މަޖިލިސް އިންތިޚާބަށް ފުލުހުންނަށް މައުލޫމާތު ދިނުމުގެ ބައްދަލުވުން ފަށައިފި
28 މާރިޗު 2019 | ބުރާސްފަތި 06:03އިންތިޚާބު ބޭއްވުމަށް ހަމަޖެހިފައިވަނީ އަންނަ މަހުގެ 6 ވަނަ ދުވަހު
އީސީއިން ބޭއްވި ބައްދަލުވުމުގެ ތެރެއިން
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ފުލުހުންނަށް މައުލޫމާތު ދިނުމުގެ ބައްދަލުވުން ފަށައިފިއެވެ.
އިލެކްޝަންސް ކަމިޝަންގެ އިންތިޚާބާ ބެހޭ މަރުކަޒުގައި އެއް ދުވަހުގެ މުއްދަތަށް ބާއްވާ ބައްދަލުވުމުގައި ފުލުހުންގެ އޮފިޝަލުން ބައިވެރިވެއެވެ.
އެބައްދަލުވުން ފެށުމަށް ބޭއްވި ރަސްމިއްޔާތުގައި އިލެކްޝަންސް ކަމިޝަންގެ ރައީސް އަހުމަދު ޝަރީފު ވިދާޅުވީ އެކަމިޝަނުން ބާއްވާ ކޮންމެ އިންތިޚާބެއްގައި ވެސް އެންމެ ބޮޑު އެހީތެރިކަމެއް ލިބެނީ ފުލުހުންގެ ފަރާތުން ކަމަށެވެ. އަދި މާލެ އާއި ރާއްޖެ އަދި ރާއްޖެ އިން ބޭރުގައި ބަހައްޓާ ވޯޓުފޮށިތަކުގައި އެހީތެރިކަން ފުލުހުންގެ ފަރާތުން ބޭނުންވާ ކަމަށް ޝަރީފު ވިދާޅުވިއެވެ.
"މާލެ އާއި ރާއްޖޭގެ އެކި ސަރަހައްދުގައި ހަރަކާތްތެރިވުމަށް ފުލުހުންގެ އެހީތެރިކަން ބޭނުންވޭ،" ޝަރީފު ވިދާޅުވިއެވެ.
މިރަސްމިއްޔާތުގައި ޕޮލިސް ކަމިޝަނަރ މުހައްމަދު ހަމީދު ވިދާޅުވީ ފުލުހުންގެ ދައުރު އަދާކުރާނެ ކަމަށާއި ފުލުހުން އަބަދުވެސް މަސައްކަތް ކުރަނީ ގުޅިގެން ކަމަށެވެ. އަދި މި ފަހަރުގެ އިންތިޚާބުގައި ވެސް ފުލުހުންގެ އެހީތެރިކަން އީސީއަށް ލިބޭނެ ކަމަށް ވިދާޅުވިއެވެ.
ކުރިއަށްއޮތް ރައްޔިތުންގެ މަޖިލީހުގެ އިންތިޚާބު ބޭއްވުމަށް ހަމަޖެހިފައިވަނީ އަންނަ މަހުގެ 6 ވަނަ ދުވަހުއެވެ. މިފަހަރުގެ އިންތިޚާބުގައި 501 ވޯޓު ފޮށި ބަހައްޓާއިރު ވޯޓުލާ މަރުކަޒުގައި ފުލުހުން ހަރަކާތްތެރިވާނެކަމަށް އީސީއިން ބުނެއެވެ.
