ރައީސް ސޯލިހު ހަވަލި ފެއާ އަށް ޒިޔާރަތް ކުރައްވައިފި
18 މާރިޗު 2019 | ހޯމަ 10:27ޒިޔާރަތް ކުރެއްވީ މިއަދު މެންދުރު
ރައީސް ސޯލިހު ހަވަލި ފެއާގެ ސްޓޯލެއް ބައްލަވައިލައްވަނީ
މަދަނީ ޖަމިއްޔާތަކަށް ހާއްސަކޮށްގެން ދަރުބާރުގޭގައި ބާއްވާ ހަވަލި ފެއާ އަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ޒިޔާރަތް ކުރައްވައިފިއެވެ.
ހޯމަ ދުވަހު ރައީސް ސޯލިހު ކުރެއްވި ޒިޔާރަތުގައި އެމަނިކުފާނު ވަނީ ސްޓޯލްތަކަށް ވަޑައިގެން ސްޓޯލްތަކުގެ ވެރިންނާއި ބައްދަލުކުރައްވާފައެވެ.
ރައީސް ސޯލިހުގެ އަރިހުގައި ޓޫރިޒަމް މިނިސްޓަރު އަލީ ވަހީދުގެ އިތުރުން ހޯމް މިނިސްޓްރީގެ ނައިބް ޢަލީ ނަޒީރު ވެސް ވަނީ ބައިވެރިވެވަޑައިގެންފައެވެ.
ހޮނިހިރު ދުވަހު ފެށި މިފެއާ ރަސްމީކޮށް ހުޅުވައިދެއްވީ އިކޮނޮމިކް މިނިސްޓަރު ފައްޔާޒު އިސްމާއިލެވެ. ފެއާގައި ވާހަކަ ދައްކަވަމުން ފައްޔާޒު ވިދާޅުވީ މަދަނީ ޖަމިއްޔާތަކަށް ބޭނުންވާ ބާރުވެރިކަން މި ސަރުކާރުން ހޯދައިދޭނެ ކަމަށާއި މަދަނީ ޖަމިއްޔާތަކަކީ މުހިންމު ރޯލެއް އަދާކުރާ ބައެއް ކަމަށެވެ.
މިފެއަރގައި 100 އަށް ވުރެ ގިނަ ޖަމްއިއްޔާ ބައިވެރިވެއެވެ. ފެއަރ ކުރިއަށް ދާނީ ކޮންމެ ދުވަހަކު މެންދުރު 1300 އިން 1800 އަށް އަދި 2000 އަކުން 2230 އަށް ދަރުބާރުގޭގައެވެ. ފެއަރގެ ތެރެއިން ހެނދުނާއި މެންދުރު ފަހު ތަމްރީނު ޕްރޮގްރާމްތަކާއި، ނެޓްވޯކިންގ ސެޝަންތައް އަދި ކީނޯޓް ސެޝަންތައް ކުރިއަށްދާނެއެވެ.
ފެއަރގެ މައިގަނޑު ތިން މަޤްސަދަކީ މަދަނީ ޖަމްއިއްޔާތައް ހިންގުން ހަރުދަނާ ކުރުމުގައި އެހީތެރިކަން ފޯރުކޮށްދިނުމާއި ޖަމްއިއްޔާތަކުގެ މަސައްކަތް ފޯކަސް ކުރުމަށް އެހީތެރިވެދިނުމުގެ އިތުރުން ޖަމްއިއްޔާތައް ހިންގުމަށްޓަކައި މާލީ އެހީތެރިކަން ލިބޭނެ މަގު ފަހިކޮށްދިނުމެވެ.
މިއަދަކީ މިފެއާގެ އެންމެ ފަހު ދުވަހެވެ.
