ޔޫރޯ ކޮލިފައިން: އިންގްލޭންޑާއި، ފްރާންސް މޮޅުވިއިރު، ޕޯޗުގަލް އެއްވަރުވެއްޖެ

ޔޫރޯ ކޮލިފައިންގައި އިންގްލޭންޑާއި، ފްރާންސް ކުޅުނު މެޗުތަކުން މޮޅުވިއިރު، ޕޯޗުގަލް އެއްވަރުވެއްޖެއެވެ.

ހުކުރު ދުވަހުގެ ރޭ ކޮލިފައިންގެ ގްރޫޕް އޭގައި ހިމެނޭ އިންގްލޭންޑް މޮޅުވީ ޗެކް ރިޕަބްލިކްއާ ވާދަކޮށް 0-5 ގެ ތަފާތު ބޮޑު ނަތީޖާއަކުންނެވެ.

ވެމްބްލީގައި ކުޅުނު މި މެޗު ފެށިގެން 24 ވަނަ މިނެޓުގައި އިންގްލޭންޑުން ވަނީ މެޗުގެ ލީޑު ނަގާފައެވެ. މި ލަނޑު ޖަޑޮން ސަންޗޯގެ އެހީތެރިކަމާ އެކު ކާމިޔާބުކުރީ ރަހީމް ސްޓާލިންއެވެ.

މި ލަނޑަށް ފަހު ވެސް އިންގްލޭންޑްގެ ފަރާތުން މޮޅު ކުޅުމެއް ފެނިގެންދިޔައިރު، ފުރަތަމަ ހާފް ނިމުމުގެ ކުރިން އެ ޓީމުން ވަނީ ލީޑު ފުޅާކޮށްފައެވެ. މި ލަނޑު 45 ވަނަ މިނެޓުގައި ކާމިޔާބުކުރީ ލިބުނު ޕެނަލްޓީއަކުން ހެރީ ކޭންއެވެ.

ދެވަނަ ހާފް ފެށިގެން ވެސް އިންގްލޭންޑްގެ ފަރާތުން މޮޅު ކުޅުމެއް ފެނިގެންދިޔައިރު، 62 ވަނަ މިނެޓުގައި އެ ޓީމުން ވަނީ ތިންވަނަ ލަނޑު ޖަހާފައެވެ. އެ ލަނޑު ކާމިޔާބުކުރީ ސްޓާލިންއެވެ.

އިންގްލޭންޑްގެ ހަތަރުވަނަ ލަނޑު 68 ވަނަ މިނެޓުގައި ރޮސް ބާކްލީގެ އެހީތެރިކަމާ އެކު ސްޓާލިން ކާމިޔާބުކުރިއިރު، 84 ވަނަ މިނެޓުގައި އިންގްލޭންޑުން ވަނީ ފަސް ވަނަ ލަނޑު ކާމިޔާބުކޮށްފައެވެ. މި ލަނޑަކީ ޗެކް ރިޕަބްލިކްގެ ތޯމަސް ކަލަސް އަތުން ބައިކޮޅަށް ވަތް ލަނޑެކެވެ.

މި ގްރޫޕްގައި ހިމެނޭ ބަލްގޭރިއާ އާއި މޮންޓެނެގްރޯ ބައްދަލުކުރި މެޗު ނިމުނީ 1-1 ގެ ނަތީޖާއިން އެއްވަރުވެގެންނެވެ.

މި ނަތީޖާއާއެކު ފަސް ޓީމު ހިމެނޭ މި ގްރޫޕްގެ އެއްވަނައިގައި ތިން ޕޮއިންޓާއެކު އޮތީ އިންގްލޭންޑެވެ. މޮންޓެނެގްރޯ އާއި ބަލްގޭރިއާއަށް އެއް ޕޮއިންޓް ލިބިފައިވާއިރު، ޗެކް ރިޕަބްލިކް އަދި މެޗެއް ނުކުޅެ އޮތް ކޮސޯވޯ އަށް އެއްވެސް ޕޮއިންޓެއް ނުލިބެއެވެ.

ހުކުރު ދުވަހުގެ ރޭ ކޮލިފައިންގެ ގްރޫޕް އެޗްގައި ހިމެނޭ ފްރާންސް މޮޅުވީ މޮލްޑޮވާއާ ވާދަކޮށް 1-4 ގެ ނަތީޖާއަކުންނެވެ.

މޮލްޑޯވާ ދަނޑުގައި ކުޅުނު މި މެޗު ފެށިގެން 24 ވަނަ މިނެޓުގައި ފްރާންސުން ވަނީ މެޗުގެ ލީޑު ނަގާފައެވެ. މި ލަނޑު ޕައުލް ޕޮގްބާގެ އެހީތެރިކަމާއެކު ކާމިޔާބުކުރީ އެންޓޯނިއޯ ގްރިޒްމަންއެވެ.

