އަލްމާ ބޯޓް ފުންކޮށް ހުޅުމީދޫގައި ބަނދަރުކޮށްފި
16 މާރިޗު 2019 | ހޮނިހިރު 14:37ހާދިސާގައި އެ ބޯޓްގެ ބަނޑުފިލާއިން 3 ފޫޓުގެ ތަނެއް ހަލާކުވެފައިވޭ
މާލެއިން ފުރައިގެން ސ. ހުޅުމީދޫއަށް ދަތުރުކުރަނިކޮށް ފަރަށްއެރި އަލްމާ ބޯޓް
މާލެއިން ފުރައިގެން ސ. ހުޅުމީދޫއަށް ދަތުރުކުރަނިކޮށް ފަރަށްއެރި އަލްމާ ބޯޓް ފުންކޮށް ހުޅުމީދޫގައި ބަނދަރުކޮށްފައިވާ ކަމަށް އެމްއެންޑީއެފް މީޑިއާ އޮފިޝަލް ކެޕްޓަން އިބްރާހިމް އާޒިމް ވިދާޅުވެއްޖެއެވެ.
ރާއްޖެ އެމްވީން ކުރި ސުވާލަކަށް ޖަވާބުދެއްވަމުން އާޒިމް ވިދާޅުވީ އަލްމާ ބޯޓު ހުޅުމީދޫ ނެރުބައްތީގެ އިރު ދެކުނު ފަރާތު ފަރަށް އެރުމާ ގުޅިގެން އެމްއެންޑީއެފް ސަދަން އޭރިއާގެ ކޯސްޓު ގާޑުން ހަރަކާތްތެރި ވެފައިވާ ކަމަށާއި، މި ހާދިސާގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށެވެ.
އެ ބޯޓް ފުން ކުރުމަށްފަހު ހުޅުމީދޫ ފަޅުތެރެއަށް މިހާރު ވައްދާފައިވާ ކަމަށާއި، ބޯޓް ދިޔަވަމުން ދާތީ ފެން ހިއްކުމުގެ މަސައްކަތް ކުރަމުންދާ ކަމަށް ވެސް އާޒިމް ވިދާޅުވިއެވެ.
އެ ހާދިސާގެ މައުލޫމާތު އެމްއެންޑީއެފަށް ލިބިފައި ވަނީ ހުކުރު ދުވަހުގެ ރޭ މެންދަމުން އަލިވެ ތިނެއް ޖަހާ އެހާކަންހާއިރު ކަމަށާއި ހާދިސާގައި އެ ބޯޓްގެ ބަނޑުފިލާއިން ތިން ފޫޓުގެ ތަނެއް ހަލާކުވެފައިވާ ކަމަށް ވެސް ކެޕްޓަން އާޒިމް ވިދާޅުވިއެވެ. ހާދިސާ ހިނގިއިރު ބޯޓުގައި ތިބީ ފަސް ދިވެހިންނާއި ހަ ބިދޭސީންނެވެ. އެއިން އެއްވެސް މީހަކަށް ގެއްލުމެއް ލިބިފައި ނުވާކަމަށް އޭނާ ވިދާޅުވިއެވެ. އަލްމާ ބޯޓަކީ އައްޑޫ ސިޓީ ހުޅުމީދު އާއި މާލެއާ ދެމެދު ދަތުރު ކުރާ ބޯޓެކެވެ.
