ގަވާއިދާ ހިލާފަށް އުޅެމުންދާ ބިދޭސީން ގަވާއިދާ އެއްގޮތަށް ބަދަލުކުރުމަށްޓަކައި ފީ ނުނަގާ ގޮތަށް ނިންމައި ވާރކް ވިސާ ގަވާއިދަށް ގެނައި ބަދަލު، ބާތިލްކޮށްފިއެވެ. 

މޯލްޑިވްސް އިމިގްރޭޝަނުން ނެރުނު ބަޔާނެއްގައި ބުނެފައި ވަނީ ވާރކް ވިސާ ގަވާއިދަށް ގެނައި އާދީއްތަ ދުވަހު ގެޒެޓްކުރުމަށް ފަހު ބާތިލްކުރީ އިމިގްރޭޝަންގެ މެންޑޭޓަށް ބަދަލު ގެނެސް، އިމިގްރޭޝަނުން ކުރަމުން ދިޔަ ބައެއް މަސައްކަތް އިކޮނޮމިކް މިނިސްޓްރީ އަށް ބަދަލުކުރުމާ ގުޅިގެންނެވެ. 

ގަވާއިދަށް ގެނައި އިސްލާހު ބާތިލްކުރުމުގެ ކުރިން، ގަވާއިދާ ހިލާފަށް އުޅޭ ބިދޭސީއަކު ގަވާއިދާ އެއްގޮތަށް ބަދަލުކުރުމަށް 6،000ރ. ދައްކަންޖެހެއެވެ. އެ ގޮތަށް ގަވާއިދު ބަދަލުކުރީ ގަވާއިދާ ހިލާފަށް އުޅޭ ބިދޭސީން މަދުކުރުމުގެ ގޮތުންނެވެ. 

ގަވާއިދާ ހިލާފަށް އުޅޭ ބިދޭސީން މަދުކޮށް، ގަވާއިދާ އެއްގޮތަށް ބިދޭސީން ބަދަލުކުރުމަށް ފަށާފައިވާ ޕްރޮގްރާމަށް ތަރުހީބު ބޮޑުކުރުމަށްޓަކައި، ގަވާއިދާ އެއްގޮތަށް ބިދޭސީން ބަދަލުކުރުމަށް ފީ ނުނެގުމަށް އިއްޔެ ގެޒެޓްކުރި އިސްލާހުގައި ވެއެވެ. 

ބިދޭސީން މުވައްޒަފުންގެ ކަންކަން ބެލެހެއްޓުން އިކޮނޮމިކް މިނިސްޓްރީގެ ދަށަށް ބަދަލުކޮށްފައި ވުމުން، އެ އިސްލާހު ބާތިލްކުރީ ކަމަށް އިމިގްރޭޝަންގެ އިއުލާނުގައި ބުނެފައި ވެއެވެ. މި އިސްލާހު ބާތިލްކުރުމާ ގުޅިގެން، ގަވާއިދާ އެއްގޮތަށް ބިދޭސީން ބަދަލުކުރުމަށް ދައްކަންޖެހޭ 6،000ރ. ދައްކަންޖެހޭނެ ކަމަށް ވެސް އިމިގްރޭޝަނުން ބުނެއެވެ. 

ބިދޭސީ މަސައްކަތްތެރިން ރާއްޖެ އަށް އެތެރެވުމަށް ހުއްދަ ދޫކުރުމާ ގުޅޭ ކަންކަން އިމިގްރޭޝަންގެ އަތުން އަތުލައި އިކޮނޮމިކް މިނިސްޓްރީއިން ފަށާފައިވަނީ މާޗް މަހުން ފެށިގެންނެވެ. ރާއްޖޭގައި ގަވާއިދާ ޚިލާފަށް 63،000 އަށް ވުރެ ގިނަ ބިދޭސީން އުޅޭ ކަމަށް މީގެ ކުރިން އިމިގްރޭޝަނުން ބުނެފައި ވެއެވެ.