ލިއޮނެލް މެސީ އާއި ކްރިސްޓިއާނޯ ރޮނާލްޑޯއަށް ވުރެން ކީލިން އެމްބަޕޭ ހުނަރުވެރިވެފައި މޮ ޅުކަމަށް ޖޯސޭ މޮރީނިއޯ ބުނެފިއެވެ.

އުމުރާއި ހުނަރުވެރި ކަމަށް ބަލާއިރު މެސީ އާއި ރޮނާލްޑޯއަށް ވުރެން ކީލިން އެމްބަޕޭ މޮޅު ކަމަށާއި އޭނާއަކީ ދުނިޔޭގެ އެންމެ އަގުބޮޑު ކުޅުންތެރިޔާ ކަމަށް ގަބޫލު ކުރާ ކަމަށް ޗެލްސީ އަދި ރިއަލްމެޑްރިޑަށް ކޯޗު ކޮށްދީފައިވާ ޖޯސޭ މޮރީނިއޯ ވަނީ ބުނެފައެވެ.

ބެލޮން ޑިއޯގައި ހަތަރު ވަނައަށް އެންމެ އަގުބޮޑު ކުޅުންތެރިޔާގެ ގޮތުގައި ހޮވިފައިވާ އެމްބަޕޭ ވަނީ އުމުރުން 21 އަހަރު ނުވަނިސް އެއް ވޯރލްޑްކަޕް އާއި ފްރާންސް ލީގް ދެ ފަހަރަށް ހޯދާފައެވެ.

އެމްބަޕޭ ވަނީ ޕީއެސްޖީއަށް ފްރާންސްގެ ލީގުގައި މިހާތަނަށް 50 މެޗު ކުޅެދީ 39 ލަނޑު ކާމިޔާބުކޮށްދީފައެވެ. ޗެމްޕިއަންސް ލީގުގައު ޕީއެސްޖީއަށް 16 މެޗު ކުޅެދީ އަށް ލަނޑު އެ ޓީމަށް ކާމިޔާބު ކޮށްދީފައިވާއިރު، ފްރާންސްގެ ޤައުމީ ޓީމަށް އެމްޕަޕޭ ވަނީ މިހާތަނަށް ކުޅެދިން ހަތް މެޗުން ހަތަރު ލަނޑު ކާމިޔާބު ކޮށްދީފައެވެ.

ޓްރާންސްފަރ މާކެޓުގައި ލިއޮނެލް މެސީ އަދި ކްރިސްޓިއާނޯ ރޮނާލްޑޯ އާއި އެމްބަޕޭގެ ތަފާތު ދައްކަމުން މޮރީނިއޯ ބުނެފައި ވަނީ އެމްބަޕޭ އަދި އުމުރުން ހަގު ކަމަށާއި އޭނާއަށް ކުރިއަށް ދިއުމަށް ވަރަށް ވަގުތު އެބައޮތް ކަމަށެވެ. އެމްބަޕޭ ފަދަ ކުޅުންތެރިއެއްގެ ވާހަކަ ދައްކާއިރު ކުރިއަށް އޮތް ފަސް އަހަރު ނުވަތަ 10 އަހަރު އޭނާ ހުންނާނެ ހިސާބެއްގެ ވާހަކަ ނުދެއްކުމަށާއި، އޭގެ ބަދަލުގައި މިހާރު ހުރި ހިސާބަށް ވިސްނުން ރަނގަޅު ކަމަށެވެ.

މޮރީނިއޯ އިތުރަށް ބުނީ އެމްބަޕޭގެ އުމުރާއި މިހާރު ހުރި ހިސާބަށް ބަލާއިރު ލިއޮނެލް މެސީ އާއި ކްރިސްޓިއާނޯ ރޮނާލްޑޯއަށް ވުރެން ދުނިޔޭގައި މި ވަގުތު ހުރި އެންމެ އަގުބޮޑު އަދި އެންމެ މޮޅު ކުޅުންތެރިޔާގެ ގޮތުގައި އެމްބަޕޭ ސިފަ ކުރަމުން މޮރީނިއޯ ބުނީ ޓްރާންސްފަރ މާކެޓުގައި އުމުރަކީ ވެސް އިސްކަމެއް ދީގެން ބަލާ ކަމެއް ކަމަށެވެ. އަދި އެމްބަޕޭއަކީ ގަބޫލް ކުރަން ދަތި ހުނަރެއް ކުޅުމުގައި ދައްކާ ކުޅުންތެރިއެއް ކަމަށެވެ.