ޕަޓޯ އެނބުރި ސައޮޕައުލޯއަށް ބަދަލުވަނީ

ޗައިނީޒް ސުޕަ ލީގުގެ ޓިއަންޖިން ގުއަންޖިއަން އަށް ކުޅެމުން އައި ބްރެޒިލްގެ ފޯވާޑް އެލެގްޒެންޑްރާ ޕަޓޯ އެނބުރި ސައޮޕައުލޯއަށް ބަދަލުވާން އުޅޭ ކަމަށް ރިޕޯޓްތައް ބުނެފިއެވެ.

އީއެސްޕީއެންއިން ބުނީ 2014 ވަނަ އަހަރާއި 2016 ވަނަ އަހަރާ ދެމެދު ޕަޓޯ ކުޅުނު ސައޮޕައުލޯއަށް އޭނާ އަލުން ބަދަލުވާން އުޅޭ ކަމަށާއި، އެ ކްލަބަށް އޭނާ ބަދަލުވަނީ ކުޑަ މުސާރައަކަށް ކަމަށެވެ.

ޕަޓޯ ވަނީ ދެ ސީޒަން ޗައިނާގައި ހޭދަކުރުމަށްފަހު ދާދި ފަހުން ޓިއަންޖިން ގުއަންޖިއަންއާއެކު އޭނާ ހަދާފައިވާ އެއްބަސްވުން ނިމުމަކަށް ގެނެސްފައެވެ. އޭނާ އެ ކްލަބަށް ބަދަލުވީ ވިޔަރެއާލް ދޫކޮށް 2017 ވަނަ އަހަރު 15.5 މިލިއަން ޕައުންޑަށެވެ.

ޕަޓޯ އޭނާގެ ކެރިޔަރު ފެށީ 2006 ވަނަ އަހަރު އިންޓަ މިލާނުންނެވެ. އެގޮތުން އޭނާ ވަނީ އެޓީމަށް ކުޅުނު 27 މެޗުގައި 12 ލަނޑު ކާމިޔާބުކޮށް، އެޓީމާއެކު ފީފާ ކްލަބް ވޯލްޑް ކަޕް އެއް ފަހަރު ކާމިޔާބުކޮށްފައެވެ.

އިންޓަ މިލާން ދޫކޮށްލުމަށްފަހު ޕަޓޯ އޭސީ މިލާނަށް ބަދަލުވީ 2007 ވަނަ އަހަރުގެ ސީޒަނުގައެވެ. އެގޮތުން އޭނާ ވަނީ އެޓީމަށް ކުޅުނު 150 މެޗުގައި 63 ލަނޑު ކާމިޔާބުކޮށް، އިޓާލިއަން ލީގު އެއްފަހަރު ކާމިޔާބުކޮށްފައެވެ.

އިޓަލީގެ ކުރީގެ ކުޅުންތެރިޔާ ފަބިއޯ ކަނަވާރޯގެ އިރުޝާދުގެ ދަށުން ޕަޓޯ ވަނީ ޓިއަންޖިން ގުއަންޖިއަންއަށް އޭނާ ކުޅުނު 60 މެޗުގައި 36 ލަނޑު ކާމިޔާބުކޮށްފައެވެ.

ބްރެޒިލްގެ ގައުމީ ޓީމަށް ކުޅުނު 27 މެޗުގައި 10 ލަނޑު ކާމިޔާބުކޮށްފައިވާ ޕަޓޯ ވަނީ ބްރެޒިލްގެ ޒުވާން ޓީމުތަކާއެކު ގިނަ ކާމިޔާބީތަކެއް ހޯދާފައެވެ.