އިންތިޚާބު ފަސްކުރަން އުޅޭ ކަމުގެ ޚަބަރު އެބަ ލިބޭ، އެކަމަށް އީސީ އިން ތައްޔާރު: ޝަރީފް
31 މާރިޗު 2019 | އާދީއްތަ 08:30އިންތިޚާބު ފަސްކޮށްފި ކަމުގައިވާ ނަމަ 20 މިލިއަން ރުފިޔާ އިތުރަށް ޚަރަދުވާނެ
އީސީ އިން ބޭއްވި ޕްރެސް
ކުރިއަށް އޮތް ރައްޔިތުންގެ މަޖިލީހުގެ އިންތިޚާބު ފަސްކުރަން އުޅޭ ކަމުގެ ޚަބަރު އިލެކްޝަންސް ކަމިޝަން (އީސީ) އަށް ލިބިފައިވާ ކަމަށާއި އެކަމަށް އެކަމިޝަނުން އޮތީ ތައްޔާރަށް ކަމަށް ކަމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.
އިންތިޚާބާ ބެހޭ މައުލޫމާތު ދިނުމަށް އީސީގައި ބޭއްވި ނޫސްވެރިންގެ ބައްދަލުވުމެއްގައި ޝަރީފު ވިދާޅުވީ އިންތިޚާބު ފަސްކުރަންޖެހޭ ގާނޫނީ އެއްވެސް ހުއްޖަތެއް ނޯންނާނެ ކަމަށެވެ. އިންތިޚާބު ބާއްވަން 99 ޕަސެންޓް އީސީ އިން ނިމިފައިވާއިރު ގާނޫނުގައިވާ ގޮތަށް އެއަށް ސަމާލުކަން ދީގެން ކަމަށް ޝަރީފު ވިދާޅުވިއެވެ. އަދި ކުރިމަތިލާފައިވާ ކެންޑިޑޭޓުންނަށް ގާނޫނުގައި ކަނޑައެޅިފައިވާ މުއްދަތު ދީފައިވާނެ ކަމަށާއި އޭގެ ޒިންމާ އީސީއިން އުފުލަން ނުޖެހޭނެ ކަމަށް ވިދާޅުވިއެވެ .އަދި މިހާތަަނަށް އެއްވެސް ކޯޓަކަށް އެފަދަ މައްސަލައެއް ހުށަހަޅާފައިވާ ކަމުގެ ލިޔުމެއް ލިބިފައި ނުވާ ކަމަށް ޝަރީފު ވިދާޅުވިއެވެ.
"އަޅުގަނޑުމެންނަށް މައުލޫމާތު ލިބެމުން އެބަދޭ ރިޒޯޓްތަކުގެ ތެރެއިން ބައެއް ފަރާތްތަކަށް ރީ ރެޖިސްޓްރީކުރުމުގެ ފުރުސަތު ހުޅުވާލެވިފައި ނުވާތީވެ އެފަރާތްތަކަށް ފުރުސަތު ދިނުމަށްޓަކައި އިންތިޚާބު ލަސްކުރަން ބަޔަކު ލަސްކުރަން އުޅޭ ވާހަކަ. އެ ފުރުސަތު ވެސް އަޅުގަނޑުމެން ނުދޭނަން. އިނގޭތޯ. އެއީ އަޅުގަނޑުމެންވާނީ ވަރަށް ރަނގަޅަށް އެފަދަ ކަންތައްތަކުގައި ވެސް ގާނޫނުގައި ވާ ތާރީޚުތަކާއި ރެޖިސްޓްރޭޝަންއަށް ހުޅުވާލި މުއްދަތާއި އަދި ރީ ރެޖިސްޓްރޭޓް ކުރަން ހުޅުވާލި މުއްދަތާއި އެކަމަށް ގާނޫނީ ގޮތުން ތައްޔާރުވާން ޖެހޭ ތައްޔާރުވުންތައް ވެފައިވާނީ،" ޝަރީފު ވިދާޅުވިއެވެ.
ޝަރީފު ވިދާޅުވީ އިންތިޚާބަށް ތައްޔާރުވުމުގެ ގޮތުން ވަރަށް ގިނަ ކަންކަން ކުރެވި، ބޮޑެތި ޚަރަދުތަކެއް ވެސް ކުރެވިފައިވާ ކަމަށެވެ. އަދި ސިޔާސީ ޕާޓީއަކަށް ތައްޔާރު ނުވެވިގެން އަދި ކެމްޕެއިން ނުކުރެވިގެން އިންތިހާބު ފަސްކުރުމަކީ ކުރެވޭނެ ކަމެއް ނޫން ކަމަށެވެ. އިންތިޚާބު ފަސްކޮށްފި ކަމުގައިވާ ނަމަ 20 މިލިއަން ރުފިޔާ އިތުރަށް ޚަރަދު ވާނެ ކަމަށް ވެސް އޭނާ ވިދާޅުވިއެވެ.
ސަރުކާރާ އިދިކޮޅު ފަރާތްތަކުން މަޖިލިސް އިންތިޚާބު ފަސްކުރަން އުޅޭ ވާހަކަތައް ގަދަވެފައިވާއިރު ރައީސް އިބްރާހިމް މުހައްމަދު ސޯލިހު ހަނިމާދޫގައި ވާހަކަ ދައްކަވަމުން ވިދާޅުވީ އިދިކޮޅު ފަރާތްތަކުން އިންތިހާބު ފަސްކުރުމަށް މަސައްކަތްކުރާކަމުގެ އަޑުތައް އިވިވަޑައިގެންފައިވާ ކަމަށާއި، އެކަމަށް ސަމާލުވެ ހުންނެވި ކަމަށެވެ.
މަޖިލިސް އިންތިޚާބު ފަސްކުރަން އިދިކޮޅު ފަރާތްތަކުން އުޅޭ ކަމަށް ބުނަމުންދާއިރު ނިމިދިޔަ ކައުންސިލް އިންތިޚާބު ވެސް ބާއްވަން ކަނޑައެޅި ތާރީޚަށް ނުބާއްވާ ފަސްކުރިއެވެ.
