ފުވައްމުލަކުގެ ސިޓީއަށް ދިމާވެފައިވާ ގިނަ މައްސަލަތައް އެބަ ހުރި ކަމަށާއި، އެ މައްސަލަތަކުގެ ހައްލު އޮތީ އެޖެންޑާ19ގައި ކަމަށް ފުވައްމުލަކު މެދު ދާއިރާ ކެނޑިޑޭޓު ހުސެއިން މުހައްމަދު ވިދާޅުވެއްޖެއެވެ.

ބުރާސްފަތި ދުވަހުގެ ރޭ ފުވައްމުލަކުގައި ބޭއްވި ކެންޕޭން ޖަލްސާގައި ހުސެއިން ވިދާޅުވީ އެ ރަށަށް ގިނަ މައްސަލަތައް ކުރިމަތިވެފައިވާ ކަމަށެވެ.

ފުވައްމުލަކުގައި އައު ވަޒީފާތައް އުފައްދަންޖެހޭ ކަމަށާއި، ވަޒީފާ ނުލިބިގެން އެތައް ޒުވާނަކު ރަށްދޫކޮށްދާ ކަމަށެވެ. އަދި މިއީ އާއިލާތައް ބިކަވެގެންދާ ސަބަބެއް ކަމަށް އޭނާ ފާހަގަކުރެވިއެވެ.

ފުވައްމުލަކު މެދު ދާއިރާއަކީ ރިސޯޓު މުއައްޒަފުން ގިނަ ދާއިރާއެއްކަން ފާހަގަކޮށް ހުސެއިން ވިދާޅުވީ ސާވިސްޗާޖު ނުދޭ މައްސަލަ ބަލައި މުއައްޒަފުންގެ ހައްގު ހޯދައިދިނުމުގެ އުސޫލު އޮތީ އެޖެންޑާ19 ގައި ކަމަށެވެ.

ސިއްހީ ނިޒާމަށް އަލިއަޅުއްވާލައްވާ ހުސެއިން ވިދާޅުވީ ހޮސްޕިޓަލުން އެކަށީގެންވާ ފަރުވާ ނުލިބޭ ކަމަށާއި، ބަލިވެގެން ދާން މަޖުބޫރު ވަނީ މާލެއަށް ކަމަށެވެ. މިއީ ރައްޔިތުންނަށް ޖެހޭ އިތުރު ތަކުލީފެއް ކަމަށް އެނާ ވިދާޅުވިއެވެ.

މީގެ އިތުރުން ހުސެއިން ވިދާޅުވީ އުންމީދު ކުރަނީ ރައީސް އިބްރީހިމް ސޯލިހުގެ ވައުދުފުޅާ އެއްގޮތަށް ފުވައްމުލަކުގެ ބޮޑެތި މަގުތައް ޒަމާނީ ފެންވަރަށް ތަރައްގީ ވެސް ކުރެވިގެންދާނެ ކަމަށެވެ. އަދި ވިދާޅުވީ 20 އަހަރު ވަންދެން ފުވައްމުލަކުގައި ގިރަމުން އައި ސަރަހައްދުގައި ހިމާޔަތް ކުރުމަށް އަމަލީ މަސައްކަތް ފަށާނެ ކަމުގެ އިޝާރާތެއް ސަރުކާރުން ދީފައިވާ ކަމަށެވެ.

ހުސެއިން ވިދާޅުވީ ރަށުގެ ތަރައްގީގެ އިތުރުން އިޖްތިމާއީ ގޮތުން ކުރިމަތިވާ މައްސަލަތަކަށް ހައްލު ހޯދުމަށް ކުރިއަށް އޮތް ރައްޔިތުން މަޖިލީހުގެ މެޖޯރިޓީ އެމްޑީޕީއަށް ލިބެންޖެހޭ ކަމަށާއި، އެހެން ނުނީ ރައްޔިތުންގެ ހުވަފެންތަކުގައި ކުލަ ނުޖެއްސޭނެ ކަމަށެވެ.

