ތުޅާދޫ ދާއިރާގެ ކެންޑިޑޭޓަށް ކުރި ތާއިދު ޕީޕީއެމުން އަނބުރާ ގެންގޮސްފި
ތާއީދު އަނބުރާ ގެންގޮސްފައިވަނީ ޕީޕީއެމްގެ މެމްބަރުންތަކެއް އޮފީހަށް ވަނުމަށް ހުރަސްހެޅުމުން
މަޖިލީސް ބަހުސްގައި އާތިފް ވާހަކަދައްކަވަނީ
ޕްރޮގްރެސިވް ކޯލިޝަންގެ އޮފީހަށް, އެ ކޯލިޝަންގެ މެމްބަރުންތަކެއް ވަނުމަށް ހުރަސްއެޅިކަމުގެ ތުހުމަތުގައި ޕީޕީއެމްގެ ޓިކެޓްގައި ރައްޔިތުންގެ މަޖިލީހުގެ ތުޅާދޫ ދާއިރާއަށް ކުރިމަތިލައްވާފައިވާ މުހައްމަދު އަތީފަށް ކުރި ތާއީދު އެ ޕާޓީން އަނބުރާ ގެންގޮސްފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، އަތީފަށް ކުރި ތާއިދު އަނބުރާ ގެންގޮސްފައިވަނީ އޭނާ އާއި އެކު ކުރެވުނު މަޝްވަރާއަކަށް ފަހު ގަބޫލް ނުކުރެވޭ ފަދަ ކަންތައްތަކެއް އޭނާގެ ފަރާތުން ފެނިފައިވާތީ ކަަމަށެވެ.
''އަތީފް ވަނީ މިދޭތެރެއިން އަޅުގަނޑުމެން އޮފީހަށް އަޅުގަނޑުމެން އެންމެން ވަނަ ނުދީ ވަރަށް ގިނައިރު ވަންދެން ހިފަހައްޓަފައި. އެއީ އަޅުގަނޑުމެން ކުރި މަޝްވަރާއަކާއި ގުޅިގެން މިތަނަށް އައިސް އަޅުގަނޑުމެން ގަބޫލް ނުކުރާ އުސޫލަކަށް ކަންތައްތައް ކޮށްފި. އެ މައްސަލަ އަޅުގަނޑުމެންގެ ސުލޫކީ ކޮމިޓީން ބަލަމުންދާނެ ކަމަށް އަޅުގަނޑުމެން އުއްމީދު ކުރަނީ.'' އަބްދުއްރަހީމް ވިދާޅުވިއެވެ.
މިހާރު އެ ކޯލިޝަނުން ތާއިދު ކުރަނީ އެ ދާއިރާ އަށް އަމިއްލަ ގޮތުން ކުރިމަތިލައްވާފައިވަ މުހައްމަދު ޒަހީންއަށެވެ. މި ތުހުމަތުތަކާއި ގުޅޭގޮތުން އާތިފް އަށް ގުޅާމުން ފޯނަށް ޖަވާބެއް ނުދެއްވާތި އިތުރު މައުލޫމާތު ވަނީ ސާފުނުވެފައެވެ.
އަންނަ މަހުގެ ހަވަނަ ދުވަހު ބާއްވަން ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި ތުޅާދޫ ދާއިރާ އަށް ހަތަރު ކެންޑިޑޭޓަކު ވާދަ ކުރެއެވެ. އޭގެ ތެރޭގައި، އެމްޑީޕީގެ ޓިކެޓްގައި ވާދަކުރައްވާ ގާނޫނީ ވަކީލާ ހިސާން ހުސެއިންވެސް ހިމެނިވަޑައިގަންނަވަ އެވެ.
މި ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން ވަނީ ޕްރޮގްރެސިވް ކޯލިޝަންގެ ފަރާތުން ކުރިމަތިލައްވާފައިވާ ބައެއް ދާއިރާތަކުގެ ކެންޑިޑޭޓުންނަށް ތާއިދު ކުރަން ނިންމާފައެވެ. އެހެން ނަމަވެސް އެ ނިންމުމަކީ ޕާޓީގެ ކައުންސިލްގެ ތެރެއިން ނިންމި ނިންމުމެއް ނޫންކަމަށް ޖުމްހޫރީ ޕާޓީގެ ރައީސް އަދި ޓޫރިޒަމް މިނިސްޓަރު އަލީ ވަހީދު ވަނީ ވިދާޅުވެފައެވެ.