މި ލަނޑަށްފަހުވެސް ފްރާންސުން ދިޔައީ މޮޅު ކުޅުމެއް ދައްކަމުންނެވެ. އެގޮތުން 27 ވަނަ މިނެޓުގައި ފްރާންސުން ވަނީ ލީޑު ފުޅާކޮށްފައެވެ. މި ލަނޑު ކާމިޔާބުކުރީ ގްރިޒްމަންގެ އެހީތެރިކަމާ އެކު ރަފައެލް ވަރާންއެވެ.

ފުރަތަމަ ހާފް ނިމުމުގެ ކުރިން ފްރާންސުން ވަނީ ތިންވަނަ ލަނޑު ކާމިޔާބުކޮށްފައެވެ. މި ލަނޑު ބްލައިސް މަޓުއިޑީގެ އެހީތެރިކަމާ އެކު ކާމިޔާބުކުރީ އޮލިވާ ޖިރޫއެވެ.

ދެވަނަ ހާފް ފެށިގެން ވެސް ފްރާންސްގެ ފަރާތުން ގިނަ ހަމަލާތަކެއް ފެނިގެން ގޮސްފައިވާއިރު، އެޓީމުގެ ހަތަރުވަނަ ލަނޑު 87 ވަނަ މިނެޓުގައި ކާމިޔާބުކުރީ ކީލިއަން އެމްބަޕޭއެވެ. މި ލަނޑު އޭނާ ކާމިޔާބުކުރީ ތޯމަސް ލެމާގެ އެހީތެރިކަމާ އެކުގައެވެ.

މެޗުގައި މޮލްޑޯވާގެ ފަރާތުން ފެނިގެންދިޔަ ހަމައެކަނި ލަނޑު 89 ވަނަ މިނެޓުގައި ކާމިޔާބުކުރީ ވްލަޑިމިރް އަމްބްރޮސްއެވެ.

މި ގްރޫޕްގައި ހިމެނޭ އައިސްލޭންޑުން އެންޑޯރާގެ މައްޗަށް 0-2 ގެ ނަތީޖާއިން ކުރިހޯދާފައިވާއިރު، ތުރުކީން ވަނީ 0-2 ގެ ނަތީޖާއިން އަލްބޭނިއާގެ މައްޗަށް ކުރިހޯދާފައެވެ.

ހަ ޓީމު ހިމެނޭ މި ގްރޫޕްގައި ފްރާންސާއި، އައިސްލޭންޑް އަދި ތުރުކީއަށް ތިން ޕޮއިންޓް ލިބިފައިވާއިރު، އަލްބޭނިއާ އާއި އެންޑޯރާ އަދި މޮލްޑޯވާއަށް އެއްވެސް ޕޮއިންޓެއް ލިބިފައެއް ނުވެއެވެ.

ހުކުރު ދުވަހުގެ ރޭ ގްރޫޕް ބީގައި ހިމެނޭ ޕޯޗުގަލް އެއްވަރުވީ ޔޫކްރެއިންއާ ވާދަކޮށް 0-0 ގެ ނަތީޖާއަކުންނެވެ.

ޕޯޗުގަލް ދަނޑުގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔައިރު، ލަނޑު ޖެހުމަށް ވެސް ރަނގަޅު ފުރުސަތުތަކެއް ވެސް ވަނީ ލިބި ބޭކާރުވެފައެވެ.

މުޅި މެޗުގައި ޕޯޗުގަލްއަށް ލީޑު ނެގުމަށް ގިނަ ފުރުސަތުތަކެއް ލިބި ބޭކާރުވިއެވެ. އެގޮތުން މެދުކެނޑުމަކަށް ފަހު ގައުމީ ޓީމުގައި ހިމެނުނު ކްރިސްޓިއާނޯ ރޮނާލްޑޯއަށް ލިބުނު ހުސް ފުރުސަތުތައް ހިމެނެއެވެ.

މި ގްރޫޕްގައި ހިމެނޭ ލިތުއޭނިއާގެ މައްޗަށް ލަގްޒެމްބާގް ވަނީ 1-2 ގެ ނަތީޖާއިން ކުރިހޯދާފައެވެ.

ފަސް ޓީމު ހިމެނޭ މި ގްރޫޕްގެ އެއްވަނައިގައި ތިން ޕޮއިންޓާއެކު ލަގްޒެމްބާގް އޮތްއިރު، ޕޯޗުގަލް އާއި ޔޫކްރެއިންއަށް ލިބިފައިވަނީ އެއް ޕޮއިންޓެވެ. ލިތުއޭނިއާ އާއި މެޗެއް ކުޅެފައިނުވާ ސާބިއާއަށް ޕޮއިންޓެއް ނުލިބެއެވެ.