އެމިލިއާނޯ ސަލާ ރަސްމީކޮށް ކާޑިފަށް ބަދަލުވެފައިނުވާ ކަމަށް ބުނެ އޭނާގެ ޓްރާންސްފާ ފީ ދައްކަން ކާޑިފްއިން ބޭނުންނުވާ ކަމަށް ރިޕޯޓްތައް ބުނެފިއެވެ. 

ޖެނުއަރީ 21 ވަަނަ ދުވަހު ފްރާންސްގެ ނެންޓްސް އިން ނައްޓާލައިގެން ކާޑިފްއަށް ދަތުރު ކުރި ޕައިޕާ މަލިބޫ ނަމަކަށް ކިއުނު ޖެޓު ވެއްޓުމުގެ ހާދިސާގައި މަރުވި އެމިލިއާނޯ ސަލާ އެ ޓީމަށް ގެނެއަމަށް ނިންމާފައި ވަނީ ޖެނުއަރީ މަހުގެ ތެރޭގައެވެ. ރިޕޯޓްތައް ބުނާ ގޮތުގައި ޖެޓުގައި ކާޑިފް އަށް ސަލާ ދަތުރު ކުރަމުން ދިޔައީ އެޓީމާ ގުޅުމަށެވެ.

އަންނަ ސީޒަނުގައި އިނގިރޭސި ޕްރިމިއާ ލީގުގައި އޮންނަން ބޭނުންވާތީ ކާޑިފްގެ ޓީމު ވަރުގަދަ ކުރުމުގެ ގޮތުން ރެކޯޑް އަގެއް ކަމަށްވާ 19 މިލިއަން ޑޮލަރަށް ސަލާގެ ސޮއި ކާޑިފްއަށް ހޯދާފައިވާއިރު އޭނާގެ ޓްރާންސްފަރ ފީ ކާޑިފުން ދޭން ދެކޮޅު ހެދުމުން ނެންޓްސް އިން ވަނީ އެ މައްސަލަ ފީފާ އަށް ހުށައަޅާފަ އެވެ. ފީފާ އިން ވަނީ މި މައްސަލައިގައި ޖަވާބުދާރީވާން އަންނަ މަހުގެ 3 ވަނަ ދުވަހާ ހަމައަށް ކާޑިފަށް މުހުލަތު ދީފަ އެވެ.

ކާޑިފުން ސަލާގެ ސޮއި ހޯދާފައިވާކަން އިއުލާންކުރީ ޖެނުއަރީ 19 ވަނަ ދުވަހު އެވެ. އޭގެ ދެ ދުވަސް ފަހުން ސަލާ ދަތުރުކުރި ޖެޓު ވެއްޓި އޭނާ މަރުވި ހާދިސާ ހިނގިއިރު، ސަލާ ދަތުރު ކުރުމުގެ ކަންތައްތައް ކާޑިފުން ހަމަޖައްސައި ދީފައި ނުވާތީ ނެންޓްސް އިން ވަނީ ކަންބޮޑުވުން ފާޅުކޮށްފަ އެވެ.

އެހެން ނަމަވެސް ކާޑިފުން ބުނީ އެ ކްލަބުން ސަލާގެ ދަތުރުފަތުރު ހަމަޖައްސައި ނުދިނީ ސަލާ އެކަމަށް އެދިފައިނުވާތީ ކަމަށާއި ދަތުރުގެ ކަންތައްތައް ހަމަޖައްސާފައި ވަނީ ސަލާގެ އޭޖެންޓް ވިލީ މެކާ ޕްރައިވެޓް ކުންފުންޏަކާ ގުޅިގެން ކަމަށެވެ.

