ސްކޫލްތައް ބަންދުކުރުމަށް އެއްވެސް މުއައްސަސާއަކުން ލަފާދީފައެއް ނުވޭ: އެޑިއުކޭޝަން
31 މާރިޗު 2019 | އާދީއްތަ 06:00މިދުވަސްވަރު އަންނަނީ ހަލުވިކަމާ އެކު ޗިކުންގުންޔާ އަދި ޑެންގީ ހުން ފެތުރެމުން
މަޖީދިއްޔާ ސްކޫލް
އާންމު ބަލިމަޑުކަމެއް ފެތުރޭތީ ސްކޫލްތައް ބަންދުކުރުމަށް އެއްވެސް މުއައްސަސާއަކުން ލަފާދީފައިނުވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
ސޫކޫލްތައް ބަންދުކުރުމަށް އައިޖީއެމްއެޗުން، އެޑިއުކޭޝަން މިނިސްޓްރީއަށް އަންގާފައިވާ ކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތައް ދޮގުކޮށް އެޑިއުކޭޝަން މިނިސްޓްރީން ބުނީ، ކަމާ ގުޅޭ އެއްވެސް މުއައްސަސާއަކުން ސްކޫލްތައް ބަންދުކުރުމަށް މިހާތަނަށް ލަފާދީފަ ނުވާ ކަމަށެވެ. އަދި ފެތުރެނީ ދޮގު ޚަބަރެއް ކަމަށާއި، ބަލިމަޑުކަމަކާ ގުޅިގެން އެއްވެސް ސްކޫލެއްގެ ކިޔެވުން ބަންދުކުރުމަށް ނިންމާފައިނުވާ ކަމަށް މިނިސްޓްރީން ބުންޏެވެ.
ރާއްޖޭގައި މި ދުވަސްވަރު ހަލުވިކަމާ އެކު ޗިކުންގުންޔާ އަދި ޑެންގީ ހުމާއި، ބޭރަށް ހިންގުން ދަނީ ފެތުރެމުންނެވެ.
ޑެންގީ އަދި ޗިިކުންގުންޔާ ފެތުރޭ މިންވަރު އިތުރުވަމުން ދާތީ، އެކަމަށް ސަމާލުވެ، ރައްކާތެރިވުމަށް އިލްތިމާސްކޮށް އެޗްޕީއޭ އިން މި މަހުގެ ތެރޭގައި ނެރުނު ބަޔާނެއްގައި ބުނެފައި ވަނީ އެ ދެ ބަލި ޖެހިގެން ރިޕޯޓުކުރާ މީހުންގެ އަދަދު އަދިވެސް ދަށަށް ނުދާ ކަމަށެވެ. އަދި ޑެންގީ ހުން ގިނަވެފައިވާއިރު، މި ދުވަސްވަރު ޗިކުންގުންޔާ ޖެހިގެން ރިޕޯޓްކުރާ އަދަދު ވެސް އިތުރުވަމުން ދާކަމަށް އެ އެޖެންސީން ބުންޏެވެ.
ޗިކުންގުންޔާއަކީ ވެސް ޑެންގީ ހުން ފަތުރާ މަދިރިކަމުގައިވާ އީޑީސް މަދިރީގެ ޒަރިއްއާ އިން ފެތުރޭ ބައްޔެއްކަން ފާހަގަކޮށް އެޗްޕީއޭ އިން ވަނީ ބަލިން ރައްކާތެރިވުމުގެ ފިޔަވަޅުތައް އެޅުމަށް ގޮވާލައިފައެވެ. އެގޮތުން ހަށިގަނޑު ރަނގަޅަށް ނިވާވާ ގޮތަށް ހެދުން އެޅުމަށާއި، މަދިރި ލޯޝަން ބޭނުން ކުރުމަށާއި، ސްޕްރޭ ބޭނުން ކުރުމަށް އެޗްޕީއޭ އިން އިލްތިމާސް ކޮށްފައި ވެއެވެ. އަދި ތިން ދުވަހަށް ވުރެ ގިނައިން ހުން އަންނަ ނަމަ، އަދި ޑެންގީގެ އެއްވެސް އަލާމާތެއް ފެނިއްޖެ ނަމަ ސިއްހީ އެހީތެރިއެއްގެ އެހީ ހޯދުމަށް އެ އެޖެންސީން އެދިފައި ވެއެވެ.
