މަރާމާތަށް ފަހު އައު ޓޭބަލް ޓެނިސް ހޯލް ހުޅުވައިފި

މަރާމާތަށް ފަހު ޗައިނާ މެޝިނަރީ އެންޖިނިއަރިންގ ކޯޕަރޭޝަން (ސީއެމްއީސީ) އެހީއާއެކު މަރާމާތުކުރި ޓޭބަލް ޓެނިސްގެ އައު ހޯލު ރަސްމީކޮށް ހުޅުވައިފިއެވެ.

އައު ޓޭބަލްޓެނިސް ހޯލު ހަދާފައިވަނީ މީގެ ކުރިންވެސް ޓޭބަލްޓެނިސް މުބާރާތްތައް ބޭއްވުމަށާއި ފަރިތަކުރުންތަކަށް ބޭނުންކުރަމުންއައި ހ.މުނިއުފާ (ކުރީގެ ހެންވޭރު ޔޫތު ސެންޓަރު) ގައެވެ.

މި ހޯލު ރަސްމީކޮށް ހުޅުވައިދެއްވީ ހޯމަ ދުވަހު ބޭއްވުނު ރަސްމިއްޔާތުގައި، އެކްޓިން ޔޫތު މިނިސްޓަރ އަލީ ވަހީދު އާއި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޝެންގް ލީޝޯންގް އެވެ. މީގެ އިތުރުން ވެސް މި ރަސްމިއްޔާތުގައި ސީއެމްއީސީގެ އިސް ވެރިންނާއި ރާއްޖެއިން ޖަރުމަނަށް ކަނޑައަޅުއްވާފައި ހުންނަވާ ސަފީރު އަދި ޓީޓީ އެސޯސިއޭޝަނުގެ ކުރީގެ ރައީސް އަހުމަދު ލަތީފު އާއި ރާއްޖޭގެ ޔޫތު މިނިސްޓްރީގެ އިސްވެރިންގެ އިތުރުން ޓޭބަލްޓެނިހުގައި ހަރަކާތްތެރިވާ ގިނަ އަދަދެއްގެ ކުދިންނާއި ގައުމީ ޓީމުގައި ހިމެނޭ ކުޅުންތެރިން ބައިވެރިވިއެވެ.

މީގެ ކުރިން ވެސް ހޯމަ ދުވަހު ހުޅުވުނު ހޯލު ޓޭބަލްޓެނިސް މުބާރާތްތަކަށާއި ފަރިތަކުރުންތަކަށް ބޭނުންކުރި ނަމަވެސް ތަން ހޫނުވުމުގެ ސަބަބުން އެ ހޯލަކީ ކުޅެން އެންމެ އެކަށީގެންވާ މާހައުލެއް ނޫނެވެ. މަރާމާތުތަކާއިއެކު ހޯލު އަލުން ހުޅުވިއިރު އޭސީ އާއެކު ތަނުގެ އެތެރެއަށް ވަނީ ބަދަލުތަކެއް ގެނެސްފައެވެ.

ހޯމަ ދުވަހުގެ ރަސްމިއްޔާތުގައި ޗައިނާ ސަރުކާރުގެ ފަރާތުން ރާއްޖޭގެ ޓޭބަލްޓެނިސް އެސޯސިއޭޝަނަށް ހަދިޔާކުރި ޓީޓީ ކުޅޭ ސާމާނު ވަނީ ރަސްމީކޮށް އެ އެސޯސިއޭޝަނާއި ހަވާލުކޮށްފައެވެ.

ރަސްމިއްޔާތުގައި ވާހަކަފުޅު ދައްކަވަމުން އެކްޓިން ޔޫތު މިނިސްޓަރ އަލީ ވަހީދު ވިދާޅުވީ ކުޅިވަރުގެ ސަބަބުން ގިނަ ކަންތައްތަކެއް ދަސްވެގެން ދާނެކަމަށާއި، ބަލިވުމުންނާއި މޮޅުވުމުން އަމަލު ކުރަންވީގޮތް ޒުވާންޖީލަށް ދަސްވުމަށް ކުޅިވަރު މުހިއްމުކަމަށެވެ. ދުޅަހެޔޮ ސިއްހަތެއްގައި މީހާ ހުރުމަށާއި ރަނގަޅު އަހުލާގެއް ދެމެހެއްޓުމަށް ކުޅިވަރެއް ކުޅުން މުހިއްމު ކަމަށެވެ. ހަމަ އެހެންމެ، ރައީސް އިބްރާހިމް މުހައްމަދު ސޯލިހުގެ ސަރުކާރުގައި ކުޅިވަރު އެސޯސިއޭޝަންތައް މަގުމަތިވެ ވަންނާނެ ތަނެއް ނެތިފައި ނުތިބޭނެ ކަމަށެވެ.

އެއު ޓޭބަލްޓެނިސް ހޯލު ހުޅުވުމުގެ ރަސްމިއްޔާތަށް ފަހު މިނިސްޓަރ ވަނީ ޗައިނާ ސަފީރާއެކު އެކުވެރިކަމުގެ ޓޭބަލްޓެނިސް މެޗެއް އައު ހޯލުގައި ކުޅުއްވާފައެވެ.