މާލޭގައި އިމާރާތް ކުރަމުންދިޔަ މައްޗަންގޯޅީ ގެއެއްގެ 5 ވަނަ ބުރިން ދަގަނޑު ހޮޅިއެއް ވެއްޓިއްޖެއެވެ. 

އެކަމާގުޅޭގޮތުން ފުލުހުން ބުނީ، މިހާދިސާ ހިގާފައިވަނީ އާދިއްތަ ދުވަހު ހަވީރު 17:35 ހާއިރު ކަމަށާއި، ވެއްޓުނު ދަގަނޑު ހޮޅީގެ ދިގުމިނުގައި 15 ފޫޓު އަދި ފުޅާ މިނުގައި 2 އިންޗި ހުރި ކަމަށެވެ. އަދި ހޮޅި ވެއްޓި ޖެހިފައިވަނީ އެސަރަހައްދުގައި ހުރި 2 ސައިކަލެއްގެ މަޑިމަތީގައި ކަމަށް ވެސް ފުލުހުން ބުނެފައިވެއެވެ. 

ފުލުހުން އިތުރަށް ބުނީ، ސައިކަލް ތަކަށް ގެއްލުމެއް ލިބިފައިނުވާ ކަަމަށާއި، އެކަމާ ގުޅިގެން ފުލުހުން އެހާދިސާ ހިނގި ސަރަހައްދަށް ގޮސް ސިޓީ ކައުންސިލާއި، ހައުސިން މިނިސްޓްރީއަށް ވަގުތުން އެކަން އަންގާފައިވާ ކަމަށެވެ. އަދި ސިޓީ ކައުންސިލުން ވަގުތުން އެ ސަރަހައްދަށް އައި ކަމަށާއި، އެހާދިސާއާ ގުޅިގެން އިމާރާތުގެ މަސައްކަތް ހުއްޓުާފައިވާ ކަމަށެވެ. 

ފުލުހުން މި މައްސަލަ އިތުރަށް ތަހުޤީޤު ކުރަމުންދާއިރު، މިފަހަކަށް އައިސް މިފަދަ ހާދިސާތައް ހިނގާ މިންވަރު ވަނީ އިތުރުވެފައެވެ. އެގޮތުން ދާދި ފަހުން ވެސް ވަނީ ހުޅުމާލޭގައި ހަދަމުން ދިޔަ އިމާރާތަކުން ވެއްޓުނު ގަލަކުން ޖެހުމުގެ ސަބަބުން ބިދޭސީއަކު ނިޔާވެފައެވެ. އަދި ފާއިތުވި އަހަރުގެ ޑިސެމްބަރު މަހުގައި މާލޭގައި ހަދަމުން ދިޔަ އިމާރާތަކުން ސިމެންތި ބަސްތާއެއް ވެއްޓުމުގެ ސަބަބުން ރައުޝަން ޖިއާން ނަމަކަށް ކިޔާ ބަނގްލަދޭޝް އަންހެން ކުއްޖަކު ވަނީ ނިޔާވެފައެވެ. 

އެފަދަ ހާދިސާތައް ހިނގާ މިންވަރު އިތުރުވުމާ ގުޅިގެން ސަލާމަތާއި ރައްކާތެރިކަމުގެ ގޮތުން އާ ފިޔަވަޅުތައް އަޅައި، ގަވާއިދާ ހިލާފު އަމަލެއް ކޮށްފި ނަމަ ބައި މިލިއަން ރުފިޔާއިން ޖޫރިމަނާ ކުރެވޭ ގޮތަށް އިމާރާތްކުރުމުގެ އަމަލީ މަސައްކަތް ކުރުމުގައި ގެންގުޅެންޖެހޭ ސަލާމަތީ މިންގަނޑުތަކުގެ ގަވާއިދަށް ދާދި ފަހުން ވަނީ އަމަލުކުރަން ފަށާފައެވެ.