ކުރިއަށް އޮތް ދެހަފްތާތެރޭގައި މިސަރުކާރުގެ ބޯހިޔާވަހިކަމުގެ ފުރަތަމަ މަޝްރޫއު އިފްތިތާހް ކުރެވިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ކުރިއަށް އޮތް ރައްޔިތުންގެ މަޖިލީހުގައި ވާދަކުރައްވާ އެމްޑީޕީގެ ކެންޑިޑޭޓް އަލީ ނިޔާޒު ކެންޕޭން ހަފްލާގައި ވާހަކަފުޅުދައްކަވަމުން ރައީސް ސޯލިހު ވިދާޅުވީ ކުރިއަށް އޮތް ފަސް އަހަރު ދުވަހުގެ ތެރޭގައި ރާއްޖޭގައި ބޯހިޔާވަހިކަން ބޭނުންވެފައި ތިބި ހުރިހާ ފަރާތްތަކަށް މިސަރުކާރުން ބޯހިޔާވަހިކަން ފޯރުކޮށްދޭނެ ކަމަށެވެ.

އެއީ ވެށިފަހި މާލެކަމުގައި ވިޔަސް ހިޔާ މަޝްރޫއުކަމުގައި ވިޔަސް ނުވަތަ އެނޫން ވެސް މަޝްރޫއަކުން ފްލެޓަށް އެދިފައިވާ ނަމަ ބޯހިޔާވަހިކަން ފޯރުކޮށްދޭނެ ކަމަށް ރައީސް ވިދާޅުވިއެވެ. އެގޮތުން މާލެ ސަރަހައްދަށް އަމާޒުކޮށްގެން ކުރިއަށްގެންދާ ބޯހިޔާވަހިކަމުގެ މަޝްރޫއު ކުރިއަށް އޮތް ދެހަފްތާ ތެރޭގައި އިފްތިތާހްކޮށްދެއްވާނެ ކަމަށް އެމަނިކުފާނު ވިދާޅުވިއެވެ.

"މިދެންނެވި މަޝްރޫގެ ތެރެއިން މާލެ ސަރަހައްދަށް އަމާޒުކޮށްގެން ވަރަށް އަވަހަށް ކުރިއަށް އޮތް ދެހަފްތާއެއްގެ ތެރޭގައި އިރާދަކުއްރެއްވިއްޔާ އަޅުގަނޑުމެން މިބަލަނީ ފުރަތަމަ މަޝްރޫއު އިފްތިތާހް ކުރުމަށް" ރައީސް ސޯލިހު ވިދާޅުވިއެވެ. 

ރައީސް ސޯލިހު ވިދާޅުވީ މާލޭގައި ދިރިއުޅޭ ރައްޔިތުންނަށް ބޭނުންވާ ފްލެޓްތައް އެޅި މިހާރަށްވުރެ ހެޔޮއަގުގައި ރައްޔިތުންނަށް ފްލެޓް ލިބޭ ގޮތް ހަމަޖެހިގެންދާނެ ކަމަށެވެ.

ހުޅުމާލެއަށް އިޝާރާތް ކުރައްވާ ރައީސް ސޯލިހު ވިދާޅުވީ ހުޅުމާލޭ ތަރައްގީ ކުރަން ފެށި މަގުސަދު ގެއްލޭ ގޮތަށް ކުރީގެ ސަރުކާރުން އެތައް ކަމެއް ކޮށްފައިވާ ކަމަށެވެ. އަދި ހުޅުމާލެ ބިން ހިއްކާ ހުޅުމާލެ ތަރައްގީކުރަން ފެށީ މާލޭގައި ދިރިއުޅޭ މީހުންނަށް ލުޔެއް ހޯދައިދިނުމަށް ކަމަށާއި، ނަމަވެސް ހުޅުމާލޭގެ ފޭސް 2 މަޝްރޫއު ފެށިއިރު ވެސް މިމައްސަލައަށް ހައްލުނުލިބޭ ކަމަށް ރައީސް ސޯލިހު ވިދާޅުވިއެވެ.

"ރާއްޖޭގެ އާބާދީގެ ތިން ބައިކުޅަ އެއްބައި ދިރުއުޅެމުން މިގެންދަނީ މިމާލޭގައި. ގްރޭޓާ މާލޭ ސަރަހައްދުގަ. މިގޮތަށް ކުރިއަށްދާ ކަމަށްވަންޏާ ކުރިއަށް އޮތް 15 އަހަރު ދުވަހުގެ ތެރޭގައި ރާއްޖޭގެ ދެބައިކުޅަ އެއްބައި ދިރިއުޅޭނެތަނަކީ މިއި ކަމަށް ދިރާސާތަކުން އެބަދައްކާ. މިއީ އަޅުގަނޑު މިދެންނެވި ވާހަކައަކީ. މިވަގުތު ހުޅުމާލޭގަ އެކަނި ފަންސާސްހާސް މީހުން ދިރިއުޅެމުން އެބަ ގެންދޭ. އެހެންކަމުން މާލެ ސަރަހައްދަށް ލުޔެއް ހޯދުމަށްޓަކައި ކުރަންޖެހޭ ވަރަށް ގިނަކަންކަން އެބަހުރި" ރައީސް ސޯލިހު ވިދާޅުވިއެވެ.

