ކުރިޔަށް އޮތް ރައްޔިތުންގެ މަޖިލީހުގެ އިންތިހާބުގައި ރ. އަތޮޅުގެ ދާއިރާތަކަށް އެމްޑީޕީގެ ޓިކެޓުގައި ވާދަކުރައްވާ ކެނޑިޓޭޓުންގެ ހާއްސަ ޖަލްސާއަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރ. އަލިފުއްޓަށް ވަޑައިގަތުމުން އެ ރަށުގެ ރައްޔިތުން ރައީސުލްޖުމްހޫރިއްޔާއަށް ހޫނު މަރުހަބާއެއް ދަންނަވައިފިއެވެ.
ހުކުރު ދުވަހުގެ ހަވީރުގެ ވަގުތެއްގައި ރައީސް އަލިފުށްޓަށް ވަޑައިގަތުމުން މަރުހަބާ ދަންނަވަން އަލިފުށީ ދާއިރާގެ މެމްބަރު މުހައްމަދު ހުސައިން ރަޝީދު (ބިގޭ)ގެ އިތުރުން އެ އަތޮޅުގެ އެހެން ދާއިރާތަކަށް ކުރިމަތިލައްފައިވާ އެމްޑީޕީގެ ކެނޑިޑޭޓުން އަދި ރ.އަތޮޅު ކައުންސިލްގެ ރައީސް ވެސް ބައިވެރިވެވަޑައިގެންނެވިއެވެ.
ރައީސްއަށް މަރުހަބާ ދަންނަވަން އެ ރަށުގެ ބަނދަރު ސަރަހައްދަށް ގިނަ އަދަދެއްގެ ރައްޔިތުން ޖަމާވެފައިވާ އިރު، ރައީސް ސޯލިހު ވަނީ ރަށަށް ފައިބާވަޑައިގަތުމަށް ފަހު އެ ރަށުގެ ރައްޔިތުންނާއި އެކު ފޮޓޯ ނެންގެވުމަށް ބަނދަރު ސަރަހައްދުގައި މަޑުކުރައްވާފައެވެ. ބަނދަރު ސަރަހައްދުން ރައިސް ވަޑައިގެންނެވީ އަލިފުށީ ސްކޫލްގައި އަޅަން ނިންމާފައިވާ މަލްޓި ޕާރޕަސް ހޯލްގެ ބިންގާ އަޅައިދެއްވުމަށެވެ.
ރައީސްގެ މި ދަތުރުފުޅަކީ ރ.އަތޮޅުގެ އެޖެންޑާ 19 ކެމްޕެއިން ރަސްމީކޮށް ފެއްޓެވުމުގެ ގޮތުން ކުރައްވާ ދަތުރުފުޅެކެވެ. މި ދަތުރުފުޅު ނިންމަވާލެއްވުމަށް ފަހު ހޮނިހިރު ދުވަހުގެ ވަގުތެއްގައި ރައީސް ވަޑައިގަންނަވަން ހަމަޖެހިފައިވަނީ ށ.އަތޮޅުގެ ދާއިރާތަކަށް އެމްޑީޕީގެ ފަރާތުން ވާދަކުރައްވާ ކެނޑިޑޭޓުންގެ ކެމްޕެއިން ފައްޓަވައިދެއްވުމަށް ށ.އަތޮޅަށެވެ. އެގޮތުން ރައީސް އެއްމެ ފުރަތަމަ ވަޑައިގަތުމަށް ހަމަޖެހިފައިވަނީ އެ އަތޮޅު ކޮމަންޑޫއަށެވެ.
