އާރތު އަވާގައި ކަރަންޓު ބޭނުން ނުކުރުމަށް ސިޓީ ކައުންސިލުން އިލްތިމާސް ކޮށްފި
28 މާރިޗު 2019 | ބުރާސްފަތި 12:4630 ވަނަ ދުވަހު ރޭގަނޑު 20:30 އިން 21:30 އަށް ކަރަންޓު ބޭނުން ނުކުރުމަށް އެދެން: މާލެ ސިޓީ ކައުންސިލް
މި އަހަރުގެ އާރތް އަވާގެ ތީމް
އާރތު އަވާ ފާހަގަ ކުރުމަށްޓަކައި ކަރަންޓު ބޭނުން ނުކުރުމަށް މާލޭ ސިޓީ ކައުންސިލުން އިލްތިމާސް ކޮށްފިއެވެ.
ބުރާސްފަތި ދުވަހު ސިޓީ ކައުންސިލުން ނެރުނު ބަޔާނެއްގައި ބުނީ، ދުނިޔޭގެ އާރތު އަވާ ފާހަގަ ކުރުމުގެ ގޮތުން ހިންގުމަށް ހަމަޖެހިފައިވާ ހަރަކާތުގައި މާލެ ސިޓީގެ އެންމެހާ ރައްޔިތުންވެސް އަމަލީ ގޮތުން ބައިވެރިވުމަކީ އެ ކައުންސިލުގެ އެދުމެއް ކަމަށެވެ.
އެގޮތުން މި މަހުގެ 30 ވަނަ ދުވަހު ރޭގަނޑު 20:30 އިން 21:30 އަށް މާލެ ސިޓީގައި ހިމެނޭ ހުރިހާ ގެއަކުން އެ ގެއެއްގައި ހިމެނޭ ހުރިހާ ބޮކިތައް ނިއްވާލާ އެވަގުތު ކަރަންޓު ބޭނުން ނުކުރުމަށް އިލްތިމާސް ކޮށްފައެވެ. އަދި އެވަގުތުކޮޅުތެރޭ އެއްގަމު އުޅަނދު ފަހަރު ދުއްވުން ވީހާވެސް މަދުކުރުމަށް މާލެ ސިޓީގައި ދިރިއުޅޭ ހުރިހާ ރަައްޔިތުންނަށް ކައުންސިލުން ވަނީ އިލްތިމާސް ކޮށްފައެވެ.
ވޯލްޑް ވައިޑް ފަންޑް ނޭޗާއިން އިންތިޒާމް ކޮށްގެން ކޮންމެ އަހަރަކު ބާއްވަމުން އަންނަ އާރތް އަވާ ބައިނަލްއަގްވާމީ ގޮތުން އެންމެ ފުރަތަމަ ބާއްވާފައިވަނީ 2008 ވަނަ އަހަރުގެ މާޗް މަހުގެ 29 ވަނަ ދުވަހު އޮސްޓްރޭލިއާގެ ސިޑްނީގައެވެ.
އާރތް އަވާ ފާހަގަ ކުރަނީ މޫސުމަށް އަންނަ ބަދަލުތަކާއި އެ ބަދަލުތަކުން ލިބިދާނެ ގެއްލުންތަކުން ރައްކާތެރިވެ ތިބުމަށާއި، ތިމާވެއްޓަށް ލިބޭގެއްލުން ކުޑަކުރުމުގެ ގޮތުން އެޅިދާނެ ފިޔަވަޅުތަކުން އާއްމުން ހޭލުންތެރި ކުރުމަށް ބާއްވަމުންދާ ހަރަކާތެއްގެ ގޮތުގައެވެ
މި އަަހަރުގެ އާރތް އަވާގެ ތީމަކީ '' ކަނެކްޓްޓުއާރތް'' އެވެ.