ސަލާ ދަތުރުކުރި ޖެޓަކީ ކޮމާޝިއަލް ލައިސަންސް ލިބިފައިވާ ޖެޓެއް ނޫން ކަމަށާއި އެ ދަތުުރު ކުރުމަށް ހުއްދަ ހޯދާފައި ވަނީ އަމިއްލަ ދަތުރެއްގެ ގޮތުގައި ރަޖިސްޓްރީ ކޮށްގެން ކަމަށް ވައިގެ އެކްސިޑެންޓްތައް ތަހުގީގުކުރާ އިދާރާ، އެއާ އެކްސިޑެންޓް އިންވެސްޓިގޭޝަން ބްރާންޗް (އޭ.އޭ.އައި.ބީ) އިން ވަނީ ބުނެފައެވެ.

މި ޖެޓް ގެއްލުނީ ޗެނަލް އައިލެންޑްގެ ގޯންސީގެ ލައިޓް ހައުސް ކައިރިން ކަމަށްވާއިރު، ޖެޓު ހޯދުމުގެ މަސައްކަތް ތިން ދުވަސް ވަންދެން ވަރަށް ބާރަށް ކުރިޔަށް ގެންދިޔައެވެ. އެހެން ނަމަވެސް މޫސުން ތަން ނުދިނުމުގެ ސަބަބުން ގޯންސީ ޕޮލިހާއި ފްރާންސް އަދި އިންގްލެންޑްގެ ސިފައިން ގުޅިގެން ޖެޓު ހޯދުމަށް ކުރަމުންދިޔަ މަސައްކަތް ހުއްޓާލީ އެ ސަރަހައްދުގެ މޫސުން ހުރި ގޮތުންނެވެ. މަސައްކަތް ހުއްޓާލީ 1700 ސްކޮޔާ މައިލް ބެލުމަށް ފަހުއެވެ.

ނަމަވެސް ރަސްމީކޮށް ޖެޓު ހޯދުމުގެ މަސައްކަތް ހުއްޓާލާފައި ވަނިކޮށް، އެމިލިއާނޯ ސަލާ ދަތުރުކުރި ޖެޓާއި އޭނާގެ ހަށިގަނޑު ފެނިފައި ވަނީ އޭނާ ހޯދުމުގެ މަސައްކަތް ހުއްޓާ ނުލުމަށް ފުޓުބޯޅަ ގިނަ ތަރިންތަކަކާއި ގިނަ ބަޔަކު ގޮވާލާފައި ވަނިކޮށެވެ. 

ސަލާ ދަތުރު ކުރި ޖެޓު ހޯދުމަށް ޚަރަދު ކުރުމަށް އޭނާގެ އޭޖެންސީން ހާއްސަ ފަންޑެއް ހުޅުވާފައި ވާއިރު، ގިނަ އަދަދެއްގެ ކުޅުންތެރިން ވަނީ އެފަންޑަށް އެހީތެރިވެފައެވެ.

ޖެޓުން ދަތުރުކުރި އާރޖެންޓީނާގެ ފޯވާޑް އެ މިލިއާނޯ ސަލާގެ ހަށިގަނޑު ފެނިފައިވާއިރު، ޕައިލެޓް ފެނިފައެއް ނުވެއެވެ.

ޕައިލެޓް އިބޮސްޓޮންގެ އާއިލާއާ ހަވާލާދީ ރިޕޯޓްތައް ބުނާ ގޮތުގައި ސަލާގެ ހަށިގަނޑު ފެނުމަށް ފަހުގައި ސާޗް ހުއްޓާލުމުން އާއިލާއަށް ކުރިމަތިވީ އިތުރު ހިއްދަތިކަމަކާއެވެ. 

އިބޮސްޓޮން ހޯދުމަށް އާއިލާއިން ފަންޑެއް ހުޅުވުމުން ގިނަ އަދަދެއްގެ މީހުން އެހީތެރި ވެދީފައިވާއިރު ފްރާންސްގެ ފުޓްބޯޅަ ކުޅުންތެރިޔާ ކީލިއަން އެމްބަޕޭ ވަނީ 27،000 (ހަތާވިސް ހާސް) ޔޫރޯ އެ ފަންޑަށް ދީފައެވެ. މި ނޫނަސް އިތުރު ފުޓުބޯޅަ ކުޅުންތެރިން ވަނީ އެ ފަނޑަށް އެހީ ވެދީފައެވެ.