ނަޝީދުގެ ހުވަަފެން ބިލާހަކަށް ހަދާނަން: ގާސިމް

ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ހުވަފެންތައް ބިލާހަކަށް ހައްދަވާނެ ކަމަށް، ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ ރައީސް ގާސިމް އިބްރާހިމް ވިދާޅުވެއްޖެ އެވެ.

"އަޅުގަނޑުމެން ރައީސް ނަޝީދަށް އެ ފެނިވަޑައިގަންނަވާ ހުވަަފެން ބިލާހަކަށް ހަދާނަން. އާދެ، އެމަނިކުފާނު އެ ދެކެވަޑައިގަންނަވާ ކަންތައްތައް އެމަނިކުފާނަށް އެގޮތުގައި ހާސިލެއް ނުކުރެވޭނެ،" ރައީސް ނަޝީދު މަސައްކަތް ކުރައްވަނީ ބަރުލަމާނީ ނިޒާމަށް ބަދަލުކުރަންކަން ފާހަގަ ކުރައްވައި ޤާސިމް ވިދާޅުވި އެވެ.

އދ. މާމިގިލީގައި ބޭއްވި ކެމްޕޭން ޖަލްސާގައި ވާހަކަދައްކަވަމުން ޤާސިމް ވދިާޅުވީ ޕީޕީއެމް/ޕީއެންސީއާއެކު ކޯލިޝަން ހަދަންޖެހުނީ އެމްޑީޕީން ދޫ ނުދިނުމުގެ ސަބަބުން ކަމަށާއި، އެއީ އެމްޑީޕީން ނިންމި ވަރަށް އަމިއްލަ އެދުން ބޮޑު ނިންމުމެއް ކަމަށެވެ.

ޖޭޕީއަށް 22 ގޮނޑި ދިނުމަށް ރައީސް އިބްރާހިމް މުހައްމަދު ސޯލިހް ބޭނުންްފުޅުވެވަޑައިގެންނެވިކަން އެނގިވަޑައިގެންނެވި ކަމަށް ޤާސިމް ވިދާޅުވި އެވެ. ނަމަވެސް ހީލަތްތެރި ރޭވުމަކުން އެކަން ވިޔަނުދިނީ ކާކުކަންވެސް އެނގިވަޑައިގަންނަވާކަމަށް ޤާސިމް ވިދާޅުވި އެވެ.

ޤާސިމް ވދިާޅުވީ މިތުރުގެ ގޮތުގައި ތިބި ބަޔަކު ހަތުރުންނަށްވުމަކީ، އަދި ހަތުރުންގެ ގޮތުގައި ތިބި ބަޔަކު މިތުރުންނަށް ވުމަކީ އިލާހީ ޤާނޫނު ކަމަށެވެ. އެ މޭރުމުން ވާހަކަ ކުރިއަށްގެންދަވަމުުން އެ މަނިކުފާނު ވިދާޅުވީ އެއްވެސް މީހަކަށް ބަދަލު ހިފުމުގެ ރޭހެއް ނުގެންގުޅުއްވާ ކަމަށެވެ. މީހަކު ކިތަންމެ ވަރަކަށް އެއްޗެ ކީ ނަމަވެސް، އަނެއް ދުވަހު އެކަމެއް ހަނދާނުގައި ނުހުންނަވާ ކަމަށް ޤާސިމް ވިދާޅުވި އެވެ.

ޖަލްސާއަށް ސަރުކާރުގެ ބައެއް މިނިސްޓަރުން ވަޑައިގެން ތިއްބެވިކަން ފާހަގަކުރައްވައި ޤާސިމް ވިދާޅުވީ އެ މަނިކުފާނަކީ ދައުލަތުގެ ދެވަނަ އަށް އެންމެ ބާރުގަދަ މީހާ ކަމަށެވެ. އޭނާއަކީ ރައްޔިތުންގެ މަޖިލީހުގެ ރައީސްކަމަށާއި، ކިތަންމެ ގަބޫލުކުރަން ބޭނުން ނުވިނަމަވެސް އެއީ ގަބޫލުކުރަންޖެހޭ ހަޤީޤަތްކަމަށް ޤާސިމް ވިދާޅުވި އެވެ.

"މިއަދުވެސް އަޅުގަނޑު މި ގައުމުގެ ވެރިކަމާއި ހަވާލުވާންޖެހޭ ހާލަތު އެބަހުރި މި ޤައުމުގެ ޤާނޫނު އަސާސީގައި މެދުވެރިވެފައި. އެ ވާހަކަ ދަންނަވާކަށެއް ނޫން އަޅުގަނޑު މި ދަންނަވަނީ،" ޤާސިމް ވިދާޅުވި އެވެ.

ޤާނޫނު އަސާސީގައި ބުނެފައިވާގޮތުން ރައީސުލްޖުމްހޫރިއްޔާއަކު ނެތް ހާލަތުގައި ޤައުމުގެ ވެރިކަމާއި ހަވާލުވެވަޑައިގަންނަވަންޖެހޭނީ ނައިބް ރައީސް އެވެ. ރައްޔިތުންގެ މަޖިލީހުގެ ރައީސް ވެރިކަމާއި ހަވާލުވެވަޑައިގަންނަވަންޖެހޭނީ ރައީސުލްޖުމްހޫރިއްޔާ އާއި، ނައިބް ރައީސްވެސް ނެތިއްޖެ ހާލަތެއްގައި ކަމަށް ޤާނޫނު އަސާސީގައި ބުނެފައިވެއެވެ.