ޗެލްސީގެ ކޯޗުކަމުން މައުރީޒިއޯ ސާރީ ވަކިކޮށްފިނަމަ، އޭނާ ހަވާލުވާނީ ރޯމާއާ ކަމަށް ރިޕޯޓްތައް ބުނެފިއެވެ.

ގޯލްޑޮޓްކޮމްއިން ބުނީ، މި ސީޒަނުގައި ޗެލްސީން ހޯދަމުން އަންނަ ދަށް ނަތީޖާތަކުގެ ސަބަބުން މި ސީޒަނަށްފަހު އޭނާ އެޓީމުގެ ކޯޗުކަމުން ވަކިކުރާނެ ކަމަށާއި، އޭނާ ހަވާލުވުން އެންމެ ގާތީ ރޯމާއާ ކަމަށެވެ.

ނަމަވެސް ދާދި ފަހުން ނޫސްވެރިންނަށް މައުލޫމާތު ދެމުން ސާރީ ބުނީ، އޭނާ ޗެލްސީއާއެކު ހަދާފައިވާ އެއްބަސްވުން ހަމަވާނީ ދެ ސީޒަނަށްފަހު ކަމަށާއި، އެގޮތުން އެހެން ޓީމަކާ ހަވާލުވުމަކީ ވަރަށް ދުރު ކަމެއް ކަމަށެވެ.

މި ސީޒަނުގެ ޕްރިމިއާ ލީގުގައި ޗެލްސީ މިހާތަނަށް ކުޅުނު 30 މެޗުގެ ތެރެއިން 17 މެޗުން އެޓީމު މޮޅުވިއިރު، ހަތް މެޗުން ވަނީ ބަލިވެފައެވެ. ބާކީ ހަ މެޗު ނިމުނީ އެއްވަރުވެގެންނެވެ. އެޓީމު އޮތީ 57 ޕޮއިންޓާއެކު ޕޮއިންޓް ތާޥަލުގެ ހަވަނައިގައެވެ.

ކުރިޔަށް އޮތް ސީޒަނުގެ ޗެމްޕިއަންސް ލީގުން ޗެލްސީ ޖާގައެއް ކަށަވަރުކުރަން ބޭނުންނަމަ، ޕޮއިންޓް ތާވަލުގެ ގަދަ ހަތަރަކުން ޖާގަ ކަށަވަރުކުރަންޖެހޭނެއެވެ. ނުވަތަ ޔޫރޮޕާ ލީގުގެ ޗެމްޕިއަންކަން އެޓީމު ހޯދަން ޖެހެއެވެ.

މިދިޔަ އަހަރުގެ ޖުލައި މަހު ޗެލްސީގެ ކޯޗުކަމާ ސާރީ ހަވާލުވުމަށްފަހު، މިހާތަނަށް އިރުޝާދުދިން 50 މެޗުގެ ތެރެއިން 32 މެޗުން އެޓީމު ވަނީ މޮޅުވެފައެވެ. ބާކީ 10 މެޗުން އެޓީމު ބަލިވިއިރު، 8 މެޗުން ވަނީ އެއްވަރުވެފައެވެ.