އެމެރިކާ ސަފީރު މިނިސްޓަރު ޝާހިދުއާއި ބައްދަލުކުރައްވައިފި
ބައްދަލުވުމުގައި ދެބޭފުޅުން ވަނީ ދެގައުމުގެ ގުޅުން އިތުރަށް ހަރުދަނާ ކުރުމާއި ބެހޭ ގޮތުން ވާހަކަފުޅު ދައްކަވާފަ
މިނިސްޓަރ ޝާހިދުއާއި އެމެރިކާ ސަފީރު އެލެއިނާ ޓެޕްލީޒްއާއި އެކު ބޭއްވި ބައްދަލުކުރެއްވުމުގެ ތެރެއިން
އެމެރިކާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އެލައިނާ ޓެޕްލީޒް، މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދުއާއި ބައްދަލުކުރައްވައިފިއެވެ.
އަންގާރަ ދުވަހު މިނިސްޓްރީ އޮފް ފޮރިން އެފެއަރޒްގައި ބޭއްވި ބައްދަލުވުމުގައި މިނިސްޓަރ ޝާހިދާއި ސަފީރު ޓެޕްލީޒްވަނީ ދެގައުމުގެ ގުޅުން އިތުރަށް ހަރުދަނާ ކުރުމާއި ބެހޭ ގޮތުން ވާހަކަފުޅު ދައްކަވާފައެވެ.
މިނިސްޓަރ ޝާހިދުއާއި ވާހަކަފުޅު ދައްކަވަމުން ސަފީރު ޓެޕްލީޒް ވަނީ އޭވިއޭޝަން ދާއިރާގެ ސަލާމަތީ ކަންކަމާއި، މާލީ ނިޒާމް ހަރުދަނާކުރުމުގެ އިތުރުން އިދާރާތަކުގެ ހިންގުން ހަރުދަނާކުރުމަށް އެމެރިކާއިން ރާއްޖެއަށް ފޯރުކޮށްދެމުންދާ އެހީތެރިކަމުގެ އެންމެ ފަހުގެ މައުލޫމާތު މިނިސްޓަރ ޝާހިދާއި ހިއްސާކުރައްވާފައެވެ.
ދެބޭފުޅުންގެ ބައްދަލުވުމުގައި މިނިސްޓަރ ޝާހިދު ވަނީ އެމެރިކާ ސަރުކާރުން އަބަދުވެސް ފޯރުކޮށްދެއްވަމުން ގެންދަވާ އެހީތެރިކަމަށްޓަކައި ޝުކުރު އަދާކުރައްވާފައެވެ ދެގައުމުގެ ގުޅިގެން މަސައްކަތްކުރުމަށް އެމަނިކުފާނުގެ ފުރިހަމަ އެހީތެރިކަން ފޯރުކޮށްދެއްވާނެކަމުގެ ޔަގީންކަން ދެއްވާފައެވެ.
މިބައްދަލުވުމުގައި މިނިސްޓަރ ޝާހިދުގެ އަރިހުގައި މިނިސްޓަރ އޮފް ސްޓޭޓް ފޮރ ފޮރިން އެފެއަރޒް އަހުމަދު ހަލީލް، ފޮރިން ސެކްރެޓަރީ އަބްދުލްގަފޫރު މުހައްމަދު، ދިވެހިރާއްޖެއިން އެމެރިކާއަށް ކަނޑައަޅުއްވާ ސަފީރުކަމަށް ރައްޔިތުންގެ މަޖިލީހުން ރުހުންދީފައިވާ ތިލްމީޒާ ހުސައިން އަދި މިނިސްޓްރީ އޮފް ފޮރިން އެފެއަރޒްގެ ޑިރެކްޓަރ ޝިއުނީން ބައިވެރިވެވަޑައިގަތެވެ.
