ރިޔާސީ ކޮމިޝަންތައް އުފެއްދެވީ މަޖުބޫރު ވެގެން: ރައީސް

މަރާލެވިފައިވާ މީހުންގެ މައްސަލަތައް ބެލުމަށާއި ކޮރަޕްޝަންގެ މައްސަލަތައް ތަހުގީގު ކުރެއްވުމަށް ރިޔާސީ ކޮމިޝަންތައް އުފެއްދެވީ މަޖުބޫރުވެގެން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އާދިއްތަ ދުވަހު ށ.އަތޮޅު މިލަންދޫގައި އޮތް އެމްޑީޕީގެ ޓިކެޓުގައި މިލަންދޫ ދާއިރާއަށް ވާދަކުރައްވާ ކެންޑިޑޭޓު އަލީ ރިޒާގެ ކެމްޕެއިން ޖަލްސާގައި ދެއްކެވި ވާހަކަފުޅެއްގައި ރައީސް ސޯލިހު ވިދާޅުވީ ރިޔާސީ ކޮމިޝަންތައް އުފެއްދެވުމަކީ އެމަނިކުފާނުގެ ރިޔާސީ ވައުދެއް ފުރިހަމަ ކުރެއްވުމުގެ ގޮތުން ކުރެއްވި ކަމެއް ކަމަށެވެ. ނަމަވެސް މި ކޮމިޝަންތަކަށް ބޭނުންވާ ގާނޫނީ ބާރުވެރިކަން ދެއްވުމަށް މަޖިލީހުގެ ތެރެއިން އެމަނިކުފާނަށް އެއްވެސް އެއްބާރުލުމެއް ލިބިވަޑައިގެންފައި ނުވާ ކަމަށް ވެސް ރައީސް ވިދާޅުވިއެވެ.

ރައީސް ސޯލިހު ވިދާޅުވީ މިކަންކަން ތަހުގީގު ކުރުމުގެ ބާރުވެރިކަން ދީފައި އޮތް މިނިވަން މުއައްސަސާތައް އޮތްކަން ގަބޫލުފުޅު ކުރައްވާ ކަމަށެވެ. ނަމަވެސް ރައީސް ޔާމިންގެ ވެރިކަމުގައި ފެނިގެން ދިޔައީ މި މުއައްސަސާތަކުން މިކަންކަން ތަހުގީގު ކުރަން ނުކުޅެދިފައި އޮތް މަންޒަރު ކަމަށް ރައީސް ވިދާޅުވިއެވެ. އޭގެ ބަދަލުގައި ފެނިގެން ދިޔަ މަންޒަރަކީ އެ މުއައްސަސާތަކުން ވަކި ބަޔަކަށް އަމާޒުކޮށްގެން ތަހުގީގުތައް ހިންގަމުން ދިޔަ މަންޒަރު ކަމަށް ވިދާޅުވެ އެމަނިކުފާނު ވަނީ ކަންބޮޑުވުން ފާޅުކުރައްވާފައެވެ. އަދި އެ މުއައްސަސާތަކުގެ ވާޖިބު ރަނގަޅަށް އަދާ ކުރިނަމަ އެއްވެސް ކޮމިޝަނެއް އުފައްދަވަން ނުޖެހޭނެ ކަމަށް ވިދާޅުވެ ރައީސް ވަނީ އިދިކޮޅު ފަރާތްތަކަށް ރައްދު ދެއްވާފައެވެ. ރައީސް ވަނީ މިނިވަން މުއައްސަސާތަކަށް ރައްޔިތުން ކުރާ އިތުބާރު ގެއްލިފައިވާ ކަމަށް ވެސް ވިދާޅުވެފައެވެ.

އެމްޑީޕީގެ ގިނަ އަދަދެއްގެ މަޖިލިސް މެމްބަރުންތަކެއް މަޖިލީހަށް ހޮއްވަވަން ޖެހޭ ސަބަބަކީ ވެސް އެއީ ކަމަށް ރައީސް ސޯލިހު ވިދާޅުވެ ރައީސް ވަނީ އެ ޕާޓީގެ މެމްބަރުންނަށް ވޯޓު ދެއްވުމަށް ރައްޔިތުންގެ އަރިހުން އެދިވަޑައިގެންފައެވެ. އަދި އެޖެންޑާ 19ގެ ކެމްޕެއިނަށް ނިކުމެ މި ހުންނެވީ އެ ސަބަބަށްޓަކައި ކަަމަށް ރައީސް ވަނީ ވިދާޅުވެފައެވެ. އަދި މި ހިނގާ މަޖިލީހުން ރައީސްގެ މަސައްކަތަށް އެއްބާރުލުމެއް ނުދިން ކަމުގައިވީ ނަމަވެސް އެމްޑީޕީގެ އަގުލަބިއްޔަތު އޮތް މަޖިލިހެއްގައި މިކަން ކުރެވޭނެ ކަމާ ދޭތެރޭ އެއްވެސް ޝައްކެއް ނުކުރައްވާ ކަމަށް ވެސް ރައީސް ވިދާޅުވިއެވެ.

އެމްޑީޕީގެ އެޖެންޑާ 19ގެ ކެމްޕެއިންގައި ބައިވެރިވުމަށް ރައީސް ކުރައްވާ ދެ ދުވަހުގެ ދަތުރުފުޅުގައި މިހާތަނަށް ށ.އަތޮޅުގެ ހަތަރު ރަށަކަށް ޒިޔާރަތްކޮށް އެ ރަށްރަށުގެ ރައްޔިތުންނާ ކައުންސިލް އަދި މުއައްސަސާތަކުގެ ވެރިންނާ އެކު ރައީސް ވަނީ ބައްދަލު ކުރައްވާފައެވެ. އެގޮތުން ރައީސް ހޮނިިހިރު ދުވަހު ވަޑައިގެންނެވީ ކޮމަންޑޫ، ފުނަދޫ އަދި ފޯކައިދޫއަށެވެ. ރައީސްގެ ށ.އަތޮޅަށް ކުރައްވާ ދަތުރުފުޅުު ނިންމަވާލައްވާނީ އެ އަތޮޅޫ ފޭދޫއަށް ޒިޔާރަތް ކުރެއްވުމަށް ފަހުގައެވެ.