''އަޅުގަނޑުމެން މަސައްކަތް މިކުރަނީ މިގައުމު އެހެން ހަރުފަތަކަށް ގެންދަން. އަޅުގަނޑުމެން މަސައްކަތް މިކުރަނީ ހަގީގީ މާނާގަ މިފުވައްމުލަކު ދުނިޔޭގައިވާ އެންމެ އުފާވެރިތަނަށް ހަދަން. ރައްޔިތުންގެ މަޖިލީހަށް ތިބޭފުޅުން އަޅުގަނޑުމެން އައްޔަންކުރަނީ ތިބޭފުޅުންގެ ޖަޒީރާ މެނިފެސްޓޯއަށް ގާނޫނީ ބާރުވެރިކަން ހޯދައިދީ ކުރިއަށް އޮތް ފަސް އަހަރު އުފާވެރި  ފާގަތި ފަސް އަހަށް ހެދުމަށް. އަޅުގަނޑު އެދެނީ އަޅުގަނޑުގެ ދާއިރާގެ އެންމެހައި ރައްޔިތުންގެ އަރިހުގައި އަޅުގަނޑުމެންނަށް މިކަމުގައި އެހީތެރިކަން ފޯރުކޮށްދިނުމަށް،'' ހުސެއިން ވިދާޅުވިއެވެ.

އުތުރު ދާއިރާގެ ކެންޑިޑޭޓު މުހައްމަދު ރަސީދު ވިދާޅުވީ އެމްޑީޕީން ނުކުތީ ރައްޔިތުންނަށް ފައިދާ ހުރި ސިޔާސަތާއެކު ކަމަށާއި، މިފަދަ ސިޔާސަތުތަކާއެކު މަޖިލިސް އިންތިޚާބަށް އެހެން އެއްވެސް ޕާޓީއަކުން ނުނިކުންނަ ކަމަށެވެ.

އެމްޑީޕީއަށް އެތައް ރައްޔިތުންތަކެއް ލޯބިލިބިފައިވާކަން ފާހަގަކުރައްވައި ރަސީދު ވިދާޅުވީ ކެންޑިޑޭޓުން ރައްޔިތުންގެ ލޯބި ހޯދަނީ ދޮރުންދޮރަށް ހިނގައިގެން ކަމަށާއި، ރައްޔިތުންގެ ހިޔާލާ އިހުސާސްތައް ދެނެގަނެގެން ކަމަށެވެ.

ރަސީދު ވިދާޅުވީ ފުވައްމުލަކު ރައްޔިތުންނަށް ދިމާވެފައިވާ މައްސަލަތަކުގެ ތެރެއިން މިހާރުން މިހާރަށް ހައްލު ބޭނުންވާ ކަންކަން އެބަހުރި ކަމަށާއި، މަސައްކަތް ކުރަނީ އެހާލަތު ބަދަލުކުރަން ކަމަށެވެ.  

''ވަރަށް ގިނަ މައްސަލަ އެބަހުރި. ވަރަށް ބޮޑު މައްސަލައެއް މިއީ ކުނީގެ މައްސަލަ. މެނޭޖްކުރެވޭނެ ގޮތެއް ނެތް. މިކަމުގެ ސަބަބުން އެތައް އުދަނގޫތަކާ ރައްޔިތުން ކުރިމަތިލާންޖެހޭ. އެކަމަކު އަޅުގަނޑުމެން ކުންޏަކީ އާމްދަނީ ލިބޭ ވަސީލަތަކަށް ހަދާނަން. ކުނީގެ މައްސަލަ ކޮށްދޭނަން'' ރަޝީދު ވިދާޅުވިއެވެ.

ދެކުނު ދާއިރާގެ ކެންޑިޑޭޓް މުހައްމަދު މުންތާޒު ވިދާޅުވީ ސިޔާސީ އެންމެހައި މަސައްކަތްތަކާއި، ރައްޔިތުންނަށް ޚިދުމަތް ކުރުމަށް ހިތްވަރު ލިބެނީ ކުރީގެ ރައީސް އަދި މިހާރުގެ އެމްޑީޕީގެ ރައީސް މުހައްމަދު ނަޝީދުގެ ފަރާތްޕުޅުން ކަމަށާއި، އެއީ ލާމަސީލު މިސާލެއް ކަމަށެވެ.

އެމަނިކުފާނު ރައްޔިތުން ދެކެމުން އައިހުވަފެންތައް ހަގީގަތަކަށް ހަދައި ދީ ރައްޔިތުންނަށް ވީ ވައުދުތަކުގައި ހަގީގީ ކުލަ ޖައްސާދީފައިވާ ކަމަށެވެ.

މުންތާޒު ވިދާޅުވީ އަމާޒަކީ ފުދުންތެރި މުޖުތަމައުއެއް ބިނާ ކުރުން ކަމަށާއި، މިކަން ކުރުމަށް ރައްޔިތުން ފުރުސަތު ދޭންޖެހޭ ކަމަށެވެ. އެގޮތުން ދަރިންނާއިދަރިންގެ މުސްތަގުބަލަށް އެޖެންޑާ19 ތަންފީޒު ކުރުމަށް ވޯޓު ދިނުމަށް މުންތާޒު ގޮވާލެއްވިއެވެ.