ޝިމާ ހޯދުމަށް ކުރިއަށް ގެންދާ އޮޕަރޭޝަނަކީ މިފަދަ އެންމެ ބޮޑު އެއް އޮޕަރޭޝަން: ކޯސްޓްގާޑް
ސިމާ ހޯދުމުގެ އޮޕަރޭޝަނަށް ގިނަ ރިސޯސްތަކެއް ބޭނުން ކުރެވުނު
ޢުމުރުން 19 އަހަރުގެ ޝިމާ ފާއިޒް
ޑިންގީއެއް ބަންޑުން ޖަހާލުމާއި ގުޅިގެން ގެއްލިފައިވާ އައިމިނަތު ޝިމާ ނާފިޒު ހޯދުމަށް އެމް އެން ޑީއެފް އިން ކުރިއަށް ގެންދާ އޮޕަރޭޝަނަކީ މިހާތަނަށް ކޯސްޓްގާޑުން ކުރިއަށް ގެންދާ މިފަދަ އެންމެ ބޮޑު އެއް އޮޕަރޭޝަން ކަމަށް އެމްއެންޑީއެފުން ބުނެފިއެވެ.
ކޯސްޓްގާޑުގެ މަސައްކަތްތަކުގެ މަޢުލޫމާތު ހިއްސާ ކުރުމަށް ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މޭޖަރ އަޙުމަދު މުޖުތަބާ ވިދާޅުވީ ޝިމާ ހޯދުމަށް ކުރިއަށްގެންދާ އޮޕަރޭޝަނަކީ، އެމްއެންޑީއެފް ކޯސްޓްގާޑްގެ ތާރީޚުގައި ވެސް ހިންގާ މިފަދަ އެންމެ ބޮޑު އެއް އޮޕަރޭޝަން ކަމަށެވެ. އަދި މި އޮޕަރޭޝަން މިހާރު ތްރީ ޑައިމެންޝަން އޮޕަރޭޝަނެއްގެ ގޮތުގައި ކުރިއަށްގެންދާ ކަމަށް ވެސް އޭނާ ވިދާޅުވިއެވެ.
"ސިމާ ގެއްލުމާއި ގުޅިގެން އަޅުގަނޑުމެންގެ ވަރަށްގިނަ ރިސޯސަސް ތަކެއް މިކަމަށް ބޭނުން ކުރިން. ވަރަށް ގިނަ ދުވަހުގެ މަސައްކަތުން ޕްލޭން ތަކެއް ވެސް ކޮށްގެން ކުރިއަށް ގެންދާ އޮޕަރޭޝަނެއް. ވިލިގިލީގައި ގާއިމްކޮށްފައި ހުރި ރެސްކިއު ކޯޑިނޭޝަން ސެންޓަރުން މިކަން ކޯޑިނޭޓް ކުރާ ގޮތަށް އަޅުގަނޑުމެންގެ ޝިޕަކާއި، އަންޑަރ ވޯޓަރ އާރުއޯވީގެ އިތުރުން ހެލިކޮޕްޓަރު ބޭނުން ކޮށްގެން އޮޕަރޭޝަން ކުރިއަށް ގެންދަނީ " މުޖުތަބާ ވިދާޅުވިއެވެ. ޢުމުރުން 19 އަހަރުގެ ޝިމާ ފާއިޒް ގެއްލިފައިވަނީ ފެބުރުއަރީ މަހުގެ 22ވަނަ ދުވަހު އެވެ. އޭނާ ގެއްލުނީ ލ.ކައްދޫއިން ފުރައިގެން އެއަތޮޅު މާމެންދޫއަށް ޑިންގީ އެއްގައި ދަތުކުރަމުން ދަނިކޮށް ޑިންގީ ބަންޑުން ޖަހާލައިގެން ކަމަށް ޝިމާއާ އެންމެފަހުން ބައްދަލުވި އިބްރާހީމް ފަޒީލު ބުނެފައި ވެއެވެ.
ޑިންގީ ބަންޑުން ޖަހާލި ހާދިސާގައި ޝިމާ ނާފިޒުގެ ކޮއްކޮ ގޮވައިގެން މޫނު ނިވާކޮށްގެން ތިބި ބަޔަކު ޑިންގީއެއްގައި ފިލަން އުޅެނިކޮށް ފުލުހުން ވަނީ މިދިޔަ ހަފްތާގައި ހައްޔަރު ކޮށްފައެވެ. ހައްޔަރުކުރި މީހުންގެ ތެރޭގައި ފަޒީލް ވެސް ހިމެނެއެވެ.
އެ މީހުން ހައްޔަރު ކޮށްފައި ވަނީ ސިކް ސެންސަސް ރިސޯޓް ސަރަހައްދުން ކަމަށް ފުލުހުން ބުނެއެވެ.
ފުލުހުން ބުނީ މައްސަލަ އިތުރަށް ތަހުޤީޤް ކުރަމުން އަންނަ ކަމަށެވެ.
