އަދުރޭގެ އަމަލުތަކުގެ ސަބަބުން ތުޅާދޫ ދާއިރާއިން ޕީޕީއެމް ނެތި ދިޔުން އެކަށީގެންވޭ: ތުޅާދޫ ޕިޕީއެމް
ޕާޓީ ބައިބައި ކޮށްލުމަށް ޕީއެންސީގެ ރައީސް ދަނީ މަސައްކަތް ކުރައްވަމުން: ޕީޕީއެމް ތުޅާދޫ ދާއިރާގެ ނައިބް ރައީސް
ޕީއެންސީގެ ވަގުތީ ރައީސް އަބްދުއްރަހީމް އަބްދުﷲ
ޕީއެންސީގެ ވަގުތީ ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ( އަދުރޭ) ހިންގަމުން ގެންދާ ނޭއްގާނީ އަމަލުތަކުގެ ސަބަބުން ތުޅާދޫ ދާއިރާއިން ''ޕީޕީއެމް'' ނެތިގެން ދިއުމަކީ އެކަށީގެންވާ ކަމެއް ކަމަށް ތުޅާދޫ ދާއިރާގެ ޕީޕީއެމް އިން ބުނެފިއެވެ.
ތުޅާދޫ ދާއިރާގެ ޕީޕީއެމް އިން މިފަދަ ގޮތަކަށް ބުނެފައި މިވަނީ، އަންނަ މަހުގެ ހަވަނަ ދުވަހު ބާއްވާ އާއްމު އިންތިހާބުގައި އެ ދާއިރާއަށް ޕީޕީއެމްގެ ޓިކެޓްގައި ވާދަކުރައްވާ މުހައްމަދު އަތީފަށް ޕްރޮގްރެސިވް ކޯލިޝަނުން ކުރި ތާއީދު އަނބުރާ ގެންދަން ނިންމުމާއި ގުޅިގެންނެވެ.
އޭނާ އަށް ކުރި ތާއީދު އަނބުރާ ގެންދަން ނިންމީ ޕީޕީއެމްގެ މެމްބަރުންތަކެއް އޮފީހަށް ވަންނަން އުޅުމުން ހުރަސްއެޅި ކަމަށް ތުހުމަތުކޮށެވެ.
އެކަން އިއުލާން ކޮށްފައިވަނީ އަންގާރަ ދުވަހު ބޭއްވި ޕްރެސްކޮންފަރެންސް ގައި ޕީއެންސީގެ ވަގުތީ ރައީސް އަބްދުއްރަހީމް އެވެ. ޕޮރްގްރެސިވް ކޯލިޝަނުން މިހާރު ތާއީދު ކުރަނީ އެދާއިރާ އަށް އަމިއްލަ ގޮތުން ކުރިމަތިލައްވާފައިވާ މުހައްމަދު ޒަހީންއަށެވެ.
އެކަމާއި ގުޅޭ ގޮތުން ތުޅާދޫ ބޮޑު ގޮފީގެ ނައިބް ރައީސް މުހައްމަދު މުމްތާޒް ނެރުނު ބަޔާނެއްގައި ބުނީ، ތުޅާދޫ ދާއިރާގެ ޕީޕީއެމް ކެންޑިޑޭޓަކީ ''ތުޅާދޫ ޢާތިފް'' ކަމަށާއި، އެ ދާއިރާގެ ޕީޕީއެމްގެ މެމްބަރުން އަދުރޭ އެދިލައްވާހާ ގޮތަކަށް ވޯޓު ދޭނެ ބައެއް ނޫން ކަމަށެވެ.
ޕާޓީ ބައިބައި ކޮށްލުމަށް ޕީއެންސީގެ ވަގުތީ ރައީސް މަސައްކަތް ކުރަމުންދާ ކަމަށާއި، ޒާތީ ގޮތުން އާތިފަށް ދެމުންދާ ހަމަލާ ހުއްޓާލުމަށް އެ ދާއިރާގެ މެމްބަރުން ވަނީ ގޮވާލާފައެވެ. އަދުރޭ ހިންގަމުންދާ މިފަދަ ނޭއްގާނީ އަމަލުތަކުގެ ސަބަބުން ތުޅާދޫ ދާއިރާއިން '' ޕީޕީއެމް'' ނެތިގެން ދިޔުމަކީ އެކަށީގެންވާ ކަމެއް ކަމަށް ވެސް އެ ބަޔާނުގައިވެއެވެ.
ޕްރޮގްރެސިވް ކޯލިޝަން އިން ތާއީދުކުރަން ނިންމާފައިވާ ޒަހީން އަކީ މިހާރު ހިނގަމުންދާ 18 ވަނަ ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ނާޒިމް ރަޝާދުގެ އާއިލާ މެމްބަރެކެވެ.
އަންނަ މަހުގެ ހަވަނަ ދުވަހު ބާއްވަން ހަމަޖެހިފައިވާ ރައްޔިތުންގެ މަޖިލީހުގެ އިންތިހާބަށް ތުޅާދޫ ދާއިރާއިން ހަތަރު ކެންޑިޑޭޓަކު ވާދަކުރެއެވެ. އޭގެ ތެރޭގައި އެމްޑީޕީގެ ޓިކެޓްގައި ވާދަކުރައްވާ ގާނޫނީ ވަކީލާ ހިސާން ހުސޭން ހިމެނިވަޑައިގަންނަވައެވެ. ތުޅާދޫ ދާއިރާގެ ހަތަރު ރަށެއް ހިމެނޭއިރު އާބާދީ އެންމެ ބޮޑީ ތުޅާދޫގައެވެ. އެ ރަށުގެ އާބާދީގައި 2972 މީހުން ތިބޭއިރު ވޯޓުލެވޭ މީހުންގެ އަދަދަކީ 2183 މީހުންނެވެ.
