ޕަޓޯ އެނބުރި ސައޮޕައުލޯއަށް ބަދަލުވެއްޖެ

ޗައިނީޒް ސުޕަ ލީގުގެ ޓިއަންޖިން ގުއަންޖިއަން އަށް ކުޅެމުން އައި ބްރެޒިލްގެ ފޯވާޑް އެލެގްޒެންޑްރާ ޕަޓޯ އެނބުރި ސައޮޕައުލޯއަށް ބަދަލުވެއްޖެއެވެ.

ސައޮޕައުލޯއަށް 2014 ވަނަ އަހަރާއި 2016 ވަނަ އަހަރާ ދެމެދު ކުޅުނު ޕަޓޯ އެނބުރި އެ ކްލަބަށް ބަދަލުވިކަން ސައޮޕައުލޯއިންވެސް ވަނީ ކަށަވަރު ކޮށްދީފައެވެ.

ރިޕޯޓްތައް ބުނާގޮތުން ޕަޓޯ ސައޮޕައުލޯއަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ.

ޕަޓޯ ވަނީ ދެ ސީޒަން ޗައިނާގައި ހޭދަކުރުމަށް ފަހު ދާދި ފަހުން ޓިއަންޖިން ގުއަންޖިއަންއާއެކު އޭނާ ހަދާފައިވާ އެއްބަސްވުން ނިމުމަކަށް ގެނެސްފައެވެ. އޭނާ އެ ކްލަބަށް ބަދަލުވީ ވިޔަރެއާލް ދޫކޮށް 2017 ވަނަ އަހަރު 15.5 މިލިއަން ޕައުންޑަށެވެ.

ޕަޓޯ އޭނާގެ ކެރިޔަރު ފެށީ 2006 ވަނަ އަހަރު އިންޓަ މިލާނުންނެވެ. އެގޮތުން އޭނާ ވަނީ އެޓީމަށް ކުޅުނު 27 މެޗުގައި 12 ލަނޑު ކާމިޔާބުކޮށް، އެޓީމާއެކު ފީފާ ކްލަބް ވޯލްޑް ކަޕް އެއް ފަހަރު ކާމިޔާބުކޮށްފައެވެ.

އިންޓަ މިލާން ދޫކޮށްލުމަށް ފަހު ޕަޓޯ އޭސީ މިލާނަށް ބަދަލުވީ 2007 ވަނަ އަހަރުގެ ސީޒަނުގައެވެ. އެގޮތުން އޭނާ ވަނީ އެޓީމަށް ކުޅުނު 150 މެޗުގައި 63 ލަނޑު ކާމިޔާބުކޮށް، އިޓާލިއަން ލީގު އެއްފަހަރު ކާމިޔާބުކޮށްފައެވެ.

އިޓަލީގެ ކުރީގެ ކުޅުންތެރިޔާ ފަބިއޯ ކަނަވާރޯގެ އިރުޝާދުގެ ދަށުން ޕަޓޯ ވަނީ ޓިއަންޖިން ގުއަންޖިއަންއަށް އޭނާ ކުޅުނު 60 މެޗުގައި 36 ލަނޑު ކާމިޔާބު ކޮށްފައެވެ.

ބްރެޒިލްގެ ގައުމީ ޓީމަށް ކުޅުނު 27 މެޗުގައި 10 ލަނޑު ކާމިޔާބު ކޮށްފައިވާ ޕަޓޯ ވަނީ ބްރެޒިލްގެ ޒުވާން ޓީމުތަކާއެކު ގިނަ ކާމިޔާބީތަކެއް ހޯދާފައެވެ.