ޖާނުން ފިދާވެގެން ކާރެއް ގޮއްވާލައި، ސޯމާލިއާގެ ވެރިރަށް މޮގަދިޝޫގައި ހުންނަ ސަރުކާރުގެ އިމާރާތަކަށް ހޮނިހިރު ދުވަހު ދިން ހަމަލާގައި ފަސް މީހަކު މަރުވެފައިވާ ކަމަށް އެ ގައުމުގެ ފުލުހުން ބުނެފިއެވެ. 

މި ހަމަލާގައި ސޯމާލިއާގެ ލޭބާ މިނިސްޓަރުގެ ނައިބް ވެސް ވަނީ އަވަހާރަވެފަ އެވެ. 

ކާރު ގޮއްވާލުމަށް ފަހު ހަނގުރާމަވެރިން ތެރެއިން ފަސް މީހަކު ވަނީ ލޭބާ މިނިސްޓްރީގެ އިމާރާތައް ގަދަކަމުން ވަދެ އެމީހުންގެ ބެލުމުގެ ދަށަށް އިމާރާތް ގެންގޮސްފައެވެ.

ސޯމާލިއާގެ ފުލުހުންނާއި އެމީހުންނާއި ދެމެދު ކުރިމަތިލުންތަކެއް ހިނގުމަށް ފަހު ސިފައިންގެ ކޮންޓްރޯލްގެ ދަށަށް އިމާރަތް ގެނެވުނީ ގަޑިއެއްހާ އިރު ފަހުން ކަމަށް ފުލުހުން ބުނެ އެވެ.

ލޭބާ އެންޑް ސޯޝަލް އެފެއާސްގެ ނައިބް ސާގަރް އިބްރާހިމް އަބްދުއްﷲ މަރާލާފައި ވަނީ ހަތިޔާރު އަޅައިގެން ތިބި މީހުން އިމާރާތުގެ އެންމެ ތިރީގައި ހުންނަ ފަންގިފިލާގައި ހުންނަ މިނިސްޓަރުގެ އޮފީހަށް ދިން ހަމަލާގައެވެ.  

އަލްގައިދާއާ ގުޅުން އޮންނަ އަލް ޝަބާބުން ޒިންމާ ނެގި މި ހަމާލާގައި 10 މީހަކު ޒަހަމްވެފައިވާ ކަމަށް ފުލުހުން ބުންޏެވެ.

ހޮނިހިރު ދުވަހަކީ އެހެން ގައުމުތަކާއި ހިލާފަށް ސޯމާލިއާގެ ސަރުކާރު ހުޅުވާފައި ހުންނަ ދުވަހެއް ކަމުން ހަމަލާ ދިން ގަޑީގައި އިމާރާތުގައި ގިނަ ބަޔަކު ތިއްބެވެ. އެ އިމާރާތް ހުންނަނީ ސޯމާލީ އިންޓެލިޖެންސް އެޖެންސީއާ މާދުރު ނޫން ހިސާބެއްގައެވެ.

ހަމަ މިފަދަ ގޮތަކަށް މޮގަދިޝޫގެ އެންމެ ބާރު ބޮޑު ސަރަހައްދަކަށް އަމާޒުކޮށް، މި އަހަރު ފެބްރުއަރީ މަހު ދިން ހަމަލާއެއްގައި 24 މީހަކު ވަނީ މަރާލާފައެވެ.  

އެފްރިކާގައި ހަރަކާތްތެރިވާ އިސްލާމީ ހަރުކަށި އަލް ޝަބާބް ޖަމާއަތުން ސޯމާލިއާގައި އިސްލާމީ ދައުލަތަކަށް ބަދަލުކުރުމަށް މަސައްކަތް ކުރަމުންދާތާ އެތައް އަހަރުތަކެއް ވެއްޖެއެވެ.

މޮގަދިޝޫ އިން އެ ޖަމާއަތް ފައްސާލާފައި ވާއިރުވެސް، އާއްމުންގެ ގިނަ މީހުން ޖަމާވާ ސަރަހައްދުތައް ކަމަށްވާ ހޮޓާތަކާއި ސަރުކާރުގެ އިމާރާތް ތަކަށް އަމާޒުކޮށް ދަނީ ހަމަލާތައް ދެމުންނެވެ.

އަލް ޝަބާބުން މައިގަނޑު ގޮތެއްގައި ހަރަކާތްތެރި ވަނީ ރަށްފުށު ހިސާބުގަނޑުގައެވެ.

މޮގަދިޝޫގައި ގާއިމްވެގެން ތިބޭ އެފްރިކާގެ ޕީސް ކީޕާސް ޖަމާއަތުން ދަނީ އަލް ޝަބާބުއާ ދެކޮޅަށް ސިފައިން ކުރަމުންދާ މަސައްކަތައް އެއްބާރުލުންދެމުންނެވެ.

އެފްރިކަން ޔޫނިއަން ޕީސް ކީޕާސް އަކީ އެފްރިކާ ބައްރުގައި ހިނގަމުންދާ ހަމަނުޖެހުންތައް ހުއްޓުވައި، ސުލްހަ ބަލަހައްޓާމުންދާ ސިފައިން ތަކެކެވެ.  

އެފްރިކަން ޔޫނިއަން މިޝަން އިން ސޫދާން (އޭއެމް އައިއެސް) އަކީ ސޫދާނުގެ ދާރުފޫރްގައި ހިނގަމުން ދިޔަ ހަމަނުޖެހުންތަކުގެ މެދުވެރިއެއްގެ ރޯލު އަދާކުރުމަށް 2004 ވަނަ އަހަރުގެ ޖުލައި މަހުގެ އުފެއްދި ޖަމާއަތެކެވެ.  

އަލް ޝަބާބުން ވަނީ ކެންޔާއިން ސޯމާލިއާގައި ޕީސްކީޕަރުން ބަހައްޓަން ނިންމުމުން ކެންޔާގެ ޕީސް ކީޕަރުންނަށްވެސް ހަމަލާދީފައެވެ.  

ފާއިތުވި މަސްތަކުގައި އެމެރިކާގެ ސިފައިން އިން ވަނީ އަލްޝަބާބަށް އަމާޒުކޮށް ވަރުގަދަ ހަމަލާތަކެއް ދީފައެވެ.