ނިއުގެ ސަސްޕެންޝަން ދަމަހައްޓަން ކްލަބްތަކުން ފާސްކޮށްފި

ނިއުރޭޑިއަންޓް ސްޕޯޓްސް ކްލަބްގެ ސަސްޕެންޝަން ދަމަހައްޓަން ކްލަބްތަކުން ފާސްކޮށްފިއެވެ.

ހޯމަ ދުވަހު ބޭއްވުނު ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އޯޑިނަރީ ކޮންގްރެސްގައި ނިއުގެ ސަސްޕެންޝަން ދަމަހައްޓަން ވޯޓު ދިނީ ކޮންގްރެސްގައި ބައިވެރިވި 13 ކްލަބްގެ ތެރެއިން 11 ކްލަބްގެ ތާއީދާއެކުގައެވެ. އަދި ސަސްޕެންޑުކުރުމާ ދެކޮޅަށް ވޯޓު ދިނީ ވިކްޓްރީ ސްޕޯޓްސް ކްލަބުގެ އިތުރުން މަހިބަދޫ ސްޕޯޓްސް ކްލަބުންނެވެ.

ނިއު ސަސްޕެންޑުކުރުމަށް އެފްއޭއެމުން ނިންމީ، މިދިޔަ އަހަރުގެ އޯގަސްޓް މަހުން ފެށިގެން މިއަދާ ހަމައަށް ނިއު އިން އެ ކްލަބުގެ ކުޅުންތެރިންނަށް ދޭންޖެހޭ 3.8 މިލިއަން ރުފިޔާއަށްވާ މުސާރަ އާއި އުޖޫރަ ދީފައިނުވާތީ، އެ މައްސަލަ ކުޅުންތެރިން އެފްއޭއެމަށް ހުށަހަޅާފައިވާތީއެވެ.

ނިއު ސަސްޕެންޑުކޮށްފައިވަނީ، އެފްއޭއެމްގެ ހިންގާ ގަވައިދުގެ 14 ވަނަ މާއްދާ އިން އެފްއޭއެމްގެ ހިންގާ ކޮމިޓީއަށް ލިބިދޭ ބާރުތަކުގެ ތެރެއިން ނިއު އިން މުސާރައިގެ މައްސަލަ ހައްލުކޮށް، އެ ކްލަބުން ދައްކަންހުރި ހުރިހާ ފައިސާ އާއި އުޖޫރަ ދައްކާ ހަލާސްކުރުމާ ހަމަޔަށެވެ. އެގޮތުން އެ މުއްދަތުގައި އެފްއޭއެމްއިން ހިންގާ އެއްވެސް ހަރަކާތެއްގައި ނިއުއަށް ބައިވެރިނުވެވޭނެއެވެ.

ނަމަވެސް ނިއު އިން ބުނީ، 2016 ވަނަ އަހަރުން ފެށިގެން އެފްއޭއެމުން އެ ކްލަބަށް ދޭންޖެހޭ ފައިސާ މިއަދާ ހަމަޔަށްވެސް ލިބިފައިނުވާ ކަމަށާއި، މި ފިޔަވަޅަކީ އެފްއޭއެމުން އަމަލުކުރަމުންދާ ގޮތުން ދިވެހި ފުޓުބޯޅައަށް ލިބެމުންދާ އިޔާދަނުކުރެވޭ ގެއްލުންތަކުގެ ސަބަބުން އެ ކްލަބުން އިސްވެ އޮވެ ފުރަތަމަ ޑިވިޝަންގެ އެއް ކްލަބް ފިޔަވައި އެހެން ހުރިހާ ކްލަބަކާއި، ދެވަނަ އަދި ތިންވަނަ ޑިވިޝަނުގެ ގިނަ ކްލަބްތަކެއް ހިމެނޭގޮތަށް އެފްއޭއެމްގެ ކޮންގްރެސްއެއް ބާއްވަން މަސައްކަތްކުރާތީ އެޅި ޒާތީ ފިޔަވަޅެއްކަމަށް ދެކޭ ކަމަށެވެ.