ރައީސް ޔާމީން ހުންނެވީ ސިޔާސީ ބަންދެއްގައި ކަމަށް ބުނާ ވާހަކައިގައި އެއްވެސް ހުއްޖަތެއް ނެތް: އެމްޑީޕީ
12 މާރިޗު 2019 | އަންގާރަ 09:31ހުރިހާ އޮޕޮޒިޝަން ލީޑަރުން ސިޔާސީ ބަންދުގައި ބެހެއްޓި: އަފްޝަން
އެމްޑީޕީ ޕްރެސް ބްރީފިންގ
ކުރީގެ ރައީސް އަބްދުﷲ ޔާމީނުގެ މައްޗަށް ކޮށްފައި ވަނީ ސިޔާސީ ދައުވާއެއް ކަމަށާއި، އެ މަނިކުފާނު ހުންނެވީ ސިޔާސީ ބަންދެއްގައި ކަމަށް އިނދިކޮޅު ފަރާތްތަކުން ދައްކަވާ ވާހަކައަށް އެމްޑީޕީން ރައްދުދީފިއެވެ.
އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވިދާޅުވީ، އެ ޕާޓީން ދެކޭ ގޮތުގައި ރައީސް ޔާމީން ބަންދުގައި ހުންނަވަނީ ކުރެވެމުންދާ ތަހުޤީޤުތަކާ ގުޅިގެން ކަމަށާއި، އެއީ ސިޔާސީ ބަންދެކޭ ބުނުމަކީ އެއްވެސް ހުއްޖަތެއް ނެތް ވާހަކައެއް ކަމަށެވެ.
"އަޅުގަނޑުމެން ޤަބޫލުކުރާ ގޮތުގައި ރައީސް ޔާމީން އެ ހުންނެވީ ކުރެވެމުންދާ ތަޙުޤީޤަކާ ގުޅިގެން ހައްޔަރުކުރެވިފަ. ދެން އެބޭފުޅުން ވަރަށް ތަކުރާރުކޮށް އެބަ ވިދާޅުވޭ އިންސާފުވެރި އިންތިހާބެއް ނުބޭއްވޭނެ ކަމަށް ރައީސް ޔާމީން ބަންދުގަ ހުންނެވީމަ، އެއީ އޮޕޮޒިޝަން ލީޑަރ ކަމަށް، އަޅުގަނޑުމެން މި ދައްކަވާ ވާހަކައަކީ އަޅުގަނޑުމެންގެ ހުރިހާ އޮޕޮޒިޝަން ލީޑަރުން ތިއްބެވީ މިކަހަލަ ސިޔާސީ ބަންދެއްގައޭ، އަދި އޭރު އެޕާޓީން، ޕީޕީއެމްއިން ވަނީ ދޮގު ކުރައްވާފަ، އަދި އަޅުގަނޑުމެން އިންތިހާބަކާ ކުރިމަތިލީ އެ ހުރިހާ ގޮންޖެހުންތަކާ އެކީގައި، އެހެންކަމުން އެއީ އެއްވެސް ހުއްޖަތެއް އޮތް ވާހަކައެއް ނޫން," އަފްޝަން ވިދާޅުވިއެވެ.
އަފްޝަން އެހެން ވިދާޅުވެފައިވާއިރު، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހައްޔަރުކުރުމަށް ކްރިމިނަލް ކޯޓުން ނެރެފައިވާ އަމުރުގެ އިސްތިއުނާފް އަޑުއެހުން އަންގާރަ ދުވަހު ވަނީ ނިންމާލާފައެވެ. އަދި ރައީސް ޔާމީންގެ އިސްތިއުނާފްގެ މައްސަލަ ކުރިއަށް ގެންގޮސްފައި ވަނީ ސިއްރު މައްސަލައެއްގެ ގޮތުގައި ކަމަށާއި، ރައީސް ޔާމީން ހައްޔަރުކޮށްފައި ވަނީ ގާނޫނާއި ޚިލާފަށް ކަމަށް ރައީސް ޔާމީންގެ ވަކީލް އަބްދުﷲ ސިޔާޒް ވަނީ ވިދާޅުވެފައެވެ.
