ރާއްޖޭގެ ރަށްތައް ޕްރޮމޯޓްކުރުމަށް ޚާއްސަ ވެބް ޕޯޓަލްއެއް އިފްތިތާހުކޮށްފި
ރިސޯޓްތަކަށް އަންނަ ފަތުވެރިންނަށް ވެސް އެކްސްކަރޝަންތަކުގައި ދިރިއުޅޭ ރަށްތަކަށް ޒިޔާރަތް ކުރުމަށް މި ޕޯޓަލްގެ ސަބަބުން ބާރު އެޅިގެންދާނެ
މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މުހައްމަދު މަލީހު ޖަމާލު
ރާއްޖޭގެ ރަށްތައް ޕްރޮމޯޓް ކުރުމަށްޓަކައި އައިލެންޑްސް.އެމްވީގެ ނަމުގައި ޚާއްސަ ޕޯޓަލްއެއް އިފްތިތާހުކޮށްފިއެވެ.
ހޯމަ ދުވަހުގެ ރޭ ހުޅުމާލޭގައި ބޭއްވި ޖަލްސާގައި މި ޕޯޓަލް އިފްތިތާހުކޮށްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި މިނިސްޓަރ އޮފް ކޮމިއުނިކެޝަން ސައިންސް އެންޑް ޓެކްނޮލޮޖީ މުހައްމަދު މަލީހު ޖަމާލް އެބެ.
މިނިސްޓަރ މަލީހު ވިދާޅުވީ މި ޕޯޓަލަށް ވަނުމުން ރަށުގެ ޚާއްސަ ސިފަތަކާއި ލިބެން ހުރި ވަސީލަތްތަކާއި، ރަށުގެ ރަހަތަކާއި، ސަގާފަތާއި، ގެސްޓްހައުސްތަކުގެ މައުލޫމާތު ލިބިގެންދާނެ ކަމަށެވެ.
މީގެ އިތުރުން ރިސޯޓްތަކަށް އަންނަ ފަތުވެރިންނަށް ވެސް އެކްސްކަރޝަންތަކުގައި މީހުން ދިރިއުޅޭ ރަށްތަކަށް ޒިޔާރަތް ކުރުމަށް މި ޕޯޓަލްގެ ސަބަބުން ބާރު އެޅިގެންދާނެ ކަމަށް މިނިސްޓަރ ވިދާޅުވިއެވެ.
މި ޕޯޓަލްގައި ރައްކާކުރެވޭ މައުލޫމާތަކީ އެރަށެއްގެ ތާރީޚާއި ، ސަގާފަތާއި، ކުޅިވަރާއި، ފްލޯކް ވާހަކަތަކާއި، ރަށަށް ލިބިފައިހުރި އުމްރާނީ ތަރައްޤީ އާއި ރަށުގެ ގުދަރްތީ ވެށީގެ ހަނދާންތައް ލިޔެވި އަދި މަންޒަރުތަކެއްގެ ގޮތުގައި އެތަކެއް ޖީލްތަކެއް ފޯރުކޮށްދެވޭނެ އަގުހުރި މައުލޫމާތުގެ އަރުޝީފެއް ކަމަށް މިނިސްޓަރު ވިދާޅުވިއެވެ.
މިނިސްޓަރ ވިދާޅުވީ މި ޕޯޓަލްއަށް މައުލޫމާތު އެޅުމަށް ކައުންސިލްގެ މުވައްޒަފުންނަށް ދޭންޖެހޭ ތަމްރީން ދިނުމުގެ އިންތިޒާމް ދާދި އަވަހަށް ހަމަޖއްސާނެ ކަމަށެވެ.
