އެތައް ފަހަރެއްގެ މަތިން ފަސްވެފައިވާ ތައިލެންޑްގެ އާއްމު އިންތިޚާބުގެ ވޯޓުލުން ނިންމައި ވޯޓް ގުނުމުގެ މަސައްކަތް ފަށަފައިފިއެވެ.

އާދީއްތަ ދުވަހު ބޭއްވި އިންތިޚާބުގެ ވޯޓު ގުނަން ފަށާފައި ވަނީ ވޯޓްލުމަށް ނުވަ ގަޑިއިރު ދިނުމަށްފަހު ހަވީރު ފަހެއް ޖެހިއިރުއެވެ.

މިއީ މި އިންތިޚާބުގައި ވާދަކުރައްވާ އަސްކަރިއްޔާގެ ކުރީގެ ޖެނެރަލް ޕްރަޔުތު ޗަން އޯޗާ އިސްވެ ހުންނަވައި މީގެ ފަސް އަހަރުކުރިން އެ ގައުމަށް ގެނައި ބަގާވާތަށްފަހު ބާއްވާ ފުރަތަމަ އިންތިޚާބެވެ.

މި އިންތިޚާބާއެެކު އިންތިޚާބީ ބޮޑުވަޒީރެއްގެ ގޮތުގައި ޕްރަޔުތު މަގާމަށް ވަޑައިގަތުމުގެ ފުރުސަތު ބޮޑު ކަމަށް މަސްރަހު ދިރާސާ ކުރާފަރާތްތަކުން ދެކެއެވެ.

އެ އިންތިޚާބުގައި ވޯޓުލުމުގެ ހައްގު 52 މިލިއަން މީހުންނަށް ލިބިފައިވާއިރު ހަތް މިލިއަނެއްހާ މީހުންނަކީ އަލަށް ވޯޓްލާ ފަރާތްތަކެވެ.

އާ ގާނޫނު އަސާސީއެއްގެ ދަށުން ބޭއްވޭ އިންތިޚާބަކަށްވާއިރު އެ ގާނޫނުއަސާސީ އެކުލަވާލާފައި ވަނީ ސިޔާސީ ޕާޓީއަކުން އަޣުލަބިއްޔަތު ހޯދައި ރައްޔިތުންގެ ސަރުކާރެއް އެކުލަވާލުމަށް ދަތިވާނެ ގޮތަށެވެ.

ގާނޫނު ހަދާ މަޖިލީހުގެ ތިރިގޭގައި 500 މެމްބަރުން ތިއްބަވާއިރު މަތިގެއަކީ އަސްކަރިއްޔާއިން އައްްޔަންކުރާ މަޖިލީހެކެވެ.

ތިރިގޭގެ އަޣުލަބިއްޔަތު މިހާރުގެ ބޮޑުވަޒީރު ޕްރަޔުތު ހޯއްދަވާނެ ކަމަށް ބެލެވޭއިރު މަތިގޭގައި ހިމެނޭ 250 ގޮނޑިއާއެކު ޕްރަޔުތަށް ބޮޑުވަޒީރު ކަމަށް ވަޑައިގެންނެވުމުގެ ފުރުސަތު ވަނީ ބޮޑުވެފައެވެ.

ވޯޓު ގުނުމުގެ މަސައްކަތް 93،000 މަރުކަޒެއްގައި ކުރިޔަށްދާއިރު އިލެކްޝަންސް ކޮމިޝަނުް ރިޕޯޓަރުންނާ ވާހަކަ ދައްކުން ބުނެފައި ވަނީ ވޯޓްލުމަށް ނުކުތް ނިސްބަތް ގިނަ ކަމަށެވެ.

މިދިޔަ ހަފްތާގައި ކުރިޔަށް ގެންދިޔަ އަރލީ ވޯޓިންގައި 87 އިންސައްތަ މީހުން ވޯޓްލާފައިވެއެވެ.