މަޖިލީހަށް ބޭނުންވަނީ، ރައްޔިތުންގެ އަޑު އަހާ، އިހުލާސްތެރި ބަޔެއް!

ރައްޔިތުންގެ މަޖިލީހުގެ އިންތިހާބު ބޯމަތިވެެފައިވާއިރު، މަޖިލީހުގެ މެމްބަރުކަމަށް ހޮވަންޖެހޭނީ އެވެނި، މިވެނި ބަޔަކުކަމަށް ބުނާ އަޑުތައް ވަނީ ގަދަވެފަ އެވެ. އެއް ބަޔަކު ދެކޭގޮތުގައި މަޖިލީހުގެ މެމްބަރުކަމަށް ހޮވަންޖެހޭނީ، ބޮޑު ވިޔަފާރިވެރިއެކެވެ. ނުވަތަ ނުފޫޒުގަދަ ސިޔާސީ މީހެކެވެ.

އަނެއް ބަޔަކު ދެކޭގޮތުގައި މަޖިލީހަށް އިންތިހާބުކުރަންޖެހޭނީ ޤާނޫނީ ވަކީލެެކެވެ. ނުވަތަ ޤާނޫނީ ދާއިރާއިން ތައުލީމް ހާސިލްކޮށްފައިވާ ފަރާތެކެވެ. އެގޮތަށް ގޮސް، މަޖިލީހަށް ހޮވަންޖެހޭ މީހުންނާއި، ހޮވަން ނުޖެހޭ މީހުންގެ ބޮޑު ލިސްޓެއް އެ މީހުން ކިޔާ އުޅެ އެވެ.

މި ދެންނެވި ބޮޑެތި ވިޔަފާރިވެރިން ދެކޭގޮތުގައި ރިސޯޓެއްގެ ރޫމް ބޯއީއެއްގެ ވަޒީފާއެއް އަދާކުރުމަކީ، ވަރަށް ދަށް މަސައްކަތެވެ. އެ މީހުންނަކީ، މަޖިލީހަށް ހޮވަން ހެޔޮވާވާރު ބައެއް ނޫނެވެ. އެއީ މުޅިން ނާގާބިލް ބަޔެކެވެ.

ހަމައެގޮތަށް މަސްވެރިޔަކު މަޖިލީހަށް އިންތިހާބުކުރުމަކީވެސް އެ މީހުން ދެކޭގޮތުގައި ކޮށްގެންވާނެކަމެއް ނޫނެވެ. އެއްވެސް ސިޔާސީ މަޤާމަކަށް އިންތިހާބުކުރާ ވަރަށްވުރެ، މަސްވެރިންނަކީ ނާޤާބިލް ބަޔެއްކަމަށް މި ދެންނެވި ވިޔަފާރިވެރިނާއި، ހިޔާނަތްތެރިން ދެކެވެ.

މިމީހުން އެގޮތަށް ވާހަކަދައްކަމުންގެންދާއިރު، ރައްޔިތުންގެ ކުރިމަތީގައި މިވަގުތު އޮތް ސުވާލަކީ، ޤާބިލް މީހަކީ ކޮބައިތޯ އެވެ. މަޖިލީހަށް ތިމަންމެން އިންތިހާބުކުރަންވީ ކާކުތޯ އެވެ.

ރައްޔިތުންގެ ހައްޤުތައް ހަނިކޮށް، މަދު ފައިސާކޮޅަކަށް ވޯޓު ވިއްކާލާ ބަޔަކަށް ރައްޔިތުންގެ ވޯޓު ދޭނީތޯ އެވެ. ނުވަތަ އަމިއްލަ ވިޔަފަރީގެ މަސްލަހަތު ހިމާޔަތްކުރާ ބޮޑެތި ހިޔާނަތްތެރިންނަށް އާނއެކޭ ބުނާނީތޯ އެވެ. ރާއްޖޭގެ ރަށްތައް ބޭރުގެ ފަރާތްތަކަށް ވިއްކާލުމަށް ފުރުސަތުދީ، ރައްޔިތުންގެ މާލިއްޔަތު ލޫޓުވާލިއިރު، ހެވިފަ އަތް ޖައްސަވަން އިން ބޭފުާޅކު ހޮވާނީތޯ އެވެ.

މިއީ ހައްތަހާވެސް ރައްޔިތުން މިއަދު ކުރިމަތިކުރަންޖެހޭ ސުވާލުތަކެވެ.

ރައްޔިތުން އެވެ. ރައްޔިތުންގެ މަޖިލީހަށް އިންތިހާބު ކުރަންވީ އިހުލާސްތެރި މީހަކަށެވެ. ތެދުވެރި، އަމާނަތްތެރި، ރައްޔިތުންގެ އަޑު އަހާ، ރައްޔިތުންގެ ކަންބޮޑުުވުންތައް ހިއްސާ ކުރެވޭނެ ޤާބިލް މީހަކަށެވެ. ހަމައެކަނި ރައްޔިތުންނަށް އަދަބު ދިނުމަށް ޤާނުނުތައް ހެދުމުގެ ބަދަލުގައި ރައްޔިތުންނަށް ފުރުސަތުތައް ފަހިކޮށްދޭނެ މީހުންނަށެވެ. ތަސައްވަރެއް އޮތް މީހަކަށެވެ. ވައްކަން ނުކުރާނެ މީހަކަށެވެ.

ޤައުމު އެދޭ ބަދަލުތައް ގެނެސްދޭނެ މީހުންނަށެވެ. ބޯހިޔާވެހިަކމުގެ މައްސަލައަށް ޤާނޫނު ހަދާ މަޖިލީހުން ހައއްލުތައް ހޯދައިދޭނެ މީހުންނަށެވެ. ރައްޔިތު މީހާގެ އަތްމަތި ތަނަވަސްކޮށްދޭނެ ފަދަ ސިޔާސަތެއް އޮތް މީހުންނަށެވެ. ކަރަންޓާއި، ފެނުގެ އަގު ހެޔޮ ކޮށްދިނުމާއި، ވަޒީފާގެ ފުރުސަތުތައް ފަހިކޮށްދިނުމާއި، އާމްދަނީން ޓެކްސް ނެގުމުގެ ވައުދުވާ މީހުންނަށެވެ.

އެހެން ނޫންކަމުގައިވާނަމަ ރައްޔިތުންނަށް އަނެއްކާވެސް ފެނިގެންދާނީ، ނިމުނު ފަސް އަހަރު ފެނުނު ކަހަލަ މަޖިލީހެކެވެ. ވައްކާއި، ހިޔާނާތާއި، ވައްކަންކުރުން ހައްދުފަހަނަ އަޅާފައި އޮތް މަޖިލީހެކެވެ. ރައްޔިތުންގެ އަޑު ނާހާ، ރައްޔިތުންނަށް ނޫނެކޭ ބުނެ ހިތުހުރިގޮތަށް ޤާނޫނުތައް ހަދާ މަޖިލީހެކެވެ. ބޭރުގެ ފަރާތްތަކަށް، ޤައުމު ވިއްކާލަން ވޯޓުދޭނެ ފަދަ މަޖިލީހެކެވެ.