މި ހިނގާ މަރޗް މަހުގެ 1 ވަނަ ދުވަހުން ފެށިގެން ކަރަންޓުގެ އަގު ހެޔޮވެގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ސަރުކާރަށް 90 ދުވަސް ފުރުން ފާހަގަކުރުމުގެ ގޮތުން ބުރާސްފަތި ދުވަހު ރައީސް އޮފީހުގައި ބޭއްވި ހަފުލާއެއްގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، މިއީ އަސާސީ ހިދުމަތް ފޯރުކޮށްދިނުމުގައި މާލެ އާއި އެހެން ރަށްތަކާއި ހުރި ފަރަގު ނައްތާލުމުގެ ގޮތުންނާއި ވިޔަފާރިތަކަށް ފަހި މާހައުލެއް ގާއިމްކުރުމުގެ ސިޔާސަތުގެ ދަށުން ކޮށްދެއްވި ކަމެއް ކަމަށެވެ.

އެގޮތުން ރައީސް ސޯލިހު ވަނީ ތިން ކަމެއް ފާހަގަކުރައްވާފައެވެ. ރައީސް ވިދާޅުވީ މިހާރު މާލެއާ އަތޮޅުތެރޭގެ ރަށްތަކުގެ ޑޮމެސްޓިކް ކެޓެގަރީގެ 400 ޔުނިޓުން މަތީގެ ބޭންޑްތަކުގެ އަގުކުރުމުގައި ހުރި ފަރަގު ނައްތާލެވިފައި ވާނެ ކަމަށެވެ. އަދި މި ބަދަލުގެ ސަބަބުން ރަށްތަކުގެ ހުރިހާ ގޭބިސީއެއްގެ ކަރަންޓް ބިލް ކުޑަވެގެން ދާނެ ކަމަށް އެމަނިކުފާނު ވަނީ ފާހަގަކުރައްވާފައެވެ.

"ކަރަންޓުގެ އަގަށް މި ބަދަލު ގެނައުމުން، ރަށްރަށުގެ ގޭބިސީތަކުގެ ކަރަންޓު ބިލުތަކަށް ބޮޑު ލުޔެއް ލިބިގެންދާނެ. މި ގޮތުން މިސާލަކަށް، ގޭބިސީއަކުން ކަރަންޓު ބިލަށް 2200 ރުފިޔާ ހޭދަކުރާ ނަމަ، ދެން ދައްކަންޖެހޭނީ، ގާތްގަނޑަކަށް 1700 ރުފިޔާ" ރައީސް ވިދާޅުވިއެވެ.

މީގެ އިތުރުން ހުރިހާ ރަށްރަށުގެ ވިޔަފާރިތަކުން ކަރަންޓަށް ކުރަންޖެހޭ ޚަރަދު ކުޑަކުރުމުގެ ގޮތުން އަތޮޅުތެރޭގެ ބިޒްނަސް ކެޓެގަރީގެ އަގުތައް އައްޑޫ އާއި ފުވައްމުލަކުގައި ހުރި އަގާ އެއްވަރު ކުރެވިފައި ވާނެ ކަމަށް ރައީސް ވިދާޅުވިއެވެ. މި ބަދަލުގެ ސަބަބުން ވިޔަފާރިތަކުން ހަކަތައަށް ކުރަންޖެހޭ ހަރަދު ކުޑަވެ ވިޔަފާރީގެ ފައިދާ އިތުރުވެގެން ދާނެ ކަމަށް ވެސް އެމަނިކުފާނު ވިދާޅުވިއެވެ.

"މި ބަދަލު ގެނައުމުން، ރަށްރަށުގައި ކަރަންޓް ބިލަށް، ގާތްގަނޑަކަށް 4600 ރުފިޔާ ދައްކަމުން އައި ވިޔަފާރިތަކުން، ދެން ދައްކަންޖެހޭނީ ގާތްގަނޑަކަށް 3400ރ.. މިއީ ރައްޔިތު މީހާގެ ޖީބަށް ވަންނަ އިތުރު 1200ރ." ރައީސް ވިދާޅުވިއެވެ.

ތިން ވަނަ ކަމަކަށް ރައީސް ފާހަގަކުރެއްވީ، ސަރުކާރުން ޑީސަލުން ނަގަމުން އައި ފަސް އިންސައްތަ ޑިއުޓީ ކަނޑާލުމާ ގުޅިގެން ކަރަންޓްގެ އަގަށް އައި ހެޔޮ ބަދަލެވެ. އެގޮތުން ރައީސް ވިދާޅުވީ ހުރިހާ ކަރަންޓް ބިލަކުން ވެސް ފިއުލް ޑިސްކައުންޓެއް ދޭން ނިންމަވާފައިވާ ކަމަށާއި، މިކަމުގެ ސަބަބުން ހުރިހާ ގޭބިސީތަކާއި ވިޔަފާރިއަށް ވެސް މީގެ ހެޔޮ މަންފާ ލިބިގެން ދާނެ ކަމަށެވެ.

ރައީސް ސޯލިހު ވިދާޅުވީ ކަރަންޓްގެ އަގު ހެޔޮ ކުރަން ނިންމެވީ މައިގަނޑު ދެ ވިސްނުމެއްގެ ދަށުން ކަމަށެވެ. އެގޮތުން ފުރަތަމަ ކަމަކަށް ރައީސް ފާހަގަކުރެއްވީ މާލެ އާއި އަތޮޅުތެރޭގައި އޮތް ފަރަގު ނައްތާލުމެވެ. ރައީސް ވިދާޅުވީ އަތޮޅުތައް ތަރައްގީ ކުރެވޭނީ މިފަދަ ސިޔާސަތުތައް އިސްކޮށްގެން ކަމަށެވެ. ދެވަނަ ކަމަކަށް ރައީސް ފާހަގަކުރެއްވީ ވިޔަފާރިތަކަށް ފަހި މާހައުލެއް ބިނާކޮށްދިނުމެވެ. ރައީސް ވިދާޅުވީ މިކަމުގެ ސަބަބުން ވިޔަފާރިތަކުން ކުރާ ޚަރަދު ކުޑަވެ، މުޅި އިގްތިސާދަށް އޭގެ ނަފާ ކުރާނެ ކަމަށެވެ.

ރައީސް ސޯލިހުގެ ވާހަކުފުޅުގައި ރައީސް ވަނީ މިހާރު ބޭނުންކުރާ ޑީސަލް ޖެނެރާޓަރުތައް ދޫކޮށް ސޯލަރ ފަދަ އިޔާދަ ކުރަނިވި ހަކަތައަށް ބަދަލުކުރަން ޖެހޭ ކަމަށް ވިދާޅުވެފައެވެ. އޭރުން ކަރަންޓުގެ އަގު މިހާރަށް ވުރެ ވެސް ހެޔޮ ވެގެން ދާނެ ކަމަށް ރައީސް ވަނީ ވިދާޅުވެފައެވެ.

"އިއާދަކުރަނިވި ހަކަތަ ބޭނުންކުރާ ނަމަ، މިހާރަށް ވުރެ މާ ހެޔޮއަގުގައި ކަރަންޓްގެ ޚިދުމަތް ފޯރުކޮށްދެވޭނެ،" ރައީސް ވިދާޅުވިއެވެ.

ކަރަންޓްގެ އަގު ހެޔޮ ކުރުމަކީ ރައީސް ސޯލިހުގެ ފުރަތަމަ 100 ދުވަހުގެ ރިޔާސީ ވައުދުތަކުގެ ތެރެއިން ވައުދެކެވެ. ސަރުކާރަށް 90 ދުވަސް ފުރުން ފާހަގަކުރަން ބޭއްވި ހަފުލާގައި ރައީސް ވިދާޅުވީ ހުރިހާ ވައުދުތަކުގެ ތެރެއިން މިހާތަނަށް 83 އިންސައްތަ ވައުދު ފުއްދާދެވިފައިވާ ކަމަށެވެ.