ރައީސް ސޯލިހު ވިދާޅުވީ ރާއްޖޭގެ ރައްޔިތުން އެންމެ ބޮޑަށް ބޭނުންވަނީ ބޯހިޔާވަހިކަމުގެ އިތުރުން ވަޒީފާ ކަމަށާއި، މިމަސައްކަތް ހައްލުކުރުމަށް އަތޮޅުތެރޭގެ ރަށްތައް ވެސް ތަރައްގީ ކުރަންޖެހޭ ކަމަށެވެ. އަދި މިއަދާ ހަމައަށް އައިރު ވެސް ބޯހިޔާވަހިކަން ބޭނުންވަނީ ކިތައް ރައްޔިތުންކަން މިރާއްޖޭގައި ބެލިފައި ނެތް ކަމަށާއި، ނަމަވެސް މިހާރު މިދިރާސާ ކުރަމުންދާ ކަމަށް އެމަނިކުފާނު ވިދާޅުވި އެވެ. 

''އެދިރާސާ އިރާދާކުރެއްވިއްޔާ  ކުރެވި މިހާރު ކުރެވި ނިމެމުން މިދަނީ. އޭރުން އަޅުގަނޑުމެންނަށް ތަފްސީލުކޮށް އެނގޭނެ ރާއްޖޭގައި ބޯހިޔާވަހިކަން ބޭނުންވެފައި ތިބީ ކިތައް މީހުން ކޮށް ސަރަހައްދެއްގައިކަން. ކިތަންމެ އަވަހަށް ފްލެޓަށް ހުޅުވާލިކަމުގައި ވިޔަސް 22000 އަދި 25000 މީހުން ފޯމްލާތަން ފެނިގެން މިދަނީ. ރައްޔިތުންނަށް ލިބެމުންދާ އާމްދަނީއަކީ ކޮބައިކަން އެބަ އިނގޭ ދިރާސާތަކުން. އެހެންވީމަ ރައްޔިތުންނަށް ލިބޭ އާމްދަނީއާ އެމީހުންނަށް ސަރުކާރުން ފޯރުކޮށްދޭންޖެހޭ ސަރުކާރު ބޯހިޔާވަހިކަމާ އެބަޖެހޭ ގުޅުމެއް ބާއްވަން.'' ރައީސް ސޯލިހު ވިދާޅުވިއެވެ.

ކުރީގެ ސަރުކާރުން ކުރިއަށް ގެންދިޔަ ސޯޝަލް ހައުސިން ޔުނިޓްތަކަށް އަލިއަޅުއްވާލައްވާ ރައީސް ސޯލިހު ވިދާޅުވީ އެފްލެޓްތައް ހުރީ ރައްޔިތުންގެ އަތްފޯރާފަށުގަ ނޫން ކަމަށާއި، މިހާރު އިމާރާތް ކުރަމުންދާ ފްލެޓްތަކަކީ ރައްޔިތުން ދިރިއުޅުން ހެޔޮވާވަރުގެ ތަންތަން ނޫން ކަމަށެވެ. އަދި ފްލެޓްތަކަށް ގުރުލާގެންނާ، ގުރުނުލާ ބަހާފުހުރި ތަންތަނުގެ ތެރޭގައި ވުޖޫދުގަ ނެތް ފްލެޓްތައް އެބަހުރި ކަމަށް އެމަނިކުފާނު ވިދާޅުވިއެވެ.

މީގެ އިތުރުން ރައީސް ސޯލިހު ވިދާޅުވީ ރާއްޖޭގެ މިމައްސަލަތައް ހައްލުކުރުމަށް މަސައްކަތް ފަށާފައިވާއިރު، އެމަނިކުފާނުގެ ވައުދުތައް ފުއްދުމަށް މިކުރާ މަސައްކަތުގައި ގާނޫނީ ބާރުވެރިކަން ބޭނުންވާ ކަމަށެވެ. އަދި ސިޔާސަތުތައް ކަނޑައެޅުމުގަ ގާނޫނުގެ ބާރު ހޯދުމަށް ރައްޔިތުން މަޖިލީހުގެ މެޖޯރިޓީ ބޭނުންވާ ކަމަށާއި، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އަލީ ނިޔާޒު ހޮއްވަވާދެއްވުމަށް ރައީސް ވަނީ އެދިވަޑައިގެންފައެވެ.