އިންޑިއާގެ އެކްޓާނަލް އެފެއާޒް މިނިސްޓަރ ސުޝްމާ ސްވަރާޖް ރާއްޖެއަށް ކުރައްވާ ދަތުރުފުޅުގެ ސަބަބުން ދެ ގައުމުގެ ދެމެދުގައި އުފެދިފައިވާ ގުޅުން އިތުރަށް ބަދަހިވެގެންދާނެކަމަށް އިންޑިއާއިން ބުނެފިއެވެ.
ދެ ދުވަހުގެ މުއްދަތަށް ސުޝްމާ ރާއްޖެއަށް ކުރައްވާ ދަތުރުފުޅު ފައްޓަވާނީ އާދީއްތަ ދުވަހުއެވެ. އެ ދަތުރުފުޅަކީ ރާއްޖޭގެ ފޮރިން މިނިސްޓަރު އަބްދުﷲ ޝާހިދުގެ ދައުވަތަކަށް ކުރައްވާ ދަތުރުފުޅެކެވެ.
ސުޝްމާގެ މި ދަތުރުފުޅުގައި ޝާހިދުގެ އިތުރުން ރާއްޖޭގެ އެކި ވުޒާރާތަކުގެ ވެރިންނާއި ބައްދަލު ކުރެއްވުމަށް ވަނީ ހަމަޖެހިފައެވެ.
އޭގެ ތެރޭގައި ޑިފެންސް މިނިސްޓަރ މާރިޔާ ދީދީ އާއި ފިނޭންސް މިނިސްޓަރ އިބްރާހިމް އަމީރާއި ޕްލޭނިން މިނިސްޓަރ މުހައްމަދު އަސްލަމާއި، ހެލްތު މިނިސްޓަރ އަބްދުﷲ އަމީނާއި، ޓްރާންސްޕޯޓް މިނިސްޓަރ އައިޝަތު ނަހުލާ އާއި، ހެރިޓޭޖް މިނިސްޓަރ ޔުމްނާ މައުމޫނާއި އެންވަޔަރަމެންޓް މިނިސްޓަރ ޑރ. ހުސައިން ރަޝީދު އަހުމަދާއި އިކޮނޮމިކް ޑިވެލޮޕްމެންޓް މިނިސްޓަރު ފައްޔާޒު އިސްމާއިލް ހިމެނިވަޑައިގަންނަވައެވެ.
އިންޑިއާއިން ހޮނިހިރު ދުވަހު ނެރެފައިވާ ސްޓޭޓްމަންޓެއްގައި ބުނެފައި ވަނީ ސުޝްމާ ރާއްޖެއަށް ކުރައްވާ ދަތުރުފުޅުގައި ދެ ގައުމުގެ ދެމެދުގައި ކުރިއަށް ގެންދެވެން ހުރި ކަންތައްތަކާއި ކުރިއަށް ރޭވިފައިވާ ޕްރޮގްރާމްތަކާއި ބެހޭ ގޮތުން މަޝްވަރާ ކުރައްވާނެ ކަމަށެވެ.
އެކަމަނާގެ މި ދަތުރުފުޅުގައި ހޯމް މިނިސްޓަރ އިމްރާން އަބްދުﷲ އާއި ވެސް ވަކިން ބައްދަލު ކުރައްވާނެއެވެ. އަދި ރައީސް ސޯލިހާ ވެސް އެކަމަނާ ބައްދަލު ކުރައްވާނެއެވެ. ރައީސް ސޯލިހާއި ހޯމް މިނިސްޓަރާއި އެކަމަނާ ބައްދަލުކުރައްވާނީ ހޯމަ ދުވަހުއެވެ. އަދި އާދީއްތަ ދުވަހު މަޖިލީހުގެ ރައީސް ގާސިމް އިބްރާހިމާ ބައްދަލު ކުރައްވާނެއެވެ.
ސުޝްމާ ރާއްޖެއަށް ކުރައްވާ އެ ދަތުރުފުޅުގައި ދެ ގައުމުގެ ދެމެދު މިހާރު އެކުލަވާލެވިފައިވާ އަދި ކުރިއަށް އޮތްތަނުގައި އެކުލަވާލާނެ އެއްބަސްވުންތަކާ ބެހޭ ގޮތުން މަޝްވަރާ ކުރުމަށް ވަނީ ހަމަޖެހިފައެވެ.
