ލާދީނީއޭ ގޮވާ ފަރާތްތަކަށް ނަޝީދު ބަހުގެ ހޫނު ހަމަލާތަކެއް ދެއްވައިފި
އިންތިހާބާ ދިމާކޮށް ވަރަށް ގިނަ ފަރާތްތަކުން އެމްޑީޕީއަކީ ލާދީނީ ބައެއް ކަމަށް ބުނޭ
ނަޝީދު ފުވައްމުލަކުގައި އޮތް ކެމްޕެއިން ޖަލްސާގައި ވާހަކަފުޅު ދައްކަވަނީ
އެމްޑީޕީގެ ވެރިކަމެއްގައި އިސްލާމްދީން ނޫން އެހެން ދީނަކަށް ޖާގަ ނޯންނާނެ ކަމަށް ވިދާޅުވެ ކުރީގެ ރައީސްުލްޖުމްހޫރިއްޔާ އަދި އެމްޑީޕީގެ ރައީސް މުހައްމަދު ނަޝީދު، ވާދަވެރި ސިޔާސީ ފަރާތްތަކަށް ބަހުގެ ހޫނު ހަމަލާތަކެއް ދެއްވައިފިއެވެ.
އެމްޑީޕީން ކުރަމުންގެންދާ ކެމްޕެއިން ދަތުރުގެ ތެރެއިން ޏ. ފުވައްމުލަކުގައި އޮތް ޖަލްސާގައި ވާހަކަ ދައްކަވަމުން ބުރާސްފަތި ދުވަހުގެރޭ ނަޝީދު ވިދާޅުވީ ރައްޔިތުން މަޖިލީހުގެ އިންތިހާބާ ދިމާކޮށް ވަރަށް ގިނަ ފަރާތްތަކުން އެމްޑީޕީއަކީ ލާދީނީ ބައެއް ކަމަށް ތުހުމަތުކުރަމުންދާ ކަމަށާއި އެހެންނަމަވެސް ރާއްޖޭގައި އެންމެ ގިނަ މިސްކިތް އަޅާފައިވާނީ އެމްޑީޕީ ސަރުކާރުން ކަމަށެވެ. އަދި އެމްޑީޕީގެ ވެރިކަމެއްގައި އެހެން އެއްވެސް ދީނަކަށް ޖާގައެއް ނޯންނާނެ ކަމަށް ނަޝީދު ތަކުރާރުކޮސް ވިދާޅުވިއެވެ.
"ދިވެހިންގެ ހިތްތަކުގައި އެންމެ މަތިވެރިވެގެންވާ މަޤާމެއް ދެވިފައިވަނީ އިސްލާމްދީނަށް، ދިވެހިންގެ ހިތްތަކުގައި ނަފްރަތު އުފެއްދުމަށް ބައެެއް ސިޔާސީ ލީޑަރުން ވާހަކަ ފަތުރަމުންދޭ. އަޅުގަނޑުމެންގެ ވެރިކަމުގައި ބުދު ފައްޅި ރާއްޖޭގައި އަޅާނެކަމަށް ލަދެއް ނެތި ބުނަމުންގެންދޭ. އެމްޑީޕީގެ ވެރިކަމުގައި ރާއްޖޭގައި 47 މިސްކިތް ބިނާކުރި. އަަޅުގަނޑުމެންނަކީ މައިންބައިފައިން ލޯބިން ބޮޑެތިކޮށްފައި ތިބި ކުދިން. އުމުރުން 7 އަހަރުވީމަ ޚަތިމް ކުރަން ދަސްކޮށްދީފައި ނަމާދުކުރަން ދަސްކޮށްދީފައި ރޯދަ ހިފަން މަޖުބޫރުކޮށް ޒަކާތްދެނީ. ދިވެހިރާއްޖޭގައި އެހެން އެއްވެސް ދީނަކަށް ޖާގައެއް ނޯންނާނެ. އެއީ ދިވެހިން އެދޭ ގޮތް، އެެހެންވީމަ އެ ވާހަކަތައް ދައްކާނެ ކަމެއް ނެތް" ނަޝީދު ވިދާޅުވިއެވެ.
ރާއްޖޭގެ ރައްޔިތުން ބޭނުންވަނީ ނަޒާހަތްތެރި ރައްޔިތުންގެ މަޖިލީހެއް ކަމަށާއި އެމްޑީޕީގެ ކެންޑިޑޭޓުން ނަޒާހަތްތެރިވާނެ ކަމަށް ނަޝީދު ވިދާޅުވިއެވެ. އަދި އެ ކެންޑިޑޭޓުން ނުވިކޭނެ ކަމަށްވެސް ނަޝީދު ވަނީ ވިދާޅުވެފައެވެ.
ފުވައްމުލަ،ކަށް ދިމާވެފައިވާ ކަންތައްތައް އިންތިހާއަށް ގިނަ ކަމަށާއި އެ މައްސަލަތަކަށް ހައްލު ލިބި، ރައީސް ސޯލިހުގެ ސަރުކާރުން އެ ވައުދުތައް "އަކުރުން އަކުރަށް، ރަނުން ރަނަށް" ފުއްދަވާނެ ކަމަށް ނަޝީދު ވިދާޅުވިއެވެ. ދަރިންނަށް ހިލޭ ތައުލީމުގެ ފުރުސަތު ހުޅުވާލައިދީ މި ރާއްޖެ އިތުރަށް ތަރައްޤީ ކުރައްވާނެ ކަމަށްވެސް ނަޝީދު ވިދާޅުވިއެވެ.
ނަޝީދު އިތުރަށް ވިދާޅުވީ ޝަރީއަތުގެ ހުކުމްތައް ސިޔާސީ ހުކުމް ތަކަށްވެގެން ދަނީ ރައްޔިތުން މަޖިލީހުގެ އަގުލަބިއްޔަތު ސަރުކާރަށް ނެތުމުން ކަމަށާއި ޤައުމެއްގެ ތަރައްޤީ އަންނަނީ ވަކި ހާއްސަ ކަންތައްތަކެއް ވަކި އިރެއްގައި ކުރުމުން ކަމަށެވެ. އަދި އެޖެންޑާ 19 އިން އެކަންތައްތައް ސާފުވެގެންދާނެ ކަމަށް ނަޝީދު ވިދާޅުވިއެވެ.
ނަޝީދު ފުވައްމުލަކަށް ވަޑައިގަތުން އެ ރަށުން އެ މަނިކުފާނަށް ވަނީ ހޫނު މަރުހަބާއެއް ދަންނަވާފައެވެ.
