އެޗްއާރުސީއެމަށް ކަމިޝަނަރ އޮފް ޕްރިޒަންސް ހާޒިރު ކުރަނީ
30 މާރިޗު 2019 | ހޮނިހިރު 13:26ހާޒިރުކުރަން އަންގާފައިވަނީ އަންނަ މަހުގެ 2 ވަނަ ދުވަހު
ކަމިޝަނަރ އޮފް ޕްރިޒަންސް އަބްދުﷲ މުނާޒު
ހިއުމަން ރައިޓްސް ކަމިޝަން އޮފް ދަ މޯލްޑިވްސް (އެޗްއާރުސީއެމް) އަށް ކަމިޝަނަރ އޮފް ޕްރިޒަންސް އަބްދުﷲ މުނާޒު ހާޒިރުވުމަށް ޗިޓު ފޮނުވައިފިއެވެ.
މޯލްޑިވްސް ކަރެކްޝަނަލް ސަރވިސަސް އިން ބުނީ އެޗްއާރުސީއެމަށް މުނާޒު ހާޒިރުކުރަން އަންގާފައި ވަނީ އަންނަ މަހުގެ 2 ވަނަ ދުވަހުގެ ހެނދުނު 11:00 އަށް ކަމަށެވެ. މުނާޒު ހާޒިރުކުރުމަށް އަންގާފައި ވަނީ ބަލަމުންދާ މައްސަލައަކާ ގުޅިގެން ކަމަށާއި ހާޒިރުވެވެން ނެތް ނަމަ ސަބަބު، ހާޒިރުވާންޖެހޭ ގަޑީގެ 30 މިނިޓް ކުރިން އެންގުމަށް ވަނީ އެޗްއާރުސީއެމުން އެދިފައެވެ. ނަމަވެސް ހާޒިރުކުރަނީ ކޮން މައްސަލައަކާ ގުޅިގެން ކަމެއް ނޭނގެއެވެ.
މުނާޒަށް ކަމިޝަނަރ އޮފް ޕްރިޒަންސްގެ މަގާމު ހަވާލުކޮށްފައި ވަނީ މިދިޔަ އަހަރުގެ ޑިސެމްބަރ 25 ގައެވެ. މި ވެރިކަމުގައި އޭނާ ފުރަތަމަ އަދާކުރައްވާފައިވާ މަގާމަކީ ރައީސް ސޯލިހް އުފެއްދެވި މަރުތައް ތަހުގީގުކުރާ ކޮމިޝަންގެ މެމްބަރުކަމެވެ. މުނާޒު ވަނީ މޯލްޑިވްސް ނެޝަނަލް ޑިފެންސް ފޯސްގައި 24 އަހަރު ޚިދުމަތް ކުރައްވާ، ޝަރަފުވެރިކަމާ އެކު 2011 ވަނަ އަހަރު ސިފައިންގެ ޚިދުމަތުން ރިޓަޔަރކުރައްވާފައިވާ ބޭފުޅެކެވެ.
