ގެއްލިގެން ހޯދަމުންދާ އައިމިނަތު ޝިމާ ނާފިޒުގެ އަންހެން ކޮއްކޮ ގޮވައިގެން ޑިންގީއެއްގައި ފިލަން އުޅެނިކޮށް، ހައްޔަރު ކުރި ތިން މީހުންގެ ބަންދަށް 15 ދުވަސް ކޯޓުން ޖަހައިފިއެވެ.

ބަންދުގެ މުއްދަތު ޖެހި މީހުންގެ ތެރޭގައި ޝިމާ ގޮވައިގެން ޑިންގީގައި ދަތުރުކުރި މީހާ، ލ. ގަމު އިބްރާހިމް ފަޒީލް ވެސް ހިމެނެއެވެ. ފަޒީލާއި ޝިމާ ދަތުކުރި ޑިންގީ ބަންޑުން ޖަހާލައިފައި ވަނީ މިދިޔަ މަހުގެ 22 ވަނަ ދުވަހު ލ. ކައްދޫ އިން އެ އަތޮޅު މާމެންދޫއަށް ދަތުރު ކުރަމުން ދަނިކޮށެވެ. އެ ހާދިސާގައި ފަޒީލް ސަލާމަތް ވީ ފަތާފައި، އެ ސަރަހައްދުގައި އޮންނަ ސިކްސް ސެންސް ރިސޯޓަށް އަރައިގެން ކަމަށް އޭނާ ބުނެއެވެ.

އުމުރުން 16 އަންހެން ކުއްޖާ ގޮވައިގެން ޑިންގީއެއްގައި އާދީއްތަ ދުވަހު ފިލަން އުޅެނިކޮށް، ބަޔަކު ހުއްޓުވީ ސިކްސް ސެންސް ރިސޯޓް ކައިރިންނެވެ. ފުލުހުން ބުނީ ހައްޔަރު ކުރީ 22 އަހަރުގެ ފިރިހެނަކާއި 24 އަހަރުގެ ފިރިހެނެއްގެ އިތުރުން 26 އަހަރުގެ ފިރިހެނެއް ކަމަށެވެ. އެ ތިން މީހުންގެ ތެރޭގައި ފަޒީލް ހިމެނެއެވެ.

އުމުރުން 19 އަހަރުގެ ޝިމާ ހޯދުމަށް ސިކްސް ސެންސަސް ރިސޯޓް ސަރަހައްދުގެ ފަސް މޭލު ހެލިކެޕްޓަރު ބޭނުންކޮށްގެން ސިފައިން ވަނީ ބަލާފަ ކަމަށެވެ. އަދި ކޯސްޓުގާޑާއި ޑައިވަރުން ބޭނުންކޮށްގެން ބެލިއިރު ވެސް، ޝިމާ ދަތުރުކުރި ޑިންގީ ވެސް ނުފެނެއެވެ.

ޝިމާ ގެއްލުނު ހާދިސާއާ ގުޅިގެން، ޑިންގީ ދުއްވި ފަޒީލް "ރާއްޖެއެމްވީ" އަށް ކުރިން ބުނެފައި ވަނީ ޑިންގީ ބަންޑުން ޖަހާލުމުން، އިންޖީނުގެ ޕެޓްރޯލް ޓޭންކް ހުސްކުރުމަށް ފަހު، ޝިމާއަށް ދިން ކަމަށެވެ. އަދި ދެ މީހުން ކަނޑުވެފައި ތިއްބާ، ސަލާމަތްވުމަށް ރިސޯޓަށް އޭނާ ފަތާފައި ދިޔަ ކަމަށާއި ފަތާފައި ދާން ފެށުމުން ޝިމާ އެހީއަށް އެދި ގޮވި ކަމަށާއި ލޮލުކޮޅަށް ގެއްލުނު އިރުވެސް ޝިމާ ގޮވަމުން ދިޔަ ކަމަށް ފަޒީލް ބުންޏެވެ.