށްވެސް އެމަނިކުފާނު ވިދާޅުވިއެވެ.
މި ދަތުރުފުޅަކީ ރިޔާސީ އިންތިހާބަށް ފަހު އެމަނިކުފާނު ތިލަދުންމައްޗަށް އަދި ދިއްދޫއަށް ކުރެއްވި ފުރަތަމަ ދަތުރުފުޅެވެ